እናተነበዩ ዝዘንቡ
ብዘይ ነጎዳ በርቆም ዝሰዱ
ምስቲ ህቦብላ መሬት ሓመድ እምኒ
ምስ ዝተዋጃበረ ማእዝን
ዝተጻፍዐ ህልወት
እናሳነዩ ዝህልው፡ እናስተንተኑ ዝዕዘቡ
እናዘንበዩ ላዕሊ ላዕሊ
ሰሓቖም ይውድ ኡ’ሞ
ትንፋሶም መንፈስ ይዛሪ!
ንሓድሕዶም ይላዘቡ
ሕንጻጽ ኣብ ዘይብሉ፡ ኣሕዋት ይራኸቡ
ድምጺ ዘይብሎም ብዘይካ መንኮርኮር
ብዘይ ሴፍ ዝቖርጹ ብዘይ ደበላ ጓይላ
እንሆ’ኳ ይረኣዩኒ ንሶም ዝቖረጽዎም ኣራእስ
ርእሲ ዘይብሎም ደሞም ካብ ክሳዶም ዘይፈስስ
ኣለዉ ርእሶም ናብ ከርሶም ተጎምብዩ
ገሊኦም ብፈርሲ ዳንገኦም
ገሊ ኦም ብከስዐኦም ዝሓስቡ . . . .
እቶም ግጥሚ ገጠምቲ ዋዕላ ጌሮም ለ’ን ቅነ
ኣድበንቢኖም ሰማይ ጸሊሙ
ከቢዶም ዓጠጥታ ኣስሚዖም
ክዘንቡ’ዮም ግዲ ማይ ኮይኖም
እንተ ራሕሲ ከምጽኡ
እንተ ንቑጽ ክብንቁሱ
ንመጽእ ኣለና ይብሉ’ለው
እቶም ግጥምታት ገጠምቲ
ደቂ ሎሚ ምስ ደቂ ጥንቲ
ብሓንቲ ደበና ዘነብቲ
ንፋሶም ይነፍስ ኣሎ፡ መገዶም ተጸሪጉ
መሬት ሓሬት ሓሬት-ደበንኦም ኣጽለግሊጉ
ክደምቕ’ዩ ግዲ እዚ ንግሆ
ግጥሚ ዘኒቡ ጸራሪጉ ከውግሖ
ገሊ ኦም ፈሪሆም እንሆ የንቀጥቅጡ
ንግለ ኣካሎም ኪኖ ሓጹር የቐምጡ
ግጥምታት እንተዘኒቦም ግን
ሓጹር ኣይፈልጡ
ኪኖ ሓጹር ኣይፈልጡ
ንዝተኾደዑ ይኹኑ ንዝተቐመጡ
ንኹሉ’ዮም ዝግሕጡ
ብማዮም ሓጺቦም፡ ንጽህቲ ዓለም ክፈጥሩ
ንግስነት ኣይደልዩን’ዮም ንግስነት ውልቂ ክፈጥሩ
እንሀለው ይቕልቀሉ “መጺኻለይዶ ክጽበየካ”
ሹሻይ ሽውሽውታ
ድምጺ ሻሕሻሕታ።
መለስ ንጉሰ
ሕዳር 2002
