ቅልዕቲ መቓብር

ሞቱ ተኣዊጁ
‘ወየ’ ’ናተባህለ ነብሱ ከሲሳቶ
ኣብ ባይቶ ሕልና በዚሑዎ ሕቶ፣
“እናነብዑ ንዘየፍቀሩዎ
እናነብዑ ከመይ ይቐብሩዎ፧”
መልሲ’ንተ ረኸበ ’ናዋጠሮም ንሱ
እና ተጓነጹ ’ሞይቱ’ ’ይሎም ከልቅሱ
ምስ ረኣዮ ዕሽነት ነጊሱ………..
ናብ ዓለሙ – ናብ ኣድማሱ
ኣመስጊኑ ብሰላም ምምላሱ።

ኵሉ ነብሱ ክቐትል
ሓደ ሓዉ’ቐትል፣ ካልእ ስም ይቐትል
ዓለሞም ምዃና ቅልዕቲ መቓብር፣
ኣይነገሮምን – ስለ ዘይሰምዑ
ዕጅብ’ኳ’ይበሎን ስለኡ ’ናነብዑ፤
ይትረፍ ሓዘን መቕርብ
ኒኽኒኽታ ፈተውቱ
ከም ማህሌት ምሰምዖ
ንቝዛም ቀተልቱ።
ምናልባት ግን ምስኣቶም ምጽናሑ
ብቕርሕንትን ቂምታን ከይምለስ ረሲሑ፣
ብንብዓት መምሰልቲ ተሓጺቡ – ጸርዩ
ከም’ታ ዝተወልዳ ነጺሁ ተደብዩ።

ቦኽረ ገብረየሱስ
መጋቢት-2014