ናብ ሓለቓይ ነበር

 ነታ ትካልካ ምስ ከፈትካያ

ተሃንጥየ’የ መጺአካ ብጉያ

ተፈጥሮ ሰብ ግዲ ኮይኑ

ሓዲሽ ነገር ተፈታዊ’ዩ ኣብ ፈለማኡ።

ኣነ ድማ ከምኡ ኮይነ

‘ናዘለልኩ ናብ ትካልካ ኣትየ።

    እናዕበኹዋ ብጥበብ ክዓቢ

ድምጸይ ኣበሪኸ ድምጺ ፍቕሪ

ስጋይ ኣጥምየ ን’ናበላዕኩ ባህጊ

ከይተገበዝኩ ሰሪሐ ብልቢ።

ምስኡ ድማ ….

ጥበባዉን ለዋህን ክትከዉን ሕለቓይ

ጸሎት ትምኒት ኣዕሪገ’የ ንሰማይ።

                                                                               ወረ ግርህናይ ክነግረካ

ምሉእ ክትኮነለይ’የ ተጸብየካ።

ከትስተየኒ ወይኒ ሓርነት

ከተነቓቓሓኒ ብዜማ ሰባዉነት

ሃረር ኢለ’የ ብኡነት።

       እንታይ’ሞ መላእ’ብላ ጠስሚ ኮይኑ

ትምኒታተይ ከም ትኪ በኒኑ።

ቁንጣሮ ጽቡቕካ ቅልቅል ኢሉ ኔሩ

ከም ዑፍ መስቀል ግና ሽዓ ተሸሪቡ።

ሃንቀዉታኻ ምስ ትእስኖ

ዝፈጥረልካ ቃንዛ ዘይፈተነ ይፈትኖ።

ምስ ቃንዛይ

ምስ ምግራመይ

እስከ ድሓን ንዉዓል’ሞ ድሓን ድማ ንሕደር

እንተተሰቆሮ ትዕግስቲ ክድረር

ኢለ፣

ንዝተሰወርካ ጥበብ ንክትርእዮ

ሓሳብ ምስ ሃብኩዃ ዝሩግ ክትቃንዮ

ከም ብዕራይ መኼዳ ኣፈይ ኣሲርካዮ

ኣነ ድማ ንትካልካ ጠንጢነዮ።

ሽዑ’የ ‘ምብኣር

ሓርነትካ ትፈጥሮ’ምበር

ዝህበካ ከዘየለ ኣስትብሂለ።

ሓለቓይ ነበር ጥበብ ዘባህርሮ

ኣዒንቱ’ናረኣየ ልቡ ዝዓወሮ

ክብሪ ሰብኣውነት እንተትርድኦ

ክብሪ ሰብነተይ መኽበርካዮ።

ኣበይ ኢልካዮ’ሞ ሓላዊ መንበር

ጓና ሕልንኡ ንስጋ ዝነብር ።

 ሓለቓየ ሓለቓ ትማሊ

ኣልቦ ለውሃት ተሪር ልቢ

ካባኻን ትካልካን ብምርሓቐይ

ፈጢረዮ’ለኹ ሓርነተይ።

ከብስረካ ግዳ

ወላ ይዓርዕርካ

ሓዉዩለይ’ዩ ‘ቲ ዘቑሰልካኒ ብስጋኻ

ሓዉዩልካዶ ቁስሊ ሕልናኻ !?

ጸጋይ መሓሪ(ተመርዖ)