ካብ መሬቱ
ኣብ መሬቱ
ናብ መሬቱ፡
ኣብ ምድረ በዳ ጎልጎል
ኣብ ኣኽራናት ገደል
ብሓመድ እምኒ ተጸቒጡ
ዋላ የጽቅጥ ብድቃስ ተዋሒጡ
መዓስ’ዩ ሞይቱ መርሃዊ?
ዝወለደቶ ማህጸን ኮሪዓ
ዝደቀሰላ መሬት ጠጢዓ
ዝናፍቕዎ ኣሓት፡ ኣሕዋት
መላእ ሕብረተ-ሰብ ቀረባ ርሑቓት
ሳልኡ! ሳልኡ! ሳልኡ! እናበሉ
ኣብ ጐደና ሓርነት ሸናዕ ክብሉ
ንሱዶ’ይኮነን ህያውነት መርሃዊ!
ኣይመሽመሸን!
ጨው ሰሊና ኣይበልዖን ኣዕጽምቱ
ኣይማጠጐን!
ቀዝሒ ሮራ ኣይጨደዶን ቈርበቱ፡
ምስ ጠሉ እዩ ዘሎ ደሙ
ናብ መትንታትና ልሒሙ!
እነሀና’ንዶ ንወሳወስ
እንተ ዝመውት ደኣ ዘይንልዅሰስ
እነሀና’ንዶ ንርኢ ነስተውዕል
እንተ ዝመውት ደኣ ዘይንዓውር።
መርሃዊ ሞይቱ ዝብል ደኣ መንዩ
ካብ ንፋስ ሓርነት ዘየዳምጽ ደሃዩ።
ርግጽ!
በብራኹ እንተ ዘይኬድና
በዒንቱ እንተ ዘይተመሪሕና
ቃሉ ብዘይምኽባር
ብጕዑ እንተ ወዲቑ ፍረና
ብህርፋነ ስልጣን
ብኣድልዎ ወገን
ረሲኣን ኴንና ምስ እንነዓዓቕ
ንጸላእቲ ምስ እንፈጥር ፈቓቕ
ሞተ ማለት ሽዑ’ዩ መርሃዊ
ብኣርባዕተ መኣዝን ተጠሊዑ ዘእዊ።
እንተ ዘየለ፡
ተወሃሂድና
ዋልታ ሓድነት ገቲርና
ቃሉ ምስ ዘይነዕብር
ሳቮያ እንተልና ንህንጸት ሃገር
ሎሚ ኣይሞተ፡ ጽባሕ ኣይመውት
መርሃዊ
ህያው’ዩ ዘልኣለማዊ።
ሰለሙን ድራር
