ኣቲ ወላዲት..!
ኣደ ባርያ ኣደ ኣቶብርሃን
ዝኽሪ’ቲ ሓቕን ዝኽሪ ዜማን
ዝኽሪ ሕልናን ዝኽሪ ልቦናን፡
እምበር’ዮም ኣብ ገደል ከይትወድቂ
እምበር’ዮም ኩፉእ ከይትረኽቢ
ብንግሆ ዝነበረ፡
ጾር ሕልናኦም ጾር ጽዕነት ልቢ።
ኣደ በየነ ኣደ’ቶም ጸሓፍቲ
ኣደ ተኽለ ኣደ’ቶም ገጠምቲ
ወርትግ ዝረሰሐ ሕልና ክኹስትሩ
ቀም ከየበሉ፡ ኣብኡ ካኣ ዝነብሩ።
ኣነ’ውን ከም ሰብ!
አምነትን ፍቕርን ምስተደብዩ
ሰብን እዝግን ምስተኾራረዩ
ይኽኣሎ ኣይኽኣሎ
ኣርዑት ሕሰም ኣብክሳደይ እንከሎ፡
ንማህጸንኪ ዝኹሕኩሕ “ዘመነ-ተወልፈፍ”
ሴፉን ዋልታኡን ምስተጻዕነ ፈረስ
ከመ-ቅብጸት ግዲ ቀቢጽክኒ
“ ደ ቅ ስ” አልክኒ
ክ ድ ቅ ስ ፈቲነ..ስ
ድ ቃ ስ ኣብዩኒ።
ብዘይ ንሱ……!!
እናፈራህኩ እናሰከፍኩ
እቲ ግዜ ጥፍኣት ግዜ ሓደገኛ
ደም ምስ ሸተቶ ፈረሰኛ፡
ክሳድ ንጹሃን መመሪጹ ምስ ሰየፎ
ሰብ ጸሊእክዮ፡ኣምላኽ ካኣ ቀቢጽክዮ።
ሰሪ’ዚ ከም ረመጽ ዘቃጽል ጋሂ
ሰሪ’ዚ’ዩ ምስተሓቕነ ከብድኺ
ኣብራኽኪ ጭ ብ ጥ ኢሉ
ብርሃን ተስፋኺ ው ድ እ ኢሉ
ንዓይ ገዲፍኪ ንማህጸንኪ ክትራገሚ
ንዓይ ገዲፍኪ ንጡብኪ ክትራገሚ
እርእዮ’ዴ ዘለኹ!
እሰምዖ’ዴ ዘለኹ!
ዓቕሊ ጽበት ዓቕሊ ዕርበት
ካብ ትማሊ – ናብ ሎሚ
ድቃስ ዶ ‘ሎ’ዩ …?
ደቅስ ትብልኒ?
ብዘይ ንሱ …….!!
ዘይከም ካሎኦት ዘይከም ዓለምኪ
ፍቕሪ’ካ ውሒዱኪ ኮይኑ፡
አቲ ንልብኺ ዝሰበረ ሓዘን
ንብዓት ሎሚ ንብዓት ሕሉፍዘመን
ዘየደቅስ ንብዓት ክልተ ወለዶ
ሰብ ዘይክእሎ ሰብ ዘይጸሮ
ኣብ ከብድኺ ዘሎ
ኣብ ከብደይ’ዩ ዘሎ።
እመንኒ ካኣ ! …..ኣጆኺ!!
ጾር ድሕሪትን ቅድሚትን
መንፈስ ራእን ጽባሕን
ከም ደመና ተኣኻኺቦም፡
ኣለዉ! …. ኣለዉ!! …..ኣለዉ!!!
መቑሕ ሰባቢሮም፡ ንልብኺ ዝድብሱ።
ዘፌ 2013
1 Comment
ነቲ መግለጺ ዘይረኽበሉ ለውህት ወላዲተይ ክትገልጸለይ ስለ ዝኸኣልካ ብልቢ የመስግነካ። ብጥዓሚ ንፍዕ ኢኻ ቀጺሎ ሓወይ ናተይ፡፡