ስለማርያም

“ጽዮናዊት ንጽህቲ ሕልና

ኣብ ኣድባራት ቤትኪ ንልምን ኣለና

ስለማርያም ተሰኪምና መዲድ

ብንጹህ ሕልና ናባኺ ንሰግድ

ዕገትዮ ውሕጅ ዕገትዮ ንፋስ

ይወዳእ እዚ ዕላጅ ምለስዮ ትንፋስ

ንብል ኣለና ኦ እግዝእትነ ማርያም!

ድምጽኺ ኣስምዒ ካብ ኣርያመ ኣርያም

እነሆ ምእመናን ጻዕዳ ተወንዚፉ

ኣብ ቤትኪ የማልድ ምርኩስ ተደጊፉ

እቲ ገሊኡ ከኣ ነጸልኡ ኣንጺፉ

ፍግም ይብል ኣሎ ቁልቁል ኣፉ።

የሰንብደና’ውን ንፋስ እንተሓሊፉ

ማርያም ባዕላ የላን ዝብል ቃል ሓቚፉ።

ማርያም ምስቶም ደቃ ከይዳ’ያ ንጽዮን

ማዕበል ከተህድእ መሾንቦባን ፋጽያን

ማርያም ኩሉ ኣብ ከብዳ ተሰኪማን ጸይራን

ክትመልሶም’ያ ደቃ ሓዚላን ሓንጊራን!

ኣንታ መን’ዩ ዝብል ማርያም የላን

ኣላ እምበር ኣብ ቤትን ገበላን፡

ኣንትን ሰብ ነጸላ ናብ ቤታ እተብላ

ማርያም እነሀለት ሽፍን ኢላ

ውሉዳ ሒዛ ጽግዕ ኢላ

ትሕትና ክትምህር ትሕት ኢላ

ዕሽር ሃቡ ዕሽር ንትኮበላ

ንሱ’ዩ ጽድቂ ንሱ’ዩ ቃል ማሕላ

ማርያምሲ በሉ ፍቐድኡ’ላ

ስለማርያም ትብል ማርያም ከላ!!

መለስ ንጉሰ

መጋቢት  2016

ካብ ታይም ላይን ናይ መለስ ንጉሰ ዝተወስደት ግጥሚ