Issac Abraham
ክቡርን ዓብን ሰብ እዮም- መምህር ሙሳ! ኣብ ግዜ ናይ ህይወት ዘመኖም ምስኦም ምርኻብ ከኣ ትዕድልቲ እዩ። እብኣር ነዞም ኣቦና ቅድሚ ዓመታት ኣብ ቤት ጽሕፈት ክረኽቦም ምኽኣለይ ካብቲ ዘሐጉሰኒ እዩ። ከም ዝዓረፉ ዝገልጽ ትሕዝቶ ኣብ ጋዜጣ ሓዳስ ኤርትራ ሰፊሩ ምስ ነበብኩ ከኣ ሓዘን ተሰሚዑኒ – ከም ኩሉ ፈታዊኦም።
እታ ምስ መምህር ሙሳ ዝተራኸብናላ ህሞት ከመይ ነበረት? “ሮቢንሶን ክሩሶ” ከምኡ’ውን “ወርቅሃ” ዘርእስተን መጻሕቶም ብኣሕተምቲ ሕድሪ ዳግም ተሓተማ። ኣብቲ ኣብ ሆቴል ኢንተርኮንቲነንታል ዝታኻየደ ስነስርዓት ምምራቕ ከኣ ተሳተፍኩ። ብዘይካ ናይ መምህር ሙሳ: ካልኦት መጻሕፍቲ.. ከም “ንእስነት ቶም ሰውየር”፥ “ዓቢዱ ዶ ትብልዎ?”። “ጊታኖ” ዝኣመሰላ እውን ሻቡ ንሕትመትን ዝርጋሐን በቕዓ።
መቐጸልታ ናይቲ ስነስርዓት ድማ’ዩ ንመምህር ሙሳ ክረክብ ዝደረኸኒ።
ኣብ ቤት ጽሕፈት ባህላዊ ጉዳያት ህግደፍ ግዝያዊ ኦፊስ ተዋሂቦም ስለ ዝነበሩ ብኣጋኡ ተራኸብና። ካብቲ ዘዕለሉኒ ከካፍለኩም።
* “ወርቅሃ” ንኽደርስ ኣብ ዝሓሰብኩሉ ዝገበርክዎ ኣሎ። ብዛዕባ ህይወት ሓንቲ “ወርቅሃ” እተባህለት ኣመንዝራ ስለ ዝኾነት: መጽናዕቲ ከካይድ ኔሩኒ። ፈለማ ፍቓድ ናይ ብዓልቲ ቤተይ ሓቲተ። ደሓር ኣብ ኣስመራ ዘለዋ ኣብያተ መስተ ክንደይ ምዃነን ፈሊጠ። ኣብዚኣተን ዝሰርሓ ከምኡ ድማ ካብዚኣተን ወጻኢ ዝንቀሳቐሳ ኣሽሓት ኣመንዝራታት ክህልዋ ከም ዝኽእላ ተገንዚበ።
“ወርቅሃ” ኣርእስቲ መምረጺየይ “ወርቂ እያ” ዝብል ትርጉም ናይ ቋንቋ ግእዝ ንኽሕዘለይ እየ። እታ ኣመንዝራ ከኣ ንዘብለጭልጭ ህይወት ምሕራያ ንምምልካት እዩ። ሓደ ነገር ግን ቅር ኢሉኒ። “ወርቅሃ” ዝስመን ኣሓትና መጸውዒ ኣመንዝራ ከይኾና እየ። ስለዚ እታ መጽሓፍ ኣብ መወዳእታ ምዕራፋ: ካልአይቲ ወርቅሃ ዝስማ ተምጽእ። ንሳ ምስታ ቀንዲ ገጸባህሪ መማህርቲ ዝነበረት እያ። ምስ ደቃ እንከላ ስእሊ ናይ ቀደም መማህርታ ተርእዮም። ዛንታ ናይታ ካልኣይቲ ወርቅሃ ብሓጎስ ዝተመልአ ምዃኑ: ካልእ ግዜ ንትሕዝቶኡ ዝምልከት ተራኺ ሒዙ ከም ዝመጽእ ድማ ትገልጽ።
* ንሕና “ኣንበብቲ የብልናን” ኢልና ኢና ንዛረብ። እንተኾነ ኩሉ እቲ ራብዓይ ክፍሊን ልዕሊኡን ዝበጽሐ ከንብብ ይኽእል። ስለዚ “ኣንበብቲ የብልናን” ዘይኮነስ: “ዝንበብ ነገር ቀሪብናሎም ዲና? ዝብል ክምለስ ኣለዎ።
* እዚ ኩሉ መጽሓፍቲ ከበርክት: ኣብ ትርፊ ግዜይ እየ፡ዝፍጽሞ ኔረ። እዛ መዝገበ ቃላት ካብ ትግረ ናብ ትግረ ትሕዝቶ ዘለዋ ክሰርሕ ከሎኹ ግና: ንመጀመርያ ግዜ ምሉእ ግዜይ ሂበ እሰርሓ ኣሎኹ። ካብታ ናይ ትግርኛ ንላዕሊ ገጻት ገጻት ከኣ ኣለዋ።
* “በርናምጅ” ዝብል ኣብ ቋንቋ ትግረ ይዝውተር እዩ። እቲ ክኸውን ዘለዎ ግን መደብ እዩ። ሓንቲ ዓባይ ሰበይቲ (ዘመድ) ካብ ገለብ መጺአን: “እስከ እዛ በርናምጅ ትግረ ወልዓለይ” ምስ በለት: ቃልሰይ በርናምጅ ናይ ዘይምባል ኣቋሪጸዮ። ኣብ ዓረብ እንተመጻና “ኤረትርዩን” ይበሃል እዩ። ካልኦት ዜጋታት ሕራይ ከምኡ ይበሉና። ንሕና ንገዛእ ርእስንና ግዳ “ኤረትርያይ” ኢና ክንብል ዝግባኣና. ..
* መዋእለይ መንፈሳውን ዓለማውን መጻሕፍቲ ብቋንቋታት ትግርኛን ትግረን ኣበርኪተ። ድሕሪ እዛ መዝገበ ቃላት ሓንቲ መጽሓፍ ክትተርፈኒ እያ። እዚኣ ብዛዕባ ማርታ እታ ነፋሪት ክትጨዊ ዝፈተነት ትትርኽ እያ። ኣጋጣሚ ኣብ ህሞት ተሳፋራይ ኰይነ ኣሎኹ። ነቲ ፍጻመታት ድማ ብቐረባ ተኸታቲለዮ። እምብኣር እዛ መጽሓፍ ምስ ጸሓፍኩ: ካብ ናይ ምጽሓፍ ዓለም ክሰናበት እየ።
– ቀሺ መምህር ሙሳ ኣሮን ነታ መጽሓፍ ዛዚሞማ: ግዳ ኣይተሓትመትን ዘላ። ከምቲ ዝበልዎ ከኣ ካብ ምጽሓፍ ጥራይ ዘይኮነ: ካብ ምንባር ተሰናቢቶም። ነባሪ ታሪኽ እምበር ነባሪ ህይወት የለን። ኣምላኽ ኣብ መንግስቱ ይቀበሎም!
እዛ እትስዕብ ቪድዮ: ብምኽንያት ሞት እዞም ክቡር ኣቦና ብ Solomon Amanuel ተዳልያ ኣብ Youtube ዝተዘርግሐት እያ። ንሶሎሞንን ብጾቱን ድማ ዝድነቕ ሰነድ ስለ እቲ ምብርካቶም በዚ ኣጋጣሚ አመስግኖም።
