ከሜሎኻ ሳህለ?
ዪየህ…ነዊሕ ኰይኑ ካብ ንፈላለ፥
ድሕሪ ዓመታት ካብ ዓሰብ መጺእካ
ብቐዳማይ’የ ሰሚዐ ዓዲ ከም ዘሎኻ፡፡
ሳህለ ከመሎኻ’ሞ?
ደቅኻ ኸ ጎቢዞም ዶ?
ጠፊአካ ኣመና ኣይትሓዘለይ
ሰብ ኣይፈልጦን’ዩ ዘለኹዎ ባዕለይ፥
እቶም ስድራና ንባዕሎም
ስደት ማለት ገንዘብ ዝሕፈሶ እዩ ዝመስሎም፥
ዝዀለሱዎ ከይወሓጡ
‘ስደድ’ ጥራይ’ዮም ዝፈልጡ፥
ተረዲኡካ’ሎ!? ኣብ’ዚ
ስራሕ ክትደሊ ብገንዘብ
ክትሕከም ብገንዘብ
ቈልዑ ክተምህር ብገንዘብ
(ኦ ማይ ጋድ!)
ኣይትኣምንን፡ ዩናይድድ ስተይድስ ማለት ከቢድ’ዩ
በቃ ኵሉ ብገንዘብ’ዩ፡፡
በጃኻ ነታ ለተብርሃን ኣረድኣያ
ምሳይ ፈጺማ ኣይትረዳዳእን’ያ፥
ልክዕ’ዩ፡ ጸገም ዝግባኣ’ይኰነትን
ግን ዕድል ኣይገበረትን – ፒርየድ!
ጓል እገለ ኤውሮጳ ከስግር
ወዲ እገለ ካብ ሊብያ ይድውል
ሺት! ኣነ ናብ ክንደይ’የ ክምቀል!?
ብዝዀነ ዓድና ከመይ ኣሎ?
ኣግሪካልቸር ይድንፍዕ ዶ’ሎ?
ብዘይ መጠን ስደት ጸሊእናዮ
ዓድና ናፊቕናዮ፥
ክሳብ ንራኸብ ግዜ ምስ ተቐየረ
ኣብ ዝጠዓመካ ጸሓፈለይ ሳህለ፡፡
* * * * * *
ሳኺቱለይ ኣየናይ’ኳ’ይለዮ
ብኣምሆ… ከም’ዙ ናይ ናፍቖት ገይረዮ፥
ኣደይ ትብለጽ ጎፍ ኢለናኒ
ከም ኣመለን ደሃይካ ምስ ነገራኒ
“ግርም ምህላወይ’ሞ ንገርኦ
ስልኪ ኣብ ዝሃረመሉ
‘ወረቐት ስደድ ኢሉካ’ በላኦ”
ኢለየን ናብ ሓዳረይ ጐይየ
ምስ ነገራኻስ ሻዓ ሰዲድካለይ
ኣይረሳዕካን ግዲ’ንታ’ኻዓየ?
እምበር በዙ ሎሚ ዶ ወረቐት መድለየ ፥
ኣመንጉው ኣቢልና
ድምጽኹም ክንሰምዕ መኣስ ጸሊእና
ከይነሰክፈኩም ወሰን ወሰን ንኸይድ ኣኻዓየ፡፡
ብዝዀነ ጥዕናኻ ከመይ ትኸውን?
ስደት ከ ከመይ ይገብር?
ወረቐትካ ምስ በጽሓኒ ሕጕስ ኢለ
ኣብ’ቱ ንባብ ግዳ ቁሩብ ተሸጊረ፥
“ድሽክነሪ ሒዝኪ ቕረቢ”
ምስ በልኩዋ ነታ ዓባይ ጓለይ
እና ሰሓቐትኒ ግሩም ተርጒማትለይ፡፡
ኣብ ኢመሪካ ተዋሒጥኩም
ቋንቋ፡ ባህሊ፡ ታሪኽ እንተረሳዕኩም
‘ታይ ሕማቕ ኣለዎ፡ ዘይ ስደት ነዊሑኩም፡፡
እወ…ህ፡ ከምቱ ዝበልካዮ’ንድዩ
ስድራ ድኣ ንዓኻ ምስ ሃበ ኸ ንመን ሂቡ
ይጽገቡ’ይጽገቡ
ወትሩ ምስ ሰሓቑ
ወትሩ ምስ መረቑ፡፡
ተብርሃን ሓውትኻ ውን ከምኣ’ይላ’ላ
ብኽፉእ ዘልዕላ ሓደ’ኳ ዘይብላ
እንተ ዀረየትልካስ
ኣንታ ይዓየ፡ ሓንቂቓ – ኣቕሪባ’ንድኣላ!
ድሓር ክኣ፡ ወዮ ዃዕናን ሰብኣያ
ሲና ምስ ረገጸ ኣብኣ’ንድዩ ሓቒቑ
(…እህም) ተብርሃን ድኣ ጸግዒ’ባ ትደሊ
ሎሚ ሎምስ እንድዕሉ ነብሳ’ኳ ርሒቑ፡፡
እምበር ሓቅኻ
ንመን ከ ጥዒሙዎ፡ ይሓስመካ’ወ
ውሉድ ኣይረግአ፡ ወላዲ’ይተቐድወ፡፡
ዓድና ዘላቶ ሑንቋዕ ኣይትርእዮ
ውለድ – ኣይትለድ ኵሉ ወዮ፥
ወዲ ሃለቃ ሕድሩ ምስ ወዲ ዘርእሰናይ
ጸሓይ ዕራብ ዓዲ ከም ዘይተራእዩ
ህ? ተበልካስ
ደርሆ ንቆ ኣትዮም ግርሁ ስርናይ፡፡
መርዓ ዝኣኸለት ነይራ ጓል ምዘሎ
ምስ ጓል ዒስባኖ ወደቦኻ’ስማዒሎ
ምህሮ ወዲአን ሳዋ ምስ ወረዳ
ከይሓደራ ከሰላ ተራእየን ይብሃል ኣሎ፡፡
ድሓር… ቈልዑ ዝቝርጥጦም፡ ዝምህሮም ስኢኖም
ተጸይቖም መስተን ገለን ኰይኖም፥
ሰጋብር ሓወይ’ኳ’ቱ ንእሽቶ ወዱ
ጸጕሩ ተዳዕቢሉ ከም ሰናዱ
ከየፍረጨ ሽጋራ ለሚዱ
ሰጋብር ዓቢዱ ዓቢዱ ዓቢዱ
ዛ ንእዲ ሒዙ ብጓሂ ነዲዱ
እቱ ቘልዓ ንምሸቱ…ዋእ
ድሓን ይእቶ ንሱዳኑ ኸይዱ፡፡
እተን ኣዋልድ ውን
ውንጭሕቲ ሰፍየን ይኽኣላ ኣይኽኣላ
ቀልቢ ኸይገበራ፡ ጡብ ከየብቈላ
ንሀዋልካ ንቒድምአን ይዕዘራ፡፡
ሓቅኻ ይዓየ
ኣብ ዓሰም ሰለስተ ዓመት ገይረ
ስድራ ኸይረኣኹ እምንሓጀር ተቐይረ
ድሓር’የ ዓዲ ኣትየ እግረይ ሰይረ፡፡
ከምኣ’ይሎም ኣለዉ ዓሰም ዶ እምንሓጀር ይብሉ
ንሕና ክኣ ብትእዛዞም ዶብ ንሕሉ
ንሕሉ – እንታይ ከም ንሕሉ
‘ጸላኢ’ ይብሉና ድሃይ ንዘይብሉ
ዝወጽእ እምበር ዝመጽእ ዘይብሉ
ክንሕሉ ውዒልና ንሓድር ክንሕሉ፡፡
“ምእንቲ መጎጎ ትሕለፍ ኣንጭዋ” ቢልና
ኣንጭዋ ንህልኽ ዓዲ ውዕል ኰይና፥
መጎጎ ስኣን ዘርስና
ስኣን ዝታውና
ዘይመልክዓ – ዘይግርማኣ
ኰይና ሰፈር ሳሬት ምስ ዓለባኣ፡፡
ስቕ ኢልና ንሕሉ ይዓየ
ዓንዴል ንሓቍፍ – ዘይፍቀር ነፍቅር
መኣስ’ሞ ዓሺና፡ ከብዲ ሰብኣይ ክንደይ’ዩ ዝዓቍር?
ሕርሻ…ድሓን’ዩ
ናብራ ቐደምና ዘይ ንሱ እዩ፥
ግዳ ዘይከም ቀደም
ኣዝርእቲ ይናፍቑ ሓመዶም
ኣብዑር ብድቃስ ሰቢሖም – ሞንጒዶም፡፡
ገደናን ስግር ሩባን መን ክኸዶ
ዛ እግሪ ዓዲ – ዘርኢ’ንጣጢዕ’ኳ ንጋዶ!
ይዓየዋ ኣብኡ ኸለኻ
ከይጽላኣካ’ምበር ከጻውተካ፥
ድሮ’ዛ ትማሊ መድሂነ ኣለም
ዝደቀሰ ዘረባ ሰሰንቂሩ
ማሕራይ ይተዃትኾ ንተስፋኣለም፡፡
ትዝክሮ’ንድኻ ፊት ታሕታይ ዓዲ ዘሎ ግራውቲ
ኣብታ ዓባይ ደረት – መሻይኖ’ንስቲ፥
ማሕራይ ብጸርፊ ምስ ዓብለሎ
ስፋኣለም መሸም እሳት’ዩ
ኣ’ቂድሚ ሰበይቱ፡ ብበትሪ ተደሰቖ! ተበሎ! ተቦሎ!
ከምዛ ድኑስ እናተገምሰሰ
ነጸልኡ’ልዒሉ “እንተዘይከሲሰ!”
ውዕል ኢልናያ ክንልምኖ
መጠረሽትኡ ኣቦኻ ቐሺ ዓንድሓይራት ኣስሚዖሞ
ንተስፋኣለም ገኒሖም
ብዝዀነ፡ ንዕኡ’ንካ ባህ ክብሎ ኣምበሳ’ምሲሎሞ፡፡
ክላ በል ዘረባ’ንዊሐልካ ይዓየ
ሎሚ ተራኸብና ኢለ’ንድኣየ፥
ንደቅኻ “ኣኻዓየ ሰላም ኢሉኩም!” በሎም
ካብ ሰረቶም ፍጹም ኣይተግልሎም፡፡
ኣንታ’ኻዓየ
ብምህሮ ኸም ብዕራይ ከተማ ዓፍቲኹም
ሎሚ ዶ ኻባና ልቢ ደሊኹም፥
ግናሲ፡ ጽባሕ ከይጋግየኩም ወይ ከይትጋግዩዎ
ንሕሉፍኩም እምብዛ ኣይትጸየኑዎ፡፡
ንሰብ እንታይ ሓይሉ እንትርፎ ሕሉፉ?
ዞም ኣውቲስቲ’ኳ ከም ንፋስ እና ሃፈፉ
ንምንታይ ድዮም ስቦክዮ ምርኣይ ዘይገድፉ?
መጋቢት 2016
ቦኽረ ገብረየሱስ
