ኣንታ እዚ ግጥሚ ክጥዕም
ንዘይ ይጋጠሙ ዘጋጥም
ግጥሚ መንግስቲ’ዩ ቃላት ሰራዊቱ
ልዕልና ዘይፈልጥ ዝኣቱ ቲሒቱ
እንታይ ድኣ ወደይ ሰማይን ምድርን ካብ ኣጋጠመ
ብፍትሓውነቱ ካብ ዘይ ሕመ
ዘየቃርቦም ድኣ ዘይዓርቆም
ነዞም ክልተ መንፈስ ዕጥቆም
ዘይፍትኖም ዋላ ኣየሕምቆም
ስለ ግጥሚ ኢሉ ዘይጥውቆም
ፍግም ኢሉ ኣብ ብርኮም ዘይወድቆም!
ግጥሚ ሓያል ምስ ዛዕጎለ ዕንቁ
ተራእዩ እንድ’ዩ ንባሕሪ ጠሊቑ
ካብቲ ሲኦል መስመስ ዝብል በርቁ
ነቲ ጥሉል ከውጽኦ መዝሒቑ
ንኽረምቲ ነጒዱ ኣንጔድጒዱ
ኣብቲ ሓጋይ ምስ እምነ ሓመዱ
ነቲ በርቂ ሴፉ ኣንበጥቢጡ
ነቲ ውሕጅ ምስ ገፈጥመፈጡ
ነቲ ኲናት ምስ ገፈል መዓቱ
ማይ ዝገብሮ ብኽእለቱ።
እናበለ ወትሩ ኣይመክኽን
ብቖሎ ጥጥቖ ኣይምብርከኽን
ድፍረት ካብ ሃለዎ ናይ ሰብን መልኣኽን
ኣብ ቅድሚ ሓቂ ካብ በለ ኣይሓንኽን
ንምንታይ ኣይዓርቆምን ሰይጣንን ኣምላኽን!?
ሽዑ’ኮ’ዩ ፍቅሪ ዝስተማቐር
እከይ ግብሪ ኣዕሚቑ ዝቕበር
ኣብ ጽፍሩ ዝኣቱ ፈገርመገር
ወዲ ኣዳም ደቂሱ ዝነብር።
ነዚ ድማ ግጥሚ’ዩ ዝገጥሞ
ኣብ ቅድሚ ፈጣሪ ‘ታይ ከይጽግሞ
እንካብ ኮነ ንሕውየታ ዓለም
‘ሞ ገጣሚ እንካብ ዘይበቅቕ ደም
ስዉር ካብ ኮነ ምስጢሩ ዘይሕለም
እንታይ ኣለዎ እንተጥፍኤ ቀለም።
እምበር ካልእ እንታይ ሓቂ’ለዎ
ጻድቕ ይበልዎ ሓጥእ ይበልዎ
ኣብ ሓቂ ዘይቀውም ወትሩ ምስ ኣድልዎ
ድማ ይብሃለሉ ሰይጣን ኣስሒትዎ
ንወዮ ሰይጣንከ መን ኣሰይጢንዎ?
ሓያል ግጥሚ ብሓይሉ ከስወንውን
ዘንጉ ተኻኺሉ እንክልምን
ተወንዚፉ ጽባቐን ቀዳውን
ሓቂቕ ሓቂ ኣዕጢቑ ከእምን
ዕርቂ ፍቶ ኢሉ ምስዝልምን
ፈጣሪ እውን ይጥዓስ ይኸውን!
እሞ ዘይዓርቆም ብኽእለት ጥበቡ
ኣብ ሎቆታ መዓር ኣንዘብዚቡ
ሓቅን ፍትሕን ብግህዶ ኣዋሲቡ
ዘይፈጥሮ ወዲ ጓሉ ሂቡ?
ወዲ ጓሉ ተረካቢ ሕድሪ
ተመረቕ ዝበሎ ፈጣሪ
ካብቲ ሰይጣን ስልጣን ከይሓተተ
ካብ ፈጣሪ ምሕረት እናጠለበ
ኮፍ ዘየብሎም ኣርሕቡ እናበለ
ዓለምኮ ብሰይጣን ጸቢቡ እናሃለ
ደቂ ደቁ እናተባዝሑ
ካብ ዕለት ናብ ዕለት እናተጨርሑ!
ጻድቕ ዝበልካዮ ካብ መንኰሰ
መን ድኣሞ ተኻሕሰ?
ውሒዶም’ወ ፈጣሪ ዝሓዙ
እቶም ኣመንቲ’ውን እናመንኮሱ
ደብሪ ደደይቦም እናፈለሱ
እተን ደናግል እውን ብድንግለን
ከይወለዳ ንዓለም መኒነን
ዕዝር እናበላ ምስ ንብረተን!
ከየፍረያ ሓድጊ ከይገደፋ
ምእንቲ ክርስቶስ ኢለን እናሓለፋ
ሰይጣን ክራባሕ ረኺቡ ዳጌፋ።
መፍትኡ ረኺቡ’ወ ወዮ ሰይጣን
ካብዚ ካብቲ ገፋፊጡ ሽሕጣን
እናመንጠለ ብግፍዕን ሓረጣን
ዓለም ገዚኡዋ በቲ ናቱ ስልጣን!
እሞ ግጥሚ እንታይ ይጽበሎ
ነዚ መዓት መዓስዩ ከዝሕሎ?
እምበር ሰይጣንሲ የፋጺዩ ዘሎ፡
እንተዝሕባእ መዓስ ተጸሊኡ
ሎምስ ከኣ ናብ ርሻን ወጺኡ
ማክሮፎን ጨቢጡ ከም ደራፋይ
ጠምጠም ይብሎ ንግዜ ተወናጫፋይ
ንወዲ ሰብ ጌሩ ተወላፋይ!
ሰብ ድማ ፎኪስ ከምዚ ሓሰር ንፋይ
ስስዐ ዝስዕሮ መህነፍናፋይ
ረሳዒ ኮይኑ ምዃኑ ሓላፋይ።
ለምንባ በልዎ ንግጥሚ በዓል ዜማ
ዕርቂ ፍጠር ክሃጥም ቁዘማ
“ኣምላኽ ምሕረት ኣዝዝ” ኢልካ ደጋግማ
ሰይጣን ድማ እቶ ናብ ዋዜማ
ማቕ ተኸዲንካ ሓሞኽሽቲ ድግማ
ናይቶም ዝነደዱ ብናትካ ላኼማ
ንስሓ ተናሳሕ ትዕቢትካ ኣህድማ
ነጺህካ ሕተቶ ከም ማርያም ኣርሴማ!
እወ ግጥሚ ሴፍ ሓቅኻ ኣንጔድጉድ
ፈውሲ ከይተማህዘ ሕማማት ከይስውድ
ጥዕና መኺኑ ቁልቁለት ከይወርድ
ወዮ ሕማም መናቱ ከይወልድ!
እቲ ሕማቕ ኣብ ሕማቕ እንተዂደደ
እቲ ጽቡቅ ስቅ ኢሉ እንተኸደ
በዓል ሕማቅ እናተወላለደ
በዓል ጽቡቅ ቁጽሩ እንተወሓደ
ክውለድዩ ሽዑ ዝገደደ
ሰኣን ዕርቂ ሓያላት ክልተ!
እሞ ግጥሚ ልቢ ወስኽ
ፈትን እምበር ንምንታይ ትሓንኽ
ሰኣን ሕቶ ሰኣን ፍትንፍትን
ርጉም ሰይጣን መሊሱ ከይስይጥን
ኣንታ ግጥሚ ንኹሉ ትፍትን
ፈትኖ’ንዶ ርእስኻ ኣይተድንን
ንፈጣሪ ኩሉ ንዝውንን
ተዛረቦ ልሳንካ ኣይከደን
“ፈጢርካዮ እንዲኻ ዋላ ሰይጣን ይኹን
ምሕረት ፍለጥ” በሎ ኣይትጨክን!
(ፈጣሪ እውን ይምሕሮ ይኸውን)
እወ በሎ፡
ወዲ ሰብ እኳ ፈሪዱ ዝምሕር
ንመዋእል ኢሉሞ ይፍክር
ንጽባሑ ሓሲቡ ይሓድር
ንስኻ ግን ኩሉ ኣብ ኢዱ ሕዱር
መሓሮንዶ ፍቅሪ ይኹን መዝሙር
ብኽንፊ ሕልና ሓቢርና ክንነፍር
ሰብ ክእደብ ሰብ እዚ ዘይሓፍር
“ሰይጣን ኣስሒቱኒ” እናበለ ከይነብር
ንፈጣሪ በሎ ዕርቂ ግበር።
ሰይጣውንቲ ድማ ግብርኹም ኣክቡ
ወተሃደራትኩም ካብ እከይ ሰሓቡ
መናፍስቲ እከይ ሰብ ዛዕጎል ጠንቋሎ
ኢድኩም ሃቡ በሎም ስራይኩም ይእከሎ
ንስኹም ተዕርፉ ሰብ ድማ ይቐሎ።
መላእኽቲ ድማ ሴፎም የቐምጡ
ሓጺን ወዲ ሓጺን ተደርብዮም የስቅጡ
ደጊም መሳሕቶ የለዉን መሓጥኦ
ኣይሂ ማይ ዘኒቡ ትእዛዝ የጥፍኦ
ወንጌሉ ኦሪቱ ፍቕሪ ይጽሓፎ
ዘዝተመነኻዮ ይኹን ሕቖፎ ሕቆፎ
መልኣኽ ሰብ ሳጥናኤል ብሓደ ይንፈሩ
ይዋሰቡ ድማ ፍሉይ ሰብ ይፍጠሩ!
ምስዚ ሰይጣን እወ ምስዚ ግናይ ግብሩ
ደቂሱ ዘይሓድር ፍቅሪ እንተጒሂሩ
በቲ ክፍኣት ግብሩ ንዓለም ወሪሩ
ካብ ዘጽድፈና ድኽመትና በርቢሩ
ዕርቂ ግበር ፍትሒ ንሓዋሩ
ሽዑ እንድዩ ሞት ሓጥያት ዕርቂ እንተተጌሩ!
ዊንታና ጸጋይ
ዝባን ስንቀይ
ነሓሰ 2016
