ከመይ ከመይ ዳኣሉ እዚ ጉዳይ? ወረ ከመይ ከመይ እዩ እዚ ነገር? ናይ ባሓቂ ድዩ? ኣቱም ዓድና ኮኾብ እምበር ወዲቓትና! ኮኾብ ስነጥበብ ኤርትራ! እታ ኩሉ ዘምሕረላ! እታ ሸውዓተ ቐመም ኣብ ጉዕዞ ተዋሰኦ ሃገርና ከምዘይትድሕንን ከም ዘይትምለስን “ራዕ!” ኢላ ወዲቓ።
ከመይ ከመይ ዳኣሉ እዚ ጉዳይ? ወረ ከመይ ከመይ እዩ እዚ ነገር? ሓቂ ግዲ እዩ “ኮኾብ ‘ውን ይወድቕ’ዩ!” ዝተባህለ። ሓቂ ካኣ ክኸውን ኣለዎ’ምበር! እዚ ዶ ዘይ’ዚ!? እታ “ስም ስኢነላ” ኢለ ቅድሚ ሳምንታት ዝጻሓፍኩላ ወይኒ፡ እታ ዕላላ ወይኒ፡ ጠባያ ወይኒ፡ እታ እምኒ ኣንጎሎ ናይ ተዋሰኦ ሃገርና፡ እታ መልክዕ ተዋሰኦ ሃገርና፡ እታ ንፊልምን ተዋሰኦን ሃገርና ልክዕ ከም ስማ ዘቢበ-ወይኒ ዘጥዓመቶ ወይኒ እናረኣናያ ምሉቕ ኢላትና-ከም ዋዛ።
ምእማኑ ዘጸግም ዓይነት ኣሞላልቓ ሞሊቓ ወይናረግ ቤኪ. . .እታ’ኳ ካብ ሃገርና ወጻኢ ኣብ ከባቢና ከይተረፈ ከም ኮኾብ ድምቕቲ ወይኒ ሞሊቓ! እቲ ድሕሪ ሓያል ምቖት ብሓያል ቀዝሒ ክልብልበና ዝቐነየ ክሊማ ሱዳን ናይ ሓዘን ተሳታፍነቱ ዘረጋግጽ ዘሎ ክመስል ብሓያል ንፋስ መሬት ከጨንቓ ኣርፊዱ። ዘይሰንበደ የለን! እቶም “ንዒ ምሳና፡ ንዒ ናባና፡ ንዒ ገዛና. . .” እናበሉ ክንከባኸቡዋ ዝሓገዩ ሱዳናውያን ፈዚዞምን ቀዚዞምን። ባዓልቲ ገዛ ተጸሊላ። ኩሎም ክጽብጽቦም ኣይክእልን’የ። እቶም ቀንዲ ግን ትእለየሉ ገዛ ፈልዮም ኣብ ኩሉ ንጥፈታታ ካብ እግራ ዘይተፈልዩ ስድራቤት ዓብደልስምዕ፡ ኣብ ውሽጢ ሽዱሽተ ኣዋርሕ ትግርኛ መሊኹ ካብ ጎና ዘይተፈልየ ኣይመን፡ ኣብ ምእላያ ለይትን ማዓልትን ከይደቀሰ ብፍላይ ሎምቅነ ሕማቕ ኣብ ዝቐነየትሉ ቕነ ብሓይሊ ዝተዋሰአ ካልድ፡ ሕሉፍ ሓሊፉዎ “ሬሳኣ ኣብ ምዕራፉ ከየብጻሕኩ ኣይዓርፍን እየ” ብምባል ሎሚ ፍርቂ ማዓልቲ ሬሳ ሒዙ ብማኪና ነስመራ ዝተበገሰ መሓመድ. . .መዛረቢ የብሉን። ብኸምዚ ክግለጽ ስለዘይካኣል ምምርሳሕ ከይከውን።
ማዓት ተሌፎናት’ዩ! ኢትዮጵያውያን ፈተውትን ኣድነቕትን(ካብ ሱዳንን ኢትዮጵያን) ሓዚኖም። ምግላጹ ስለዝኸብድ ግን ሰንቢዶምስ ፈዚዞምን ቀዚዞምን ምባል ይቐልል። የቕዝዝን የፍዝዝን እንድዩ! ዝኽሪ ቅንያት ሰሓቕ ገና ከይሃሰሰ ንብዓት ኣርኪቡና። ክልተ ዓይነት ንብዓት ነቢዕና-ናይ ሳሓቕን ናይ ብኽያትን። እታ ኣብ ዝሓለፈ ቕነ ኣኪባ ዘስሓቐትና ወይኒ ሎሚ ረፍዲ ኣኪባ ኣንቢዓትና።
ነቢዕናላ ንብዓት ስንብታ! እታ ህላውነታን ቀጻልነት ሂወታን ከተረጋግጽ ምስ ሞት ኣብ ሓያል ጥምጥም ዝቐነየት ወይኒ ኣብ መወዳእታስ ተሰኒፋ። ተመኒዩዋ ግዲ ኮይኑ ኣዘንጊዓ ናብ ሞት ኢዳ ሂባ። እታ ጎይታ ሓቦን ሞራልን ወይኒ ቃንዛ ግዲ በዚሑዋ፡ እታ ጎይታ ተስፋ ወይኒ መሪሩዋ ተስፋ ግዲ ቆሪጻስ ስዕረተ-ሞት ተቐቢላቶ። እታ ሰሓቕን ጸወታን ዘይፍለያ ወይኒ ብርኡይ ኣፋ ተዓቢሱን ተዓጽዩን። ዓይና ተዓሚቱ። እታ ኣፍካ ዘይተኽድን ዕላል ዘይትስእን ንጻዕዳ ወረቐት’ውን ዕላል ከምዝርከቦ እትገብር ወይኒ ዕላል ተሳኢኑዋ ዕላል ኮይና።
እታ ዕላላ ክንሰምዕ ኣፍና ሃህ ዘበለትና ወይኒ ኣፍዚዛን ኣርሚማን ኣፍና ኣኽዲናትና። እታ ኣስሒቓ ዘንባዓትና ወይኒ ኣብክያ ኣንቢዓትና። ክልተ ዓይነት ንብዓት ኣንቢዓትና። “ሕጂ ዶ እዛ ሕማም እዚኣ ገዲፋትኒ ባህ ከይብላ እዛ ዓለም ክስሕቕ’የ” እናበለት ከም ሕሱም ስሒቓ። ንሳ ክትላገጽን ከተስሕቐናን ንሕና ክንስሕቕን ክንፈዝዝን መነና እዩ ሕሙም ክንብል ኣሕሲባትና። ቃንዛኣን ስቓያን ብውሽጣ እናወሓጠት “ባህ ኣይበልኪ ዓለም!” ኢላታ። ንጭንቀትን ምኒንን ዲል ከይሃበት ኣብ ሞራልን ሓቦን ተስፋ ከይቆረጸት ክሳብ መወዳእታ ተቓሊሳ። እታ ዕለተ ልደት ጎይታና እየሱስ ክርስቶስ ምስ ደቃ ዝጸምበለት ወይኒ ጥምቀት ከየርከበት ኣብ ድሮኣ ኣርሒቓ ገይሻ። እዛ ዕረፍታስ ምስ ደቃ ዳኣ ዘይትኾነላ ዝነበረት! “ሞትካስ ትመጻ’ምበር ኣይትመጸካን’ያ” ክባሃልስ ሓቂ እባእዩ። ከምኡ እባእያ እዛ ዓለም ትማሊ ነይሩስ ሎሚ የለን!? እታ ኣብ ዕለተ ሕዳር ጽዮን “ኣነ ዝምነ ንዓመታ እዛ እዋን ከምዛ ቕነ” ኢላ ዝተመነየት ወይኒ ኣብ ፍርቂ ዓመትን ፍርቂ ጉዕዞን ተኾሊፋ። ነታ “ባህ ኣይበልኪ ዓለም!” እናበለት ክትቃለሳ ዝጸንሐት ዓለም ሎሚ ወጋሕታ “ዳሓን ኩኒ ዓለም” ኢላ ተሰናቢታታ። እታ ብሕማም መንሽሮ (ካንሰር) እናተሳቐየት ግን ካኣ ብሞራል ክትቃለስ ዝጸንሐት ወይኒ ነብሰ ስጋኣ ተፈላልዩ። ነፍሳ ንዓዲ እዝጊሀር ስጋኣ ንዓዲ ትውልዳ ኣፋኒናዮ። ሬሳ ወይናረግ ሃይለ(ቤኪ) ዝሓዘት ኣምቡላንስ ሎሚ ፍርቂ ማዓልቲ ጥሩምባ እናነፍሐትን ብናህርን ካብ ዓይንና ተሰዊራ። ዳሓን ኩኒ ወይኒ! ብሰላም ዕረፊ ወይኒ ሳሓቒት! ፈጣሪ ኣብ ገነቱ ይቀበልኪ ወይኒ!
ግርማይ ዮሃንስ
