ኣብ ቅያ ህዝብና (ብሓው ሰለሞን ገብረክርስቶስ) ኣብ ዝተጻሕፈት መጽሓፍ ኣብ ገጽ 134-136 ዝሰፈረት ኮይና ኣባ ጅሮም ኣባ ገብረመድህን ዘእግር መኸል- ሰራየ ኣብ መጽሓፍ ፊደል ኣስመራ 1909 ዓ.ም ዘስፈሩዋ ኢያ።
ሓሽከር ኤርትራ ኣብ ትሪፖሊ
ኣሸሸ’ባ በሉ ሓሽከር ሰዓርቲ
ወዳጀ ኣባጽሕ ባሕሪ ሰገርቲ…
መላምል ወዳጀ ኣቱም መሽከርከርቲ
ሓመልኩሙዎም ን’ቶም ጸላእቲ
ሓረድኩሙዎም ከማል ከም ከብቲ
ሰላዕኩምዎም በምሳል ኣንስቲ
ደቂ ሓበሻ ወዮም ምልምል ሰቲ
መን ይዳረጎም ዘይሰጣን በዓቲ
ጥይቶም ሰንጣቒ ዓይኖም ጨማቲ
መድፍዖም ኮልሳሲ ሳንጀኦም በትባቲ
ቱርኪ ቱርኪ ክንደይ’ሞ ትርስዕ
ጠበንጃኻ ክትግፈፍ ኣበዮ ባጽዕ
ዕርድኻ ክትክተር ኢድካ ከተጣቕዕ
ኣብ ጎዳጉዲ (15 ሕዳር 1875) ዕምርኻ ክጠፍእ
ጎልጎል ጉራዕ (7-9 መጋቢት 1876) ልብኻ ክጠፍእ
መገዲ ሓጺሩ ስምካ ክኸፍእ
ኣይሓበሻንዶ ዘበለካ ሲጥ፡ ሲዕ
ጸሊማይንዶ ዘበለካ ድፍእ
ጣልያንን ኤርትራን ብስምምዕ
ሕመቕዶ ይመጾም ትርፊ ብርትዕ
ትሪፖሊ ኣትዮም ዘበሉኻ ክስእ
ሃገርካ ዘሚቶም የብሉኻ ሰጋእ
ግደፍ ተማረኽ ብሓቂ ብርቱዕ
ሓበሻ ጉማ ከመምበሳ ብርቱዕ
ሱልጣንካ በንቂሩ ከይብሎ ብመድፍዕ
ቱርኪ ቱርኪ ክንደይሞ ትርስዕ
ከምዚይዶ ተፈልጡ ከም ኣማልኽቲ
መንግስቲ ጣልያን ሰማይ ነፈርቲ
እዝጊ ኣምከረኩም ንዓድ ጥዕምቲ
ጽቡቕ ወዓልኩም ዕውቲ ለይቲ
ምድሪ ጉልትኹም ሰማይ ርስቲ
ግዝኣት ፊቶሪዮ ድንያ’ትክልቲ
ሃገር ኢጣልያ ናይ ዓለም ገነቲ
ረኤኹምዋዶ ብግርማ ትንግርቲ
ሓወጽኩምዋ ናይ ዓለም ሕምብርቲ
ሮማ’ምበርያ ናይ ቀደም ጥንቲ
መሰረት ሃይማኖት ሱር መንግስቲ
ንጉስ ብግርማ ጳጳስ ብመጻሕፍቲ
ጸኒዓ ትነብር ንዘልዓለም ጥንቲ
ቁጭ በልኩምዋ ኣቀይታውቲ
ቃሕ ይብላ ሓበሽተይቲ
ንኣኹም ዝፈረት ኣምበሲት
ኣራዊት ወሊዳ ከም ኣራዊት
ኮሸም ዘብልዎ ነዕጽምቲ
ባሕሪ ሰጊሮም ሽሕ ማረኽቲ
ንጻዕዳ ቱርኪ ብጥይት መንደድቲ
እልል በላ እሰይ መራዕቲ
ሓብሻ ስዒሮም ምስ ግብጣን ትንንቲ
እልል እባ በሉ ብቓንዳ መለኽቲ
ሳላ ጣልያን መን ዘይብል ትሪፖሊ
ሓሽከር ኤርትራ ዝቕርድድ ከም ሓምሊ
ሓረዶ ገመዶ ኣሻቡ ትማሊ
ንመንግስቲ ቱርኪ ከም ክዳን ዘብሊ
ዓሻ ወደል ከም ኣድጊ ሃላሊ
ከሰላ ኣባሪሩ ሰዓቦ ትሪፖሊ
ወረ ኢጣልያ ካብ ቀደም ዘየለሊ
ወረ ሓበሻ ካብ ቀደም ዘይደሊ
ዝገጥሞም ዘይብሎም ብሓይሊ
ብርኮም ዘይደክም ከም ሰጋር በቕሊ
ቀልቦም ብሩህ ሰብ ብዙሕ ዓቕሊ
ኣኳደድሉ ጎልጎል ትሪፖሊ
ነፋራይ ዝላ ኦም እግሮም ደባሊ
ኣያ ጥልያን ከሎ ኩናቶም ሰሓሊ
ጥበብ ጠፊ ኡዎ በይኑ ሓካሊ
ጓና’ምበር ዘይብሉ መቕለሊ
ዘጥቅዖ እምበር ዘይብሉ መልዓሊ
ዓገቱኻ ኣውደቑኻ ኣብዛ ሓጉሊ
ኣያ ጥልያን በዓል ሮማ
ትሪፖሊ ተኺሉ ዕላማ
