ኣይትኺዲ!!

ኣንቲ ዘይትምኖ ከም’ዛ ዕራብ ጸሓይ

ኣንቲ ዘይትጽገብ ጥዕምቲ ደሃይ

በልና ‘ባ ምንባር ተላመዱ

የማነ ጸጋም ጠምቱ ኣይትተዓነዱ።

ምንባር የፍርሕ’ዩ ከም’ዛ ጸላም

ትብዓት ይሓትት ሕልናኻ ዘይምጥላም

ይጉዳእ’ዩ ስምዒት ይዝረግ’ዩ ሕልሚ

ፍሽኽታ ከይተኸወለ ቅጽበት ትደሚ።

ይቕሬታ ዝእግሞ ዕርቂ ዘሰንብዶ

ብራርያ ፍቕሪ ለበዋ ዘይከብዶ

ኣብ ቃሉ ዘየትክል ምብዝሑ

ውሉድ ንወላዲ ምግንሑ

እኩብ ድምሩ ናብራና በትኒሑ።

ኣንቲ ተድላ ኣንቲ ሰሓቕ

መኣስ ብኣካልኪ መንፈስኪ ውን ኣይርሓቕ

ኣይትኺዲ ጸሓይ መዓልቲ ቁጸሪ

ሓደራ ኣይትዕረቢ ይብራህ’ዚ ቀትሪ

ንስኺ እቲ ንቡር ግበሪ።

መፈስሂት ልቢ ዕንባባ ንዓይኒ

ቀረባ ርሕቕቲ ጥራይ ተወናውኒ

ካብ ልቢ ..ካልኢት ዘይትጠፍኢ

ክትኮኒ ኢኺ ብርኩት ቀውዒ።

ኣይተጋገኽን ወለላኺ ዝዕርዕሮ ‘ሎ

ፈቃር መሲሉ ዝስምመኪ ‘ሎ

ግና ስለ ሕዙን! ኣይትኺዲ ስልምቲ

ተስፋ ብዙሓት ከይተጸልምቲ።

ኣይትኺዲ ጽላል ስምኪ ይንበር

ጎዳኢኺ ይጎዳእ ጸላኢኺ ይሰበር

ሰብ ሎሚ ኣበይ’ሞ ይኽእሎ

እምበር ሓቅኺ ፍቕሪ ዋጋ’ዩ ዝኽፈሎ።

ነብሶም ዘይረኸቡ ርእሶም ዘይፈትዉ

ጽባሕ ከይንስእና ዝብሉኺ ‘ለዉ

ኣለዉ ምኻድኪ ዝረአ ዝመስሎም

ብሽታ ዝተነፍሑ ሓሳቦም ዝጻወተሎም።

ወዲ ብርሃን ..ብርሃን ምስ ተነፍጎ

ኣደ ልዋም..ለይታ ልዋም ምስ ጨነቖ

ነዚ እንክትርእዪ ቁዛን ትስርሒ

ንግስነት ምስ ኣወጀት ፍርሒ።

ይገርመኪ ‘ዩ ነገረ ተፈጥሮ

ነቲ ንብህጎ ነቲ ንምድሮ

ባዕልና ዘይንነብሮ

ኣባና በጺሑ ፍትሒ ‘ቲ ፍሽለታ

ጨቆንቲ ክንስና ኩልና ደለይታ።

ንስኺ ግን ኣይትከወሊ ተጸመሚ

ንበራበር ንኸውን ካብ’ዚ ከቢድ ሕልሚ

ድሕሪ ገልጠምጠም ይቕየር’ዩ ታሪኽ

ክመጽእ ‘ዩ ትወጽእሉ በሪኽ።

ዝግ ምስ በለ መጥፍኢና ንፋስ

ኣብ ሑቕፎኺ ‘ሎ ትንፋስ

ኩሉ ከጽልለልኪ ክትግርሚ ክትማርኺ

ኣይትኺዲ ጸዋር ፈጣሪ ይሓሉኺ።

         ተስፊት ዮውሃንስ

        14-04-2016