ደራሲ እስጢፋኖስ ገብረሚካኤል (ሃንችባክ)
መበል 93 ክፋል
ዶክተር ኣብርሃም ኣብታ ጸባብ ሸላ ንገለ ካልኢታት ዘዘው ድሕሪ ምባል ኣብ ምድሪቤት ኮፍ በለ። ፍርሒ ወይ ስንባደ ዝብሃል ኣይነበሮን። ኣስናቀ ተመሊሱ ክሳዕ ዝመጽኦ ካብ’ቶም ባዕሉ ዝወደቦም ሓሙሽተ ኣባላት መን ክኽሕድ ከም ዝኽእል ንምግማት ንነፍስወከፎም ኣብ ገምጋም ኣእተዎም። በብሓደ ድኹም ጐድንታቶምን ብልጫታቶምን ክምርምር ጸኒሑ፡ ኣብ ታደሰ ምስ በጽሐ ዝን በለ። ግንባሩ ኣዕጢሩ ኣዕሚቚ ሓሰበ። ታደሰ መስተ ዘዘውትር፡ ገፋሕፋሕ ዝፈቱ፡ ህርፋን ሓላፍነት ዝነበሮ ኮይኑ፡ ብደርግ ማርክስነት ክመሃር ንዓመት ንቡልጋሪያ ተላኢኹ ጸኒሑ ኣብ ቀረባ ኣዋርሕ’ዩ መጺኡ። ካብ ቡልጋርያ ድሕሪ ምምላሱ ምስ ብርክት ዝበሉ ሓለፍቲ ክራኸብ ከም ዝጀመረ ዘኪሩ ርእሱ ነቕነቐ።
ዳግማይ ሕስብ ኣቢሉ፡ “ግን ምስ ሰበስልጣን ዘይሩ’ባ መስተ ሰትዩ’ባ ኢለ ብዓይኒ ጥርጣረ ክርእዮ ጌጋ’ዩ። በየናይ ሜላ ደኣ’ሞ ሓበሬታ ክእክብ? ከም ናቶም ሰብ ክቕበሉዎ እንተኾይኖም ንዓታቶም ክመስል ኣለዎ፡” ኣብ ዝብል መደመደምታ በጽሐ። ኣብ ልዕሊ ታደሰ ዝነበሮ ጥርጣረ ሰሪዙ ድማ ነቶም ዝተረፉ ኣባላት ኣብ ምፍታሽ ኣተወ። ኣብ ኩላቶም ኣበር ክረክብ ግን ኣይከኣለን።ስለያዊ መርበብ ጸላኢ ክፍጽሞ ዝኽእል ስልኳ፡ ምስላም ናይ ገለ ተጋደልቲ፡ ኣብ ግምት ከየእተዎ ዝጸንሐ ናይ ኣሰራርሓ ጕድለት፡ ወይ ደቂቕ ነገራት ዝመበገሲኡ ጥርጣረ ዝፈጠሮ ሳዕቤን ክኸውን ይኽእል’ዩ ኣብ ዝብል ትንታኔ ተጸሚዱ ነዊሕ ተመራመረ። ዝኾነ ፍንጪ ክርክብ ግን ኣይከኣለን። ኣብ ሌ/ኮለነል ቦጋለ ክበጽሕ ከሎ ማዕጾ ሸላ ተኸፍተ። ኣስናቀ ኣንበሳ በረኻ ክመስል ኣብ ልዳት ሸላ ጠጠው ኢሉ ንገለ ካልኢታት ምስ ጠመቶ፡ “እንታይ ሓሲብካ ዶክተር?” ክብል ተወከሶ።
“እንታይ እየ’ሞ ክሓስብ? ሃንደበት ካብ ስርሐይ ሒዝኩምኒ መጺእኩም። መምጽእየይ ግን ፈጺሙ ክርድኣኒ ኣይከኣለን።”
ኣስናቀ በተን ፍርይ ኢለን ኣስናኑ እናሰሓቐ፡ “ዶክተር! ባዕልኻ እንተ ተዛረብካ ይሓይሽ። ሕጂ ንጹህ ሰብ ተመሲልካ ከምኡ ክትብል ከለኻ ንጹህ ሰብ ስለ ትመስል ንኻልእ ሰብ መጋገኻ። ተሓባባሪ ሻዕቢያ ምዃንካ ኣጻሪና ፈሊጥና ስለ ዘለና ግዜ እንተ ዘይቀተልካ ዝሓሸ’ዩ። ሓንሳብ ኣብ መንጋጋ ኣንበሳ ከም ዝኣተወት ስጋ መውጽኢ የብልካን። ስለዚ፡ ግዜ ኣይትቕተል፡” በሎ።
“ንሻዕብያ ዘይፈልጣ ከለኹ ብኸመይ ተሓባባሪ ክኸውን እኽእል?’
“ክሳዕ ሕጂ ከም ምሁርን ዶክተርን መጠን ኣኽቢረካ እየ ጸኒሐ። ሕጂ ግን በዓል መን ከም ዝተሓባበሩኻ ቀልጢፍካ ክትዛረብ ፍቓደኛ እንተ ዘይኴንካ ኣንጻር ድሌተይ መርመራ ክጅምረልካ ክግደድ’የ። እዚ ከይኮነ ኸሎ ግን ነፍስኻ እንተ ዘየሕሰምካ ዝሓሸ’ዩ። I am sorry! The game is up! ስለዚ ግዜ ሂበካ’ለኹ፡ ሕሰብ!” በሎ ድምጹ ኣትርር ኣቢሉ።
ኣብርሃም ቅጭጭ ኣይበሎን። “ሓቂ ንምዝራብ ኣነ ዝፈልጦ ነገር የብለይን። ምናልባሽ ግጉይ ሓበሬታ ከይከውን ኣጸቢቕካ ኣረጋግጽ። ንጹህ ሰብ ምዃነይ’የ ዝፈልጥ። በንጻሩ ዝዛረብ ሰብ እንተ’ሎ ኸኣ ኣብ ቅድመይ ክተቕርቦ ትኽእል ኢኻ፡” ዝብል ደረቕ መልሲ ሃቦ።
ኣስናቀ በቃጫጭ ካርካር ኢሉ ሰሓቐ። መነጽሩ ኣውጺኡ ኣዒንቱ ድሕሪ ምድራዝ፡ “እዚ ግዜኡ ዘሕለፈ ናይ ሻዕብያ ታክቲክ ምሳይ ኣይሰርሕን’ዩ። ገለ ዘይተማህሩ ገርሀኛታት ብናይ ሻዕብያ ፖለቲካን ሽሕጣንን ተታሊሎም ቍልቍል ዝኣፋ ኣሉ እንተ በሉ ዘገርም ኣይኮነን። ንስኻ ግን ተራ ሰብ ኣይኮንካን። ከም ምሁር መጠን ንዅሉ ክትግምግምን ክተገናዝብን ትኽእል ሰብ ክነስኻ፡ ሕጻብ እግርኻ ዘይኣኽሉ ተገንጸልቲ መሳርሒ ክገብሩኻ ኣይምተገብኦምን ነይሩ። ብዙሕ ዕድል ዝጽበየካ ዘሎ ሰብ ኢኻ። ኣብዮትና ኸኣ ብባህሪኡ ኣራሚ’ምበር ቀጻዒ ከም ዘይኮነ ደጋጊሙ ብግብሪ ኣመስኪሩ እዩ። Therefore, it’s not too late! ብእዋኑ እንተ ተገላገልካ ይሕሸካ። እዚ ክብለካ ከለኹ ከም ሓውካ መጠን’የ ዝምዕደካ ዘለኹ። ክትርድኣኒ ፈትን፡” ብምባል ክሽሕጦ ፈተነ።
ኣብርሃም ምስሉይነቱ ቅጭ ኣምጺኡሉ፡ “ዝበልካዮ ኵሉ ይርድኣኒ እዩ። ኣይትሓዘለይ ግን ዝፈልጦ ነገር የብለይን። ዝፈጸምኩዎ ነገር እንተ’ልዩ እንታይ ዘጸቢ ኣሎኒ? ስለምንታይከ ናይ ኩላትና ግዜ ዘባኽን?’ ኢሉ ኣተኵሩ ጠመቶ።
ኣስናቀ ከም ቅጽበት ናብ ነብሪ ተቐየረ። “ጸብጻብ ውጉኣት ወተሃደራትና እንተ’ላይ ናይ ሓለፍቲ ንሻዕብያ ተተሓላልፍ፡ መድሃኒት ተቐብል፡ ዕጥቅን ስንቅን ሰራዊትና ትሕብሮም፡ ምጭዋይን ቅትለትን ትፍጽም፡ ካልእ’ውን ብዙሕ ኣሎ። ካብ ሓደ መራሒ ቦጦሎኒ ወይ ሓላፊ ስለያ ሻዕብያ ተፈሊኻ ከም ዘይትርአ ፍለጥ!” በሎ ነድሪ ብዝተሓወሶ ቃና። ኣብርሃም ካብ ዝገመቶ ንላዕሊ ሓበሬታ ኣኪቡ ምጽንሑ፡ ‘ሌ/ኮሎነል ቦጋለ ኣሕሊፉ ሂቡኒዶ ኮይኑ? ምኽንያቱ ንብጾተይ ሒዙዎም እንተዝኸውን ተሓባበርትኻ በዓል መን’ዮም? ክብል ኣይምሓተተንን ነይሩ” ኣብ ዝብል ጥርጣረ ኣተወ። እቲ ነገር ሓረዱዋ ሞተት ነጸዩዋ ሞተት ኮይኑዎ፡ ‘እንቋዕ ንበዓል በላይ ኣይረኸቦም’ምበር ኣብ መትከለይ ክጸንዕ ኣለኒ፡’ ዝብል ውሳኔ ብምውሳድ ድማ፡ “እዚ ትብሎ ዘለኻ ዘረባ ንዓይ ሓዲሽ ነገር’ዩ ሓለቓ ሓምሳ፡” ክብል ንመጀመርያ ግዜ መዓርጉ ጠቒሱ መለሰሉ።
“ደሓን በል! ክልተ ግዜ ክትዛረብ ኢኻ። ካብ ብኽብረት ብሓሳር ይሕሸኒ ካብ በልካ ቀሊል እዩ’ቲ ነገር፡” ኢሉ ብምፍካር ጠንጢኑዎ ከደ። ናብ ሓላፊኡ ተመሊሱ” ብርቱዕ ናይ ሻዕብያ ድሲፕሊን ዘለዎ’ዩ ዝመስል። ኣብ ገጹ ዘንበብኩዎ መልእኽቲ ንሱ’ዩ። ዘየምለጠና ዕድለኛታት ኢና፡” እናበለ ሽጋራ ወሊዑ ኮፍ በለ።
“እቲ ዛጊት ረኺብናዮ ዘለና ሓበሬታ ንእሽቶ ዓሳ ከም ዘይኮነ እዩ ዘመልክት። ብኡ’የ ድማ ነቲ ጕዳይ ብፍሉይ ሓላፍነት ናባኻ ከም ዝምራሕ ዝገበርኩዎ። ስለዚ ግድነት ክትሰብሮ ኣለካ። ስለዚ ዝህቦ ሓበሬታ ኣገዳሲ ክኸውን ስለ ዝኽእል ቀልጢፍካ መርመራ እንተ ገበርካሉ ዝሓሸ እዩ። ኣነ ኣብ ማእከላይ ቤትጽሕፈት ኣኼባ ስለ ዘሎኒ ምኻደይ’ዩ፡” ኢሉ ሓፍ ክብል ቴለፎን ተደወለት።
“ሃለው፡” ኢሉ፡ “ንዓኻ’ያ ኣስናቀ፡” ብምባል ኣቐበሎ። ኣስናቀ ናይ ቴለፎን መልእኽቲ ተቐቢሉ ምስ ወድአ ገጹ በርሀ። “ተዓዊትና! በላይ ንጉሰ ኮምፕላስዮነ ተኸዲኑ ክሓልፍ ከሎ ኣብ ብሎኮ ከረን ተታሒዙ፡” ኢሉዎ መልሲ ሓለቓኡ ከይተጸበየ መኪና ኣተሲኡ ብናህሪ ተወንጨፈ።
እናተሃንፈፈ ኣብ ብሎኮ ከረን ምስ በጽሐ፡ ምስቲ ኣብኡ ዝጸንሖ ሓላፊ ብምርኻብ መምጽኢኡ ገለጸሉ። ብርክት ዝበሉ ሰባት መንገዲ ተኸልኪሎም ከዕለብጡ ይረኣዩ ነበሩ። ሓላፊ ብሎኮ በርጠጥ እናበለ ንኣስናቀ መሪሑዎ ናብታ ጸባብ ብጣውላ ዝተሰርሐት ክፍሊ ብምእታው ንሓደ ጸሊም መንእሰይ ኣረከቦ። ኣስናቀ ቅድሚ ቐትሪ ናብ ፋርሚኮር ክኣትው ከሎ ዝርኣዮ በላይን ኣብ ቅድመኡ ተገቲሩ ዝነበረ መንእሰይን ብመልክዕ ይኹን ብዕድመ ዘይራኸቡ ኮይኖሞ ተስፋ ቈረጸ። ክገብሮ ዝኽእል ነገር ስለ ዘይነበረ ነቲ መንእሰይ ወረቐት መንነት ሓተቶ። ጋን ተሰሪሑ ዝጸንሐ መንእሰይ ወረቐት መንነቱ ኣቐበሎ። ዝተሰንዐት ከይትኸውን ገላቢጡ ምስ ተዓዘባ ተስፋ ቈረጸ። ነቲ ኣብ ፋብሪካ ክርቢት ዝሰርሕ መንእሰይ መንገዱ ክቕጽል ሓቢሩ ድማ ገጹ ናብ ሓላፊ ብሎኮ ኣዞረ።
“ዝፈጸምኩሞ ስራሕ ኣዝዩ ዝምስገን’ዩ፡ በጋጣሚ ግን እዚ ዝሓዝኩሞ ሰብ ኣይንሱን’ዩ። ኣስማቶም’ዩ ተጋጢሙ ጸኒሑ። ንደልዮ ዘለና ሰብ ስእሉ ክሳብ ዝሰደልኩም፡ ነዊሕ ብርሕ ኢሉ ከደራይ ኮይኑ፡ ኣብ ፋርሚኮር’ዩ ዝሰርሕ። ኣዝዩ ሓደገኛ ሰብ ስለ ዝኾነ ግን ተሞኽልዩ ከይሓልፈኩም ምጥንቃቕ። ኣይትሕመቑ ጥራይ፡ ምክትታልኩም ኣይተቋርጹ ኢኹም፡” ኢሉዎ ንመኪና ዝያዳ ነዳዲ ሂቡ ብናህሪ ተበቈጸ። ጕዳይ ስእሊ ክውድእ ስለ ዝደለየ፡ ኣቐዲሙ ናብ ፋርሚኮር ብምኻድ ውልቃዊ ማህደር በላይ ንጉሰ ክሓትት ኣብ መንገዲ ዝጸንሖኦ መካይን እናጠሓሰ ጕዕዞኡ ቀጸለ። ኣስናቀ ኣብ ተብተብ ከሎ ግን ኣብርሃም መርመራ ከይጀመሩሉ ከለዉ ኣብ ህይወቱ ስጕምቲ ክወስድ ወሰነ። ነተን ኵሉ ግዜ ኣብ ፕላስቲክ ጠቕሊሉ ኣብ ዕጻፍ ናይ ካምቻኡ ዝሓብአን፡ ኣብ ናይ ቴትራሳይክሊን ካፕሱል ዝኣተዋ ክልተ ሳይናይድ ከኒናታት ተጣቢቡ ድሕሪ ምውጻእ፡ ንኽልቲአን ውሒጡ ከም ኩላቶም ቅድሚኡ ዝሓለፉ ተቓለስቲ ርእሰ መስዋእትነት ፈጸመ።
ኣስናቀ ኣብ ፋርሚኮር ዝነበሮ ስራሕ ወዳዲኡ ናብ ኣብርሃም ኣምርሐ። ማዕጾ ከፊቱ ምስ ኣተወ ኣብርሃም ዝባኑ ሂቡዎ ብጐድኒ ደቂሱ፡ ኣብራኹ ድማ ዕጽፍ ኣቢሉዎ ተዓዘበ። ‘እንታይ ዓይነት ቅሱን ሰብ’ዩ’ ኢሉ እናተገረመ ብእግሩ ረግሖ። ደሪቑ ፍሕት ምባል ምስ ኣበየ ድንን ኢሉ እንተ ጠመቶ ዓይኑ ፈጢጡ፡ መልሓሱ ቍሩብ ውጽእ ኢላ ሰብነቱ’ውን ዝሒሉ ከም ዘሎ ፈለጠ። ንኸረጋግጽ ኢዱ ሰዲዱ ህርመት ልቡ ተቘጻጸረ። ልቡ ምልክት ናይ ህይወት ኣይነበራን። ኣስናቀ ብሕርቃን ኵምተር ኢሉ፡ “ተጻዊቱልና’ዚ ወዲኸልቢ!” ኢሉ ብዓውታ ጨደረ። ኣብ ዝነበሮ ንገለ ካልኢታት ንሬሳ ዶክተር ኣብርሃም እናጠመተ ሰብነቱ ጽቡቕ ገይሩ ከይፈተሾ ትም ምባሉ ብጣዕሳ ርእሱ ኣድነነ። ሸላ ዓጽዩ ሰላሕ ኢሉ ናብ ሓላፊኡ ብምምላስ እቲ ዘጋጠመ ኵነታት ሓበሮ። ንሱ’ውን ብግደኡ ብሕርቃን ተቓጸለ። ድሕሪ ብዙሕ ምክታዕ ኣብርሃም ብምስጢር ክቕበር፡ ቤተሰቡ ብዛዕባኡ ክሓቱ እንተ መጺኦም ከኣ ከም ዝሞተ ክሕበሩዎም ከም ዘይብሎም ተረዳዲኦም ነቲ ጕዳይ ክዓጽውዎ ወሰኑ።
ይቕጽል
መበል 94 ክፋል ዝመጽእ ረቡዕ
