ብገዛኢ ነጋሲ( መንኮሴን)
ሰብ ካብ ሰብ ተነጺሉ፡ በይኑ ዝዓሞ ተኣምራታዊ ዕዮ ሰሚዐ ኣይፈልጥን።
ም/ት ውልቃዊ ዕላማን ርሑቕ ራእን በይንኻ ክትጉዓዝ ዘኽእል ባእታ እህልዎ ይኸውን። ዋላ ድኣ እዚ ይኹን ‘ምበር፥ኣብዚ እውን ካብ ጽላሎት ሰብ ትርሕቀሉ በይናዊ ዓለም የለን።ም/ቱ እቲ ንስኻ ትኸዶ ዘለኻ መንገዲ፡ ቅድሜኻ ወይ ‘ ውን ምሳኻ ዝጉዓዙ፡ ስለ ዝህልዉ። ነቶም ዝሓለፉ ምስዓብ፡ ንዘለዉ ምጽንባር ባህሪ ሰብ ካብ ሰብ ዘየነጻጽል ድምቀተ ጥምረት ብቁሊ ሰብ ምዃን፡ ዘብርህ ዳዕሮ ሕብረት ኢዩ። ጸሓይ ራኢኻ ከትብርቕ ገዛእ ርሃጽካ ክትኩዑ ፡ነብስኻ ክትገንሕ ፡በይናዊት ዓለምካ ናብ ሰብ ከትግህዳ ሰለምካ ክትንኪ ግዳማዊ ውርጻጸ ናብ ናብ ውሽጢ ክትልውጦም ሒጊግ ከም ትብል ንጹር ኢዩ። ነዚ ንምትግባር፥
ንፉሉይ ሰዓታት፥ ከም መጽናዕቲ፡ ምርምር፡ ዕላል ውሽጢ፡ ደኺምካ ጸኒሕካ ከተዕርፍ ዝኣመሰሉ ንድሩት ሰዓታት ወይ መዓልታት ክውንኑኻ ይኽእሉ ኢዮም። ካብኡ ነጢሩ ለይትን ቀትርን ብምልከት ጽምዋ ብንጉስ ብሕትውና ብግዝኣት በይናውነት ክትውነን ፡ ዓቕልኻ ዝምሑ ትዕግስትኻ ዝብርቁቕ ፈተንቲ ደቓይቅ ጠበሽ ይብሉ ኢዮም።
ግልጺ ንምዝራብ፥ ኣነ ከም ኣነ ነብሰይ ካብ ዘለሊ ጽምዋ ጸሊአዮ ኣይፈልጥን። ንሱ ‘ውን ልዕሊ’ቲ ኣነ ዝፈትዎ ኢዩ ዘፍቅረኒ። ውዕለቱ እውን ኣዝንግዖን እየ። ኣነ ምዃነይ ንኣነ ክፈልጥ ውሽጠይ ክበጽሖ ትዕድልተይ ከለሊ ሰብን ሰብነትን ተፈጥሮን ፈጣርን ከስተብህል፡ ዕላማ ከለሊ ፡ ብተስፋ ክጉዓዝ፡ ብዓቕሊ ክነብር ፡ ምኻደይ ክሳብ ዘለኹ ክኸይድ ምዃነይ ሓጊዝኒ ኢዩ። ከየጋነንኩ ናብኡ ዘምርሕ ሓዲድ ኣርጊጽኒ እብል።
ካብ ናተይ ወጻኢ ዝተገንዘብኩዎ እንተሃልዩ ‘ውን ብዚሕ ኢዩ።
ኣብ ሂወት ብዙሓት ደረስቲ ጽምዋ ቀዳማይ ደረጃ ከም ዝሕዝ ፡ ካብ ልሳን ሓያላት ደረስቲ ብብርዖም ይኹን ብልሳኖም ዝሰማዕኹዎ ሓቂ ኢዩ። ኣነ ጽምዋ ምፍታወይ ውልቃዊ ባህረይ ድኣ ‘ምበር ምስ ድርሰት ዘራኽብ የብልናን። ዝተሰምዓኒ፡ ዘጋጠሚ ፍሉይ ተርእዮ፡ ጎፍ ዝበለኒ ፍሉይ ፍጻመ፡ ዓይነይ ዝሰርቕ ልበይ ዝጨዊ ኣእሙሮይ ዝወርር ተኾይኑ ብዘለኒ ዓቕሚ ክሕንጥጥ እፍትን። እዚ ማለት ግን ንዓይ ንባህታይ ድኣ ‘ምበር ምስ ክእለት ድርሰት ኣዛሚደዮ ኣይፈልጥን። ብርዐይ ጸዊዐያ ስለ ዝሰማዓትኒ ንብዓታ ከይበቐቐት ስለ ዝነብOት ስነ -ጥበባዊ ከብለኒ ዘኽእል ኣይኮነን። ክብሪ ደራሲ ብማንም ክራኸስ ጎርዳዕ ኢልለይ ኣይፈልጥን። ድርሰት ፍሉይ ጥበብ ካብ ካልኦት ደረስቲ ዝፈሊ ተዘይሃልይዎ ነቲ “ጥበባዊ እየ” በሃላይ ጥበባዊ ከጸውዖ ዝኽእል ኣይመስለንን። ክንዲ ዝኾነ እየ ንምጽሓፈይ ምስ ልምዲ እምበር ምስ ክእለት ጥበብ ዘየዛምዶ።
ናብ ጽምዋ ክምለስ እንተ ድኣ ኮይነ ግን፥ ንክልቴና ዘየረሓሕቕ ምድልላይ ኣለና። ሎሚ ግን፥
ዘይከም ቀደም ብሕትውና በዚሕኒ በይናውነት ጸሊአዮ ምስ ጽምዋ ተዃሪና ንርከብ። ካብ መዓስከር ወጺአ ናብራ ሆላንድ ካብ ዝጅምር ድሮ ውርሐይ ሓሊፉ። ኣብዚ ወርሒ’ዚ ምስነብሰይ ዘዕለልኩዎም ዕላላት ቆጻሪኡ ይቑጸሮ። ሕብረተ -ሰብ እዚ ዓዲ ከም ሕብረተ-ሰብ ኤርትራ ዘይምዃኑ ንጹር መስለኒ። ንግሆ ክወጹ ምሸት ክኣትዉ ጥራይ ኢኻ ትርእዮም። “ዓዲ ከመይ ረኺብካዮ? ከመይ ኣለኻ? ገዛ ተዛወር” ዝብል ንፈውሲ ሞት እንተትብሎም ካብ ከናፍሮም ኣይመንጠቡን። ኣብ ከምዚ ሕብረተ-ሰብ ስለ ዘይዓበኹ ምጻሩ ሰኣንኩ። ገጽ ጽምዋ ጸሊአ ደገ ተዛዊረ ንከተማ ኣስተን ኮሊለ ንገዛይ ተመለስኩ። ማዕጾ ኣርሕየ ድርኩኲት ክሰግር ገዛ ወኒንዎ ዝጸንሐ ኳዕናን ጽምዋ ንግዝያት ምሸት ተጠቂሙ ሸልዳዕ ከንፈሩ ጋሊሁ” ሎሚ ዝጸላእካኒ ትመስል ኣለኻ። ገዲፍካኒ ደገ -ደገ ምውጻእ ካብ ተብዝሕ ነዊሕ ኮይኑ ።ሓቀይ ዶ ተጋግየ?” ኣርዓዲ ድምጹ ምስቲ ድሃሊ ትርኢቱ ቀልብኻ ዘህድም ወጅሁ ንምምላሱ ዝኸበደኒ ሕቶ ጨንጉዓለይ። ምስኡ ክመሳሰል ስለ ዝነበረኒ ከቐይሞ ስለ ዘይደለኹ ተተቐይምኒ ኣንጻረይ ‘ውን ከይዕጠቕ ኣህዳኢ ዝበልኩዎ ቃል ክምልስ ዘየዋልእ ግድነት ክትግብሮ ዝነበረኒ ዝነበረ ኢዩ። “ጸሊአካ ኣይፈልጥን ክጸልኣካ ‘ውን ኣይደልን። መሊስካ ትፍቀር ሰፈር ፍቕሪ ኢኻ። የግዳስ ነብሰይ ከይሓፍስ ጅማውተይ ከይቅየድ ማዕረ -ማዕሬኻ ምንቅስቓስ ስለ ዝፈትዎ ‘የ ክንቀሳቐስ ዝወጽእ።” ተባላዒ ኮይኑ ዝተራኣየኒ ጨጓር ግዳሙ መንፈሰይ ከይጋልብ ነብሰይ ኣማዕቲበ ብውሽጣዊ ልማኖይ ናብ ፈጣሪየይ ተማሕጺነ ምስኡ ክመሳሰል እቲ ህሞት ዝመረጾ ውሳነ ኮነ።
ንናይ ምምስሳል ኩነታተይ ተዓዚቡ” ናይ ምምሳሳ ባህርኻ ፈትየዮ።ባህ’ውን ኢሉኒ። ክትፈልጥ፥ ሕብሪ ገጸይ ባህ ዘይበሎም ፡ግዳማዊ ትርኢተይ ዝድሃሎም ባህሪሮም ካባይ ዝርሓቑ መፍቀዲ የብሎምን። ንግዝኣተይ ዘይፈተዉ ተገዛእቲ ስፍራይ ዝጸልኡ ንምፍጣረይ ከም ምፍጣሮም ዘይሓስብዎ ፡ ነብሰ ቅትለት ከም ዝፍጽሙ ዝገበርኩዎምን ኣንፈቶም ኣጥፊኦም መሳምሮም ዘምለቑ ተንቀሳቐስቲ ሬሳ ገይረ ዝሓደክዎምን መቑጸሪ ዝኸውን ኣሃዝ የብለይን። ወይ ‘ውን ውርጹጽ ጸብጻብ ኣየዳለኹን። ብሓጺሩ ግን፥
እዚ ክትግብር ዝኽእል ደርማስ ሓይሊ ከም ዝውንን ከእምነካ እደሊ። ከም ቀደምካ ተሰጢምካኒ ሕቡእ ጽባቐ ከም ዝውንን ፡ ብገዛእ ልሳነይ ክድርጉሓልካ ኣይፈርሕን። ኣነ እንታይ ይመስል ሕብረይ ኣለሊ። ትሑዝተይ ‘ው ን ብመስአ ኣእምሮ በርብሮ። ባህርያዊ ውቅያኖሰይ ሓንብሰሉ። ኣብ መዓምቑ ዘለዉ ጸጋታት ብጽሓዮም። ኮታ ኣነ ዝውንኖን ከባብየይን ኣስተብህል። ዝያዳ ፍቕሪ ብዝያዳ ቅርበት ከም ዝስረት ኣይትደንሻእ። ነዚ ነጥቢ ካብ ሽክናኻ ኣይተርሕቆ። ብዝኾነ መሓድርና ብሓደ ኢዩ ብሓደ ‘ውን ኣለና። ስፍሓት ግዝኣተይ ዘወር በሎ። ” ንኩሉ ዝውንኖ ባህርያዊ ጸግኡ ብህድኣት ክድህስስ ኣብ ቁጽጽሩ ዘለዉ ከድህበሎም ፡ ስፍሓት ግዝኣቱ ዘገም ኢለ ክርኢ ርክብና ዘይነጻጸል ምዃኑ ካብ ጎነይ ከም ዘይፍለ ኣነጸረለይ። ንምቕባሉ ኣዝዩ እናከበደኒ ንምውሓጡ ካብ ዕረ እና መረረ ክመሳሰል ተዋሳኢ ባህሪ ለቢሰ ምስኡ ክነብር ምርጫ ዘይብሉ ዕጫ ኮነኒ። ኮበርታይ ስሒበ ከኣ ምስ ገበታ ሻቕሎተይ ኣብ መዓሙቅ ኮበርታይ ጠለቕኩ። እንተ ‘ቲ ብልሳኑ ክድህለኒ ዘምሰየ ጎረኛ ጽምዋ ግን ብሕልሚ ‘ውን ክርኣየኒ ሓደረ። ኣብ ትሕቲ ቁጽጽሩ ተሓይረ ከኣ ካብ ሳሎን ናብ ዓራት እናበልኩ እነብር ኣለኹ።
ዕለት9/8/2015 ሆላንድ
