ጾመ-ሓጎስ

ብኢደይ ዘይተጻሕፈት ልበይ ዝወቀጣ

ካብ ኣጸድ ልበይ ዕምባባ ሕቚፋ

ትብጻሕ’ዛ ደብዳቤ ረቂቕ ክንፊ ኣብቊላ።

ካብ’ዚ…..

ካብዚ ምደረ-ሓጥኣን ናብ ምድረ-ጻድቓን

ካብዚ ምደረ ጸልማት ናብ ምደረ-ብርሃናት

ካብዛ ኣምዐ ዓለም ናብ ገነተ-ኣርያም።

ህያብ ድማ ትኹን ህያብ ፍቕሪ

ንዓኹም ኣሕዋትና ዘሕደገና ባሕሪ።

ሰብ ምስ በልዖ ሓርነትኩም ስደት ዝመረጽኩም

ምስ እልፊ ራኢኹም ምስ እልፊ ባህግኹም

ጉዕዞ ኣብ ምውድኡ ቀሪብና ‘ናበልኩም

በዚ በላዒ ሂወት ብባሕሪ ዝተኸተርኩም፣

መንእሰያት ኣሕዋት ኣሓት

ጻዕዳ ልቦም ሙቁራት ህጻናት

ዛራ ፍቕረን ለዋሃት ኣዴታት

ኣብ ላምፓዱሳ ዝኸተረኩም ሞት፣

ንዝክረኩም ኣለና ዝኽሪ ዉሽጢ

ኪኖ ብኣእዛን ዝስማዕ ብልቢ።

ንዝክረኩም ኣለና ብኣስተንትኖ

ማዕበል ሓዘን ንልብና ‘ናጸፍዖ

ካብ’ቲ ማዕበል ባሕሪ

ከፊኡና እንሆ!።

ኣብ’ዚ ዓመተ- መልቀስ ዕልልታ ዘይስመዖ

ኣብዚ ዓመተ-ቀብሪ መርዓ ዝተረስዖ

ገጽና’ናተሕጽበ ብንብዓት ኣዒንቲ

ዉሽጥና’ናተባሕጎገ ብንብዓት ልቢ

ንዝክረኩም ኣለና ዝክሪ ጥልቀት ዉሽጢ።

ንፋረድ ከኣ’ባ ምስ ሰብን ምስ ባሕርን

ተሓተቱ ንብሎም ብክቡር ሂወትኩም።

እንቋዕ ኣይሃለኹሞ’ዚ ናትና ህላወ

ነዚ ደረቕ ምንባር ካብ ሚዃን ዝረሓቐ

እንቋዕ ኣይሃለኹሞ’ዚ ንሕና ንነብሮ

ነዚ ሞይቶም’ምበር ተወልዶም ዘይስመዖ

ዓሕ!’ናበላዕካ ንብዓት ዝስተዮ።

ግደ ሓቂ !…

ሞይትኩም ኣይብልን’የ ተንሲእኩም ‘ምበር

ሓሲርኩም ኣይብልን’የ ከቢርኩም’ምበር

ተረጊምኩም ኣይብልን’የ ተመሪቕኩም’ምበር

ተፈንፊኩም ኣይብልን’የ ተሓሪኹም’ምበር።

ካብ’ዛ ምድረ ፍዳ ምድረ ከርተት

ብመገሻ ባሕሪ’ኹም ኣቲኹም ናብ ገነት።

ሕሰምኩም ከርተትኩም ኣብ ባሕሪ ተሪፉ

ኣብ ሰማያዊ ስፍራ መላእክቲ ዝበርሉ

ትረኣዩኒ’ለኹም ናብዝን ናብትን ትብሉ

ኣኽናፍ ጽድቂ’ብቊልኩም ብተምሳጥ ትበሩ።

ትረኣዩኒ’ለኹም ብዓይነ-ልቢ

ሕሰምኩም ቃንዛኹም ተወዲኡ ‘ምድሪ

ምስ ጻድቃነ ሰማይ ምስ ቅዱሳን ሰማእቲ

ብርሃን ተኸዲንኩም ጸጋ ሰማያዊ።

ንሕና ድማ!…..

ኣብ’ዚ ዘመነ-መርድእ ሓዘን ዝነገሶ

ኣብ’ዚ ዘመነ ብኽያት ሰሓቕ ዝተቀብጾ

እንሀና ጾይምና ጾመ-ሓጎስ

ብቐብሪ ተሃሪምና ብመልቀስ ንድበስ!።

ጸጋይ መሓሪ(ተመርዖ)

02/10/2014