ርእይቶ ኣንበብቲ ኣብ መጽሓፍ “ምጽፋይን ግህደትን ምልካውነት”

ላዛን ዕምቆት ብዘለዎ ኣቀራርባ ነቲ መሪር ታሪኽ ኤርትራ ኣብ ትሕቲ ግዝኣተ ምልኪ ተሪኻ ኣላ። ሓው ረዘነ ተስፋጽየን ነዚ ታሪኽ’ዚ ምስ ተመኩሩኡ ኣዛሚዱ ብብቖዓት ክገልጾ እንከሎ፡ ናይ ሓደ ሰብ ዛንታ ኣይመስልን’ዩ። ናይ ሰለስተ ወይ ኣርባዕተ ሰባት ዛንታ እዩ ዝመስል። ኣብ ሃይማኖት፡ኣብ ስፓርት፡ ኣብ ዓውደ ትያትር፡ ኣብ ገድሊ ናጽነት፡ ኣብ ስደትን ትምህርትን ማእከላይ ተራ ሒዙ ክትርኢ ከለኻ፡ ሓደ ድዩ ብዙሓት የብለካ። ከመይሉ ግዜኡ ኣተኣኻኺሉዎ እንድዒ፡ ግን ኣብ ኩሉቲ መዳያት ብላዕለዋይ ሓላፍነት ማእከላይ ዕማም ዝሓዘን ተጠያቕን ምንባሩ ባዕሉ ምዕራፋት ናይዚ መጽሓፍ ምስክረነቱ እዩ። ካብዚ ታሪኽ ብዙሕ ኣስተምህሮ ቀሲመ ኣለኹ። እቲ ኣውራ ዝመሰጠኒ… ናይ ትማልን ሎምን ሃለዋት ህዝብናን መነባብሮኡን፡ ታሪኽ ሰላማዊ ህይወቱን ከም ከም ዝተዘርገን ብዝርዳእ መንገዲ ምቕራቡ እዩ። እቲ ኣውራ ዘተሓሳሰበንን ብዕምቆት ትርጉሙ ዝማረኸንን ኣቀራርባ ድማ፡ እዚ ሕጂ ምልካዊ ስርዓት ሃኒጹ ዘሎ ሓይሊ፡ ነቶም ብመሰረቱ ናብ ዓወት ዘብጽሕዎ፡ ነቶም ዝዓንገልዎ፡ ጌጋታቱ ዝተጻወሩ፡ ዘልበስዎ፡ ካብ ሓደጋ ዝሰተርዎን ኣብ ክንድኡ ክሓልፉ ዝተወፈዩን ክፍልታት ህዝብና እናወሓጠ ዝገበለ ምዃኑዩ። ኣብ ውሽጢ’ዚ ህዝቢ ተሰቲሩ፡ ነቲ ህዝቢ እናኣማህመነ ዓብዩ። ንሱ ጥራይ ዘይኮነ’ውን ንዖኦም እናመዝመዘ፡ እናሳቐየ፡ እናኣሰረን ክቡር ህይወት እናኣሕለፈን ዝዓኾኸ፡ ሰረታት ምልካውነቱ ድማ ዘደልደል ኢዩ። ሓው ረዘነ ኣብ ምጽፋይን ግህደትን ምልካውነት ነቲ ሓቅታት ብሓቂ ኣቕሪቡልናሎ። ኩሉ ኤርትራዊ ብፍላይ ኩሎም ደለይቲ ፍትሒ ኣህዛብ ድማ ብሓፈሻ ክሰንቁሉ ዝኽእሉ መጽሓፍ ምዃኑ ዕግበተይ እዩ።

ተስፋይ ወልደሚካኤል ደጊጋ

“ምጽፋይን ግህደትን ምልካውነት” ብዝብል ኣርእስቲ፡ ረዘነ ተስፋጽዮን ዝጸሓፋ መጽሓፍ ክነባ ዕድል ረኺበ። እዛ መጽሓፍ’ዚኣ ንብዙሕ ኣርእስታት ዝተንከፈት መጽሓፍ’ያ። እቲ ረዘነ ተስፋጽዮን ዝሓለፎ ናይ ህይወት ጉዕዞ እተርኢ፡ መስትያት’ያ ክትበሃል’ውን ትከኣል።ብዝተረፈ ኣነ ንረዘነ ይፈልጡዎ’ዮም ካብ ዝበሃሉ ብዙሓት፡ ሓደ’የ ክብል እኽእል። ኣብቲ ናይ ስነ-ጽሑፍ ዓውዲ ክርእዮ’ውን ነዊሕ ክምነዮ ጸኒሐ። ከመይሲ ኣብ መድረኽ ወጺኦም፡ ገለ ክብሉ ዓቕሚ ኣለዎም ካብ ዝበሃሉ፡ ረዘነ ተስፋጽየን ሓደ ምኻኑ ስለዝፈልጥ’የ።

ሊ-ካህናት ተክለ-ማርያም ምርካ-ጽዮን

you can order the book at www.semayat.com