ሊዮ ቶልስቶይ
• ኣብ ደቡባዊ ኣሜሪካ በቶም ቀዳሞት ዓሌታት ዝዝንቶ ኣፋዊ ዛንታ
እግዚኣብሄር ሰብ ፈጢሩ። ኣብቲ እዋን ወዲ ሰብ ኣብ ምድሪ ንምንባር ስራሕ፡ መዕቆቢ፡ ክዳንን መግብን ኣየድልዩዎን ነበሩ። ሽዑ እግዚኣብሄር ዝፈጠሮም ሰባት ኩሎም ዝሞቱሉ መዓልታት ይፈልጡ ነበሩ። ሕማም እንታይ ከም ዝኾነ’ውን ይፈልጡ ኣይነበሩን።
ካብ ዘመናት ሓደ መዓልቲ እግዚኣብሄር ናብ መሬት ወረደ። ደቂ ሰባት ከኣ ኣብ ዓሙቕ ሓዘን ተሸሚሞን ጸንሕዎ። ኣብ መንጎ ደቂ ሰባት ሰላም ኣይነበረን። ኩሉ ብዛዕባ ነብሱ ኣዚዩ ይጭነቕ ነበረ።
ሽዑ እግዚኣብሄር ኣምላኽ ንነብሱ ከምዚ በለ “እዚ ኩሉ ዝኾነ ደቂ ሰባት ብዘይ ዋላ ሓደ ሓገዝ ነብሶም ኪኢሎም ክነብሩ ስለዝኸኣሉ’ዩ” በዚ ከኣ ደቂ ሰባት ብዘይ ስራሕ ክነብሩ ከም ዘይብሎም ፈጣሪ ኣዘዘ። ኮነ ድማ። ደቂ ሰባት ከኣ ካብ ሙቐትን ቁርን ክሃድሙ መጽለሊ ክሰርሑ ጀመሩ። ካብ ጥምየት ክገላገሉ ከኣ ዘራእቲ ክዘርኡ’ ፍረታት ክኣርዩ ጀመሩ።
“ስራሕ ንደቂ ሰባት የቀራርብ’ዩ። ወዲ ሰብ መንበሪኡ በይኑ ክኣልዩ ኣይክእልን’ዩ፡ ወዲ ሰብ እኽሊ ንበይኑ ዘሪኡ ንበይኑ ከእትዎ ኣይክእልን’ዩ፡ ወዲ ሰብ ባዕሉ ጡጥ ባዕሉ ክዳን ክገብር ክሽገር’ዩ፡ ደቂ ሰባት ብመጠን’ቲ ብሓባር ዝሰርሕዎ፡ ዝሓሸ ውጺኢት ክረኽቡ ይኽእሉ’ዮም፡ በዚ ከኣ ኣብ መንጎኦም ሰላምን ፍቕርን ክዓስል’ዩ” ክብል ጎይታ ኣዘዘ።
ብመቑጸሪ ግዜ ዘመናት ተወንጨፉ። እግዚኣብሄር ከኣ ደቂ ሰባት ብሓጎስ ይነብሩ ምህላዎም ንምርግጋጽ ዳግማይ ናብ ምድሪ ወረደ። ኣብቲ እዋን እቲ ከኣ ወዲ ሰብ ካብ ዝኾነ ግዜ ንላዕሊ ሰላሙ ሃዲሙ ጸንሖ። ደቂ ሰባት ኣብ ነኣሽቱ ጉጅለታት ተመቓቒሎም ንሓድሕዶም ክናቖቱ ጸንሕዎ። እቲ ሓደ ጉጅለ ዘፍረዮ እቲ ካልእ ጉጅለ ክምንጥሎ ላሕ ክበሃሉ ጸንሕዎ።
እዝግዚኣብሄር ኣምላኽ ከኣ ኣዚዩ ሓዘነ “ ወዲ ሰብ ዝሞቶሉ መዓልቲ ኣይፍለጥ፡ ኣብ ዝኾነ እዋን ነብሱ ካብ ስግኡ ተፈላልያ ትኺድ” በለ። ኮነ ድማ።
እንተኾነ እቲ እግዚኣብሄር ዝሓሰቦ ከይኮነ ተረፈ። ደቂ ሰባት ንሓድሕዶም ክቀታተሉ ጀሚሮም። ሞት ከም መፈራርሒ መሳርሒ ብምጥቃም ከኣ ሓያላት ንድኹማት መዝመዝዎም። ኣብ መንጎ ደቂ ሰባት ከኣ ጽልኢ ሰፈነ። ህይወት ከኣ መንጠሊና ሓዘን ተኸድነት።
እዝጊኣብሄር ኣምላኽ ኣብ መንጎ ደቂ ሰባት ሰላምን ፍቕርን ንምስፋን ድማ ሕማም መሃዘ። ከምዚ ከኣ በለ “ ደቂ ሰባት ንሕማም ዝተቓልዑ ከም ዝኾኑ እንተፈሊጦም፡ ጥዑያት ሰባት ንሕሙማት ክሕግዙ’ዮም። ክከናኸኑዎም’ዮም። ኣብ መንጎኦም ከኣ ፍቕርን ምትሕልላይን ክህሉ’ዮ” በዚ ከኣ ሕማም ኣብ መንጎ ደቂ ሰባት ፍቕርን ሰላምን ንምስፋን ዝተፈጥረ ናይ መወዳእታ ምህዞ ኮነ።
በዚ ከኣ እግዚኣብሄር ሕማም ብምፍጣሩ ኣብ ደቂ ሰባት ሰላም ኣንጊሱ እንተኾይኑ ንምርግጋጽ ናብ መሬት ወረደ። እንተኾነ ደቂ ሰባት ኣብ ዓሙቕ ናይ ሓዘን ባሕሪ ጥሒሎም ጸንሕዎ። እቶም ድኹማት ነቶም ሓያላት ሕሙማት ክ ኣልዩ ጸንሕዎ። እቶም ድኹማት ክሓሙ እንከለው ግን ዝኣልዮም ኣይነበረን። ድኹማት ክሓሙ እንከለው ሕማም ከየመሓላልፉ በቶም ደቂ ሰባት ይንጸሉ ነበሩ። ብስራሕ ዝደኸመ ኣካሎም ሕማም ክጻወር ዘኽእል ዓቕሚ ኣይነበሮምን።
እግዚኣብሄር “ወዲ ሰብ ስራሕ፡ ሞትን ሕማምን ናይ ፍቕሪ ምንጪ ምዃኖም እንተዘይፈሊጡ ብሽግር ይመሃር” ብምባል ዳግማይ ከይምለስ ናብ ጽርሃ ኣርያም ወጸ።
ድሕሪ ክንደይ ዘመናት ይኸውን ውሑዳት ደቂ ሰባት ነዚ ጉዳይ በቲ ኣምላኽ ዝሓሰቦ ተረድእዎ
ስራሕ፦ ናይ ሓለቓን ተኣዛዝን፡ ናይ ጎይታን ባርያን፡ ናይ ኣገልጋልን ተገልጋልን ርክብ ዘይኮነ ኣብ መንጎ ደቂ ሰባት ምቅርራብን ሓጎስን ዝፈጥር ናይ ጥንቲ ግብሪ ከም ዝኾነ።
ሞት፡ ሓደ ነቲ ሓደ እናፈራረሐ ዝነብረሉ ዘይኮነ ነብሲ ወከፍ ወዲ ሰብ ነቲ ተወሲኑ ዝተዋህቦ፡ ዓመታት፡ ኣዋርሕን ሰሙናትን፡ መዓልታትን ሰዓታትን ብፍቕርን ብሓድነትን ንኸሕልፎ ዝተፈጥረ ከም ዝኾነ።
ሕማም፡ ኣብ መንጎ ደቂ ሰባት ፍልልይን ምንጽጻልን ክፈጥር ዘይኮነ ምትሕግጋዝን ምትሕልላይን ንምስፋን ብኣምላኽ ዝተዋህበ ህያብ ከም ዝኾነ።
