ፍቕራዊ ዛንታ ኣብ ምእላሽ

ደራሲ፡ ሸሊ ባንክስ
ተርጓሚ፡ ኣማረ ወልደስላሰ

ኣብ ኵርናዕ ሓደ እንዳ ሻሂ፡ ክልተ ሰባት ጥቓ ንጥቓ ተቐሚጦም ከም ዘለዉ ተዓዘብኩ። ኣብ መንጎኦም ባህታ ዘይህብ ጸጥታ ኸም ዝሰፈነ’ውን ተገንብኩ። ርክቦም ከምቲ ዝሓሰቡዎ ኸም ዘይጠዓየ ብቐሊሉ ይስትብሃል።

ሓደኦም ብተደጋጋሚ ዘረባ ይፍልም፡ እቲ ኻልእ ይምልስ። ቍሩብ ጸኒሖም ክልተኦም የስቅጡ።ንኽልተኦም ዘመሳስል ረቛሒ ዘሎ ኣይመስልን።

ንሓድሕዶም ክፋለጡ’ውን ባህጊ ኣየሕደሩን። ኣብ መወዳእታ፡ ‘ምናልባት፡ ዕድል ዘራኸቦም ሰባት እዮም ዝዀኑ!’ ኢለ ብምሕሳብ፡ ዘይክእሎ ዕዮ ገዛ ኽሰርሕ ብምብጋሰይ ኣማረርኩ።

ጽባሕ ዕዮ ገዛ እነረክበሉ መዓልቲ’ዩ። ዛጊት ከኣ ወላ ሓንቲ ምልእቲ ሓሳብ’ውን ኣየካወንኩን።
ስለ ምንታይ እየ ፍቕራዊ ዛንታ ኸዳሉ ዝመረጽኩ፧

ንዘላታ ተወሰኸታ ኸም ዝበሃል፡ ዋጋ ዘህለኽኩዎ ኮረንቲ ዝተጻሕፎ ዕዳ ዝመልክት ቍራጽ ወረቐት ድማ ኣብ ጣውላይ ከም ዘሎ ተገንዘብኩ።

ብዅሉ ምሉ ሓርበተኒ። ኣብ መወዳእታ፡ ቀቢጸ ተስፋ ብዝዓብለሎ ዅነተ-ኣእምሮ ተደፌአ ነታ ኣብ ጥቓይ ዘላ ስልኪ ኣልዒለ ኽዛረብ ጀመርኩ።

“ኣቢጋል፡ መቸም ንስኻ ዛንታት ፍቕሪ ትፈልጥ ኢኻ። ሓገዝካ የድልየኒ ኣሎ።”

“እንታይ ክሕግዘካ፧”

“ፍቕሪ ሓዘል ዛንታ።”

“ብፍቕራዊ ዛንታ እትኣምን ኣይመሰለንን።”

“ሎሚ ኣሚነ ኣለኹ። ጽባሕ’ውን ከምኡ። ብውሑዱ ኽሳዕ ሰዓት ሓሙሽተ ድሕሪ ቐትሪ ኽግደስ እየ። ጽባሕ ዘረክቦ ዕዮ ገዛ ረኺበ ኣለኹ።”

“እንታይ ኢኻ ትጽሕፍ ዘለኻ፧”

“እኩባት ፍቕራዊ ሓጸርቲ ዛንታታት ኣብ ዘለዎ ዕዮ ኸበርክት ተሓቲተ ኣለኹ። ሕራይ ክብል እኳ ኣይነበረንን፡ ግን ክሕተም እዩ ዝብል ተስፋ እንተ ተዋሂቡ ኽትልእኽ ትድረኽ ኢኻ።”

“እንኳዕ ደስ በለካ! ፍረ ጻማኻ ምርካብ ክትጅምር ኢኻ።”
“የቐንየለይ፡ ኣይትርሰን ግን። ነዚ ዛንታዚ ንምጽሓፍ መበገሲ ኸድልየኒ እዩ። ነዚ እየ ደዊለልካ። ፍቕራዊ ዛንታ ምስ ዘለዎም ሰባት ስለ ትውዕል፡ ተመኵሮኻ ኽተካፍለኒን ሓሳብ ክረክብን እየ ደልየ።”
“ልዕሊ እዚ ትብሎ ዘለኻ ኽገብረልካ እኽእል እየ። ቅድሚ ኽልተ መዓልቲ፡ ካብ ኵሉ ዝበለጸ ፍቕራዊ ዛንታ ሰሚዐ ኣለኹ። እዚ ዛንታዚ እንተ ዘይጠቒሙካ፡ ካልእ ክጠቕመካ ኣይክእልን።”
“ቅድሚ ሓያሎ ዓመታት እዩ። ኤድዋርድ ዝስሙ ሰብኣይ፡ ቻርሎተ ንዝተባህለት ሰበይቲ፡ ኣብ ማዳ ስጋ ጠቢሶም ምስ ዝምገቡ ተቐማጦ ሓንቲ ሓውሲ ኸተማ ረኸባ። ቻርሎተ ኣብ ከተማ እያ ዓብያ።”
“ቻርሎተ ኻብ ግዜ ቝልዕነታ ጀሚራ፡ ኵሉ መዓልቲ፡ ሓያሎ እንስሳ ዘቤት ዝረብሑሉ ገፊሕ መካብብያን ዓቢ መንበሪ ገዛን ክትውንን ትሓልም ነበረት። መምህር ክትከውን ስልጢና ብዲግሪ ምስ ተመረቐት ድማ፡ ሃገራዊ ግቡኣ ኽተማልእ፡ ንስድራኣን ኣዕሩኽታን ተሰናቢታ ኣቕሑታ ብምጥርናፍ ወፈረት። ስድራኣን ኣዕሩኽታን ከምኡ ዓይነት ዕላማ ኸም ዝነበራ ኣይፈለጡን። ብኡንብኡ ድማ መኪናኣ እናዘወረት ናብ ምዕራብ ገጻ ተጓዕዘት።”
“ካብ ከተማ ብዝረሓቐት፡ እናተሓጐሰት ተጓዕዘት። ነቲ ኽትነብረሉ መጺኣ ዘላ ምስ ረኣየት ከኣ ብስምዒት ኣጣቕዐት። እቲ ገዛ ኸምቲ እትሓልሞ እኳ እንተ ዘይኰነ፡ መጠነኛ ግፍሒን ቀጽሪን ግን ነበሮ። ቻርሎተ፡ ኣብቲ ገዛ ምንባር ብዝጀመረት ኣዕሩኽ ክተጥሪ ፈለመት። ሓደ ኻብቶም ኣዕሩኻ እዚ ኣብ ማዳ ዝጥበስ ስጋ ዘዳለወን ዝዓደማን እዩ።”
“ኤድዋርድ ናብቲ እንግዶት ደንጒዩ እዩ መጺኡ። ንሱ ንጉሆ ዅዕሶ ኽጻወት ምስ ወጸ፡ ብኡ ኣቢሉ፡ ምስ ደቂ ጋንታኡ ቢራ ምእንቲ ኽሰቲ ተኣልየ። ናብቲ ኣብ ደገ ዝተገብረ እንግዶት ክኸይድ ኣይደለየን። እንዳ ሓዉ ሰለ ዝዀነ ግን ክተርፍ ኣይከኣለን።”
ደንጒዩ ኣብቲ ድግስ ዝተጸንበረ ኤድዋርድ፡ ንቻርሎተ ረኣያ። ብኡንብኡ ድማ ትርግታ ልቡ ናህሪ ኽትውስኽ ከላ ተፈለጦ። ኣብታ ዕለትቲኣ፡ ብቝልጡፍ ምስኣ ተላልዩ፡ ካብኣ ኸይተፈልየ ኣብ ጐና ወዓለ። ቻርሎተ፡ ገዚፍ ገዛ፡ ዓቢ ቐጽሪን ሓያሎ እንስሳ ዘቤትን ምውናን ኣብ ሕልማ ኸም ዝመጻ ነገረቶ። ነዚ ሕልሚዚ ዝሰምዐ ኤድዋርድ ዝደለየቶ ኸማልአላ ብምስጢር ተመባጽዐ።”
“ኤድዋርድ ግዜ ኣይወሰደን። ንጽባሒቱ፡ ወለዱ ቕድሚ ሽዱሽተ ወርሒ ኣብ ዝመቐሉዎ ቦታ ገዛ ኽሃንጽ ጀመረ። ዛጊት፡ ተርባጽ ይዅን ታህዋኽ ከየርኣየ፡ አርክበሉ እየ እናበለ ቐሲኑ እኳ እንተ ጸንሐ፡ ኣብ ሽዑ በጺሑ ግን ብዛዕባኡ ጥራይ ምሕሳብ ኣዘውተረ።”
“ንሱ፡ ነቲ ኣብ ደገ ኣብ ዝተገብረ እንግዶት ካብ ቻርሎተ ንዝሰምዖ ብምሉኡ ብጽሑፍ ኣስፊሩ ተንቀሳቐሰ። ብዅሉ ምሉ ኸምታ ዝበለቶ ገይሩ ኽሰርሖ ድማ ወጠነ። ካብ ማዕጾ ገዛ ናብቲ ቐጽሪ ልዳት ዝወስድ መንገዲ’ውን እንተ ዀነ፡ ከምቲ ንሳ እትደልዮ ዓይነት ገይሩ ኽሰርሖ ተበገሰ።”
“ነቲ ገዛ ቐስ ብቐስ ክሃንጾ ጀመረ። ኣብ ሓደ ግዜ ሓደ ምስማር ኣብ ሓደ ሉሕ እናረቅዐ ስራሑ ኣሰላሰለ። ብኸምዚ፡ ቀትሪ ስራሑ ምስ ወድአን ጸሓይ ምስ ዓረበትን፡ ብሓፈሻ፡ ኣብ መዓልቲ ንኽልተ ሰዓት እናዓየየ ነቲ ገዛ ዛዘሞ። ኣብ መወዳእታ ነፍስ ወከፍ ሰሙን ከኣ ንቻርሎተ ናብ ደገ ወሲዱ ኣዛወራ።”
“ንሳቶም፡ ኣብታ ኸተማ ኣብ ዝርከብ እንኮ ቤት ብልዒ እናኸዱ ተመገቡ። ድሕረኡ ቝሩብ ተዛዊሮም ኣብ ሓንቲ ማይ ዝዓቘረት ስፍራ ኸይዶም ይሕንብሱ። ቻርሎተ፡ ኤድዋርድ እንታይ ይገብረላ ኸም ዘሎ ኣይፈለጠትን። ብኸምዚ ንሽዱሽተ ወርሒ ቐጸሉ። ንሱ፡ ምልእቲ ኸተማ ሚስጢር ምእንቲ ኽትዕቅብ ቃል ኣእትዩዋ ነበረ። ወላ ሓደ ኽልተ ዝዀና ምላቝ ዘረባታት እንተ ኣጋጠማ እቲ ምስጢር ኣይተቓልዐን።”
“ሓደ መዓልቲ፡ እቲ ህንጻ ተዛዘመ። ሓደ ሰሙን ቅድሚ ምዝዛም ህንጻ ኤድዋርድ ናብ ዓቢ ኸተማ ኸይዱ ቐለበት ተማልአ። ሽዑኡ፡ ኣብ ሓደ ሰንበት ንጉሆ ኤድዋርድ ንቻርሎተንን ነታ ቐለበትን ሒዙ ናብቲ ገዛ ብምኻድ ነዘን ክልተ ዳሕረዎት ወፈየላ።”
“ቻርሎተን ነቲ ‘ክምርዓወኪዶ፧’ ዝብል ወኸሳ ኤድዋርድ ብደስታ ተቐበለቶ። ብዘይ ገለ ወዓል ሕደር ከኣ፡ ኣቑሑታ ጠራኒፋ፡ ኣብታ ዕለትቲኣ ናብቲ ገዛ ገዓዘት። እቲ ገዛ ልክዕ ከምቲ ዝሓለመቶ ዓይነት ኰይኑ ረኸበቶ።”
“ብዙሕ ከይደንጐዩ ቓል ኪዳን ኣሰሩ። ነበርቲ እታ ኸተማ ኣብቲ ስነ-ስርዓት ምእንቲ ኽርከቡ ተዓደሙ። እቲ ድግስ፡ ኣብ ድሕሪ ገዛኦም ኣብ ዝርከብ ሰፊሕ ቀጽሪ ተኻየደ። ቻርሎተን ኤድዋርድን ካብቲ ኸባቢ ኸይተንቀሳቐሱ ተቐመጡ። ንደቆም ኣብኡ ኣዕበዩዩዎም። ደቂ ደቆም ድማ ኣብ ግዜ ትምህርታዊ ዕረፍቲ ናብኡ እናመጹ ግዜኦም ኣሕለፉ።”
“መዓልቱ ዝኣኸለት ኤድዋርድ ቅድሚ ሸሞንተ ወርሒ ኣቢሉ ኻብዛ ዓለም ተፈልየ። ቻርሎተ ግን ገና ብህይወት ትነብር ኣላ። ክሳዕ መወዳእታ ኣብኡ ኸም ትጸንሕ ድማ ውጥን ኣለዋ።
“ከመይ እዩ እዚ ዛንታ፧” ኣቢጋል ሓተተኒ።
“ከምኡ ዓይነት ዛንታ ዲኻ ትደሊ ነይርካ፧” ደጊሙ ሓተተኒ።
“እንታይ ክወጾ! ይበል ዛንታ! ሕጂ፡ መበገሲ ዝዀነኒ ዓቢ ሓሳብ ረኺበ ኣለኹ። ንምዃኑ ነዚ ዛንታዚ ኻበይ ኢኻ ሰሚዕካዮ፧”

“ካብ ኣደ ዓባየይ ቻርሎተ።”
“እንታይ በልካ፧ እሞ ዛንታስ ሓቀኛ እዩ። እነ ደኣ ልብ ወለድ እንድዩ መሲሉኒ።”
“ነፍስ ወከፍ ቃል ሓቂ እዩ። እንኳዕ በል ዝጠቕመካ ዀነ።”
ብኡንብኡ፡ ንእጀታ እታ ስልከይ ኣብ ቦታኣ ኣቐሚጠ፡ ክጽሕፍ ተበገስኩ። ኣይደንጐኹን፡ ነቲ ዝሰማዕኩዎ ፍቕራዊ ዛንታ ኣብ ክልተ ሚእቲ ቓላት ጸሚቘ ዕዮ ገዛይ ኣዳልየ ኣረከብኩ።