ካብታ ቤተይ ናተይ ስድራ
ዝወጻኹላ…!
ዶብ ክሰግር ካብ ኤርትራ
ኣብ ኣውቶቡስ ተሳፊረ፣ ከምዛ ጋሻ
ተመሲለ፣ “ጋሻ ዓሻ!”
ተበጊሰ ንኽሰግራ፣
ንሓንቲ ጸሎት
ንሓንቲ ምርጫ
ወይ ክነጥር
ወይ ክነጥራ
ኣምላኽ ሓጊዙ
ኣምላኽ ፈትዩ
በጺሐ ከኣ።
ሽዑ፣ ቅድሚ’ቲ ምብጋሰይ
ኮፍ ኢለ፣ እንከለኹ ኣብታ ኵርሰይ
ዝመጹኒ ሓደ ሰብኣይ
ካብ ኣውቶቡስ ናብ ኣውቶቡስ
ብደርጓስ ምርኵስ
‘ናደየቡ፣ “ስለ ማርያም!” ዝብሉ
ሳንቲም ወዲ ሳንቲም፣ ‘ናማእረሩ
ካብ ኢዶም ናብ ኣፎም ዝናበሩ
ይርከቡ/ ኣይርከቡ
ከም ሻሙ፣ ጨቐም ዝብሉ
ዘኪረዮም…!!
ኣቦይ ሃይሉ ገብራይ
መዋዓልቲ ጸሓይ
ልመናኦም ሰማይ፣
“ኣሓተይ/ ኣሕዋተይ
ደቀይ፣ ደቂ ደቀይ
‘ዓይኒ ፈዚዛ
ብርኪ ደንዚዛ
ከብዲ ጎቢዛ…!’
እዝጊሄር ይሃብኪ ‘ዛ ጓለይ
እዝጊሄር ይሃብካ ‘ዚ ወደይ!”
ምስ በሉ ኣቦይ ሃይሉ
‘ቲ ሰብና ኣብ ቀረባ እንደኣሉ
“ኣየ! ‘ዛ እርጋን ውርደት
ኣብዘይ ብልካ ውላድ መዋረዲት!”
ምስ ኣዳመጹ፣
‘ቶም ዝህቡ፣ ‘ቶም ዝተዅቡ።
ኣቦይ ሃይሉ
ክብል ዶ’ሞ በሉ፣
“ውሉዱስ ኔሮምኒ፣ ‘ዝጊ ዝሃበኒ
ሂቡ ደኣ ከልኣኒ ‘ምበሪ
ከይገደፈ ምቕሊ።
ሰለስተስ ወሊደ
ክልተ ‘ዝጊ ወሰደ
ኣብቲ ዝሓለፈ እዋናት
ኣመኽንዩ ወራራት።
ኣሎ ከኣ ሓደ
ስሙ ዓንደ
ከምቲ ዓንዲ ዝተዓንደ
ልምናይ ዘስሕቖ
ምምስሐይ ዘሕርቖ
ምህላውስ ኣሎ
ግን ከም ዘይ ‘የሎ
ኩርማጁ ዘንወሐ
ሰብ ዘሰክሐ
ገዛ ‘ናኳሕዅሐ
ደም ዘንብዐ
ኣሎ…!
ኬድና…! ደኣ፣ ኬድና…!
መረረና/ ከይደርጓሕና
ታሃና/ ከይወድኣና
ዉሉድና/ ከይመጹና
ኣይሓሚና/ ኣጸቢቕና
ኣይረጊምና/ጨኪና ቀቢጽና
ክሉ ግዳ፣ ልሳንና ንዕጾ
ከይንኸውን መፍቶ ማዕጾ።”
ምስ በሉና’ሲ
‘ካብ ሓዘን ከርሲ
ካብ ቝረኛ ማእሲ’
የድሕነና እናበልኩ፣
እሓስብ ኔረ፣ ብዛዕብኡ
ዶብ ክሳብ ዝሰግራ
እና’ግረመለይ ቍንቍኚኡ።
ሎሚ…!
ድሕሪ ነዊሕ ግዜ
ዝኽረይ ከይፈዘዘ
ዘኪረ ኣቦይ’ሃይሉ
ብህይወት ዶ ይህልዉ…!?
ወይስ ከይዶም፣ ንዓዲ ‘ዝጊሄሮም
ወይ ከም ሰቦም፣ ባሕሪ ተሳጊሮም
እናበልኹ፣ አስተንትን እድጕዕ ኣለኹ።
***
10/9/2015
ኤልዳና ተስፋማርያም
