ግርማይ የውሃንስ
መርሓባ ክቡር ሓውና ሙሌ፣
ኣብ ዘለኻዮ ሰላም። ኣብ ትሕቲ መሬት ኣብ ጉድጓድ ሰላም ከምዘየለ ዝሕባእ የብሉን። እንተኾነ ግን ”ኣብ ዘለኻዮ ሰላም” ማለተይ ”ኣብ ገነት ስፈር፣ ኣምላኽ ይቀበልካ፣ ኣብ ጎኑ የምብርካ. . .” ዝብሉ ኣብቲ ትኸዶ ላዕላይ ሰማይ ጸጽቡቑ ክትረክብ ዝሃርፍ ምንዮት ከም ዝኾነ ከም ትሑዝ ንውሰዶ። ኣብ’ዛ ጨናዊትን ግዝያዊትን ዓለም ከም ሰብ ግዝያዊ ኮይንካ ከም ሰብ ድማ ሓሊፍካ። እንተኾነ ግን ዘይሓልፍ፣ ተዘካርን ነባርን መዘከርታ ገዲፍካለን ነስመራን ከረንን። ዘይሰርሐን ዘየፍረየን ካኣ ‘ምበር ከምዚ ከማኻስ መይቱ ኣይባሃልን። ህሉው ስራሕ ሰሪሕካ ኩሉ ግዜ ከምትላዓል ክገብረካ’ዩ። ከም ዘይመትካ ድማ ክነግረና’ዩ ሙሌ ነብሲ። እንተኾነ ግን እተን’ኳ ታተ ዘበለኻ፣ ዘዕኮኻኻን ዘጎበዛኻን ከተማታት ኣስመራን ከረንን ዑፍ መስቀል ተቐየርካየን። ብልጭ ኢልካ ጠፊእካየን። ካላኣይ ግዜ ተመሊስካ ሓደርክንን ማዓልክንን ዘይበልካየን ከተማታት ኣስመራን ከረንን ተሻቒለናልካ’የን። መኣትዎኻ ምርዳእ ኣብዩወን ናፍቖተን ክገልጻ ከሪመን ሓግየነኦ። ብሃዋ ሃዋ ዝመልስ ድምጽኻ
መበቆል ፍረታት ኣደ ሽሻይ
ኣባኺ ዝርከብ ዓርኮብኮባይ
ዝበልካላ ከረን፣ እታ ብመልካዓን ሰላማን ዘሕቆንቆንካላ ከረን፣ እታ ናይ ኩሉ ግዜ ሰላም፣ እታ ነባሪ ሰላምታ ዘሕልፍን ዝገልጽን ዜማኻን ፍረነገሩን ዝወቐርካላ ከረን፣ እታ መግለጺ ኣድናቖት ዝኸውን ቃላት ዝሳኣንካላ ከረን፣ መግለጺ ናፍቖት ዝኸውን ቃላት ሲኢናትልካ ከሪማ ሙሌ። ሽታ ማይ ኮይንካያ ሙሌ።
እታ ሞሊቓ ዝወጸት ደርፍኻ. . . . .
ኣስመራ ሓብሓቢት ኩሉ ሓላል ዓድና
ኣላይት ስድራና።
ካብ ማዕዶ ናብ ማዕዶ ለምለም ሜዳ ዓባይ ኣጉዶ
ኣስመራይ ክብል ዶ?. . . . . . . . . .
ዓባይ ኣባ ሻውል ናይ ምዕባለኺ ስፍራ
ኣብኡ ተጀመረ ምዉቕ ማሕበራዊ ናብራ. . . . . . ።
ዝበልካዮ ‘ውን ንሻውል ኣማእኪላ ኣስመራ ናፍቖታን ምስጋንኣን ገሊጻትልካ’ያ።
እታ ኪንዮ ናታ ጽባቐ ዘሎ ናይ ደቃ ጽባቐ ከተድንቕ ብመረዋሕ ድምጽኻ ዝቓነኻላ ኣስመራ፣ እታ ብኩሉ እንትነአን ሂወት ዝዘርኣ ሂወታውያን ደቃ ”ሂወት ጓል ኣስመራ” ዝበልካለን ደቃ ከክንደአን ኮይና ሰላም ክትብለካ፣ ከተመስግነካን ክትናፍቐካንስ ሓዲራ ውዒላ። ሓግያን ከሪማን ከማን። ዳሃይካ ጠፊኡዋስ ተሻቒላ ከማን።
መልክዕ ምስ ቁም ነገር ኣምላኽ ዝዓደላ
ፍጹም ዘይትምኖ ማዓር ጸባ ፍቕራ
ጥሪ ዝሃበኒ ሂወት ጓል ኣስመራ
ሂወት ጓል ኣስመራ. . . . . . ! እናበልካ ደቃ ዘድነቕካላ ኣስመራ ብዙሕ ሰላም ኢላትካ።
ሂወታውያን ደቃ፣ እተን ዘዜምካለን፣ እተን’ኳ ናይ ሹዑ ባዓል ሂወት ድማ ተሓጒሰናልካ። ደጊምካ ሂወት ክትብለለን፣ ደጊመን ክሰምዓኻ ተጸብየን። ዋላ’ውን ሽም ቀይርካ ክትመጸን ከይተረፈ ተሃንጥየን። መረዋሕ ድምጽኻ ክሰምዓ ተጸብየን። ኣስመራ፣ ከረንን ባዓል ሂወትን ኣጣይቐናልካ። ዳሃይካ ግን ኣይረኸባን። እዘን ናይ ሎሚ ‘ኳ ወሪዱወን ኣየናይ ኢለነኦ ሙሌ ነብሲ ጨርባሕባሕ ጥራይ’ዩ ለሚዱ ርእሰን። ካብ ብኩሉ እንትነኡ ምስትምቓር ድማ ፌስቡክ ከፊተን ”ላይክ፣ ናይስ ፒክ” ክብላ’ዩ ዝቐለንን ዝብረሀንን። ኣብ ኩሉ የለዋን ሙሌ ነብሲ።
ባዓል ሂወት ቀደም ምስ ሂወተን፣ ኣስመራን ከረንን ግን ኣብ ዝኽረን ኣለኻ ሙሌ ነብሲ። ቅድሚ ዕረፍትኻ ዝገበርካዮ ክብረትካን ክብረት ሰብን ዝሕሉ ጽፉፍ ዕላልካ ምስ ሰምዓ ተሓጒሰናሉ’የን። ኣብ መወዳእታ ድሕሪ ነዊሕ ምጥፋእ መርድእካ ምስ ሰምዓ ግን ናፍቖተን ቢኢሱስ ሓዘነን ገሊጸናልካ ኣለዋ ሙሌ ነብሲ። ዘዜምካለን ዜማታት ኣብ ከብሕታት ዝኽረን ኣቐሚጠን ድማ ”ኣብ ዘለኻዮ ሰላም” ይብላኻ ኣለዋ።
