ብሳባ ኪዳነን ደሳለ በረኸትን
ምስ ዳሬክተርን መስራቲን እታ ረድዮ ጋዜጠኛ ቢንያም ስምኦን
ሕጂ ኸ ረድዮ ኤረና ኣብ ከረን ከም ዘላ እሞ ንሕሰብ፡ንኣስመራ ኣብ እትገብሮ ጉዕዞ ኣበይ በጺሓላ ምበልካ?
“ኣይ ርሑቕ ኣይከደትን ኣብ ጥቃ ሰሪን ሆቴል ኣያ ዛላ ጥቃ ብሎኮ ከረን በቃ” ቢንያም
ጸሓይ ፓሪስ ልዝብ ኢላ ሰባት ፍንሽርሽር ክብሉ ኣብ ዘፍቀደትሉ ጽቡቕ ወቕቲ እየ ምስ ቢንያም ስምኦን ማለት እቲ ዝለዓለ ኣካል ናይታ እንኮ ኤርትራዊት ሳተላይት ረዲዮ ናይዚ እዋን እዚ ኮይና ዘላ ረድዮ ኤረና ንከዕልል ዕድል ዝረከብኩ።
ቢንያም እቲ ምስ ምምስራት እታ ሓዳሽ ሃገርን ሓድሽ መራኸቢ ብዙሃን ትተክል ዝነበረት ሃገር ፡ምስቲ ደስ ዝብሎ ሞያ ንኽሰርሕ ዕድል ዝረኸበ መንእሰይ’ዩ። ቢንያም እቲ ፍርቂ ዕድሜኡ ዝሃበሉ ሞያ ሓደ ርብዒ ናቱ ሳተላይት ረድዮኡ ወኒኑ ንምምዕባላ ሓኾት ዝብል ዘሎ ሓደ ኻብቶም ኣብቲ ፉሕ ፉሕ ዝብል ትካል ሕጂ’ውን ዝበዝሐ ሰዓታቱ እናወፈየሉ ይርከብ ። ኣነሆ ድማ ሓሙሽተ ዓመቱ ኮይኑ።ንቢንያም ውሑድ ዘይኮነ እዋን ብዛዕባ ምዕላሉ ሓሲበ ግን ክላ ‘እንታይ ምስ ሰራሕና ኢና እሞ’ ብምባል ኣብ ጽላል ትሕትና እንዳ ኣዔመ ህድእ ኢሉ ስርሑ ይሰርሕ:: ኣነ ድማ እነዕልለሉ ኣጋጣሚ ሃሰው ክብል ምምስራት ሓሙሽተ ዓመታ ኣመኽንየ ሕቶይ ደገምኩሉ ሓሙሽተ ሕቶታት ብምኽንያት ሓሙሽተ ዓመታት ምምስራት ረዲዮ ኤረና፡፡
ሓሙሽተ እንተኾይነን ድኣ ደሓን ኢሉ ዝጀመረ ዕላልና ንንኡስ ሕቶታት ኣሰሰኖ ምእኩት ኢሉልለይ፡፡
እሞ ቢኒ ሓወይ ብምኽንያት ምምስራት ረዲዮ ኤረና መጀመርታ እሞ ዮሃና ክንብል”
“የቐንየልና”
ቢንያም ከም ድፍረት ደኣ ኣይቆጸረለይ : እሞ ንምዕላልና ኣፕረቲቮ ( መኽፈቲ) ዝኾነና ሕቶታት ጌረ እዚ ኤየር እንተሰበርክዎኸ?
“ግርም”
ቢንያም ኣብዚ ዝሓለፈ ናይ ስደት ዓመታትካ ብፍላይ ከኣ ኣብ እዘን ዝሓለፋ ሓሙሽተ ዓመታት ዝመሰጠትካ ደርፊ እንተላ?
“ ደርፊ . . . . ደርፊ እዋእ ሓያሎ’ዩ ሓንቲ ኣንተተባሂለ ግን ናይ ፍሒራ ባሕሪ ምበልኩ ፡ናታ ደርፊ ክሰምዓ ከለኩ ገለ እዩ ዝስመዓኒ. . .
እሞ ንፍሒራ እንተትረኽቦ እንታይ ምበልካዮ?
“ብራቮ የቐንየልና ምስ ህዝብኻ ዝወገንካ ምበልክዎ ፡ብሱል ደርፍታት በርትዕ!!”
እቲ ዝበዝሐ መደባት እታ ረድዮ ምስ ስድተኛታት ዝተተሓሓዘ ሓያሎ ብፍሩይ ካብ እትልለየሉ መደባታ እዩ. . .
“. . . እወ እንታይ እዩስ እቲ ህሉው ኩነታት ዝፈጠሮ ሃዋሁ እዩ፡ዝያዳ ናብቲ ስደተኛ ዛዝያ ኣላ እቲ ናይ ሜሮን እስቲፋኖስ ንጥፈታት’ውን . . . ሜሮን እቲ ተመክሮ ኣብቲ ጉዳይ ጽቡቕ ኣፍልጦ ጸኒሕዋ ንሱ’ውን ሓደ ናይ ገዛእ ርእሱ ዳይናሚክ ዝኾነ ነገር ክግበር ኣኽኢሉ”
ብመሰረቱ እታ ረዲዮ ክትሕሰብ ከላ እንታይ እዩ ኔሩ እቲ ቀንዲ ዕላማኣ ?
“ እምቧእ እታ ረድዮ ደኣ ከምቲ ርዱኣ እቲ ኣብ ዓዲ ዘሎ ካልእ መድያ ተሓሪምዎ ዘሎ ህዝቢ፥ ሓበሬታ: ደሃይ: ደሓር ከኣ መንቋሕቋሕታ: ተስፋ: ክትህብ ሓቦ ከተስንቕን ከም ረድዮ ዓቅማ ከተበርክት እንድዩ እቲ ሓሳብ፡ እቲ ኣብ ስደት ዘሎ ኤርትራዊ ዝሓሸ ዕድልን መንቋሕቋሕታን ስለ ዘለዎ ብዙሕ ዕድላት ስለ ዘለዎን ቀንዲ ዕላማና ናብቲ ውሽጢ ዓዲ ዘሎ እዩ:: ስለዚ ድማ ኢና ሳተላይት ክትከውን ብዙሕ ዝተጻዕረላ፡ ንሱ ከኣ እዩ እቲ ፍሉይነታ:: እምበር ብዙሓት ዕዉታት ረድዮታት’ውን ኣለዋ እንድየን ከም ንፈልጠን”
ከመይ እዩ ኣቲ ጉዕዞ?
“ ጉዕዞ ቀሊል ኣይኮነን:: ጌና ብዙሕ ዕንቅፋታት ኔሩ ፡ናይ ሓይሊ ሰብ፥ ናይ ፋይናንስ: ናይ ቴክኒክ ኩሉ ኢድካ እንዳሓወስካ እዩ ተኸይዱ፡: ብሓቂ እዚ ሕጂ ዘለናዮ ደረጃ ጌና ክንድቲ ዝሓለምናዮ ኣይተዓመመን:: ሕጂ ተነባቢት ረድዮ እያ ትኸውን ሓደሓደ እዋን”
ከመይ ማለትካ እዩ ተነባቢት ረድዮ?
“ማለትሲ ሰብ ኣርቲክል ይሰድድ ጽሑፍ ምንባብ ዝዓብለሎ ረድዮ ጥራይ ኣንተዘይትኸውን ደስ ምበለኒ: ንግዚኡ ግን ከምኡ እዩ ኣፍቂዱ ዘሎ ‘ቲኹነታት”
እባ ክሓተካ ዝደለኹ ረድዮ ኤረና ዋላ ከምቲ ኣብቲ መእተዊኣ ዘሎ ሎጎ ጀሚርካ ከም ዝበሃል ናጻ ረዲዮ እያ እዩ ዝብል፡ እቲ ዝበዝሐ ግን ወገናዊነት ናይ ሓደ ወገን ዝዕብልልዶ ኣይመስልን ኣብቲ ኽውንነት ማለት ብወገን መንግስቲ እንታይ መልሲ ይህብ ክንሰምዕ ኣይከኣልናን?
“ ኣበይሞ እቲ ጻዕርና ፍረ ሂቡ: እቲ ንገብሮ ፈተናታን ዕዉት ኮይኑ፡ ዋላ ከስምዓኪ ይኽእል’የ ኣብ ኣስመራ ሓደ ነገር ዜና ምስ ረኸብና ዘረባ ሓደ ሰሚኻ ምፍራድ ናይ ሜድያ ሞራል ስለ ዘይኮነ ፡ነቲ ጉዳይ ከነጻሪ ሓያሎ ፈተናታት ንገብር ኢና:: ግን ሓንሳብ ኣብ እዝንኻ ይዓጽዉኻ ሓንሳብ የሽካዕሉልካ እንዳ ኾኑ ኣምበር ናጻ ካብ ምግባራ ዓዲ ኣይወዓልንና”
ቢንያም እዚ ሓሙሽተ ዓመታት ኣብ ረድዮ ኤረና እንተዘይትሰርሕ: እንታይ ትሰርሕ ምሃለኻ?
“ እዚኣ ኣቦይ እዝጊ ጥራዩ ዝምልሳ. . . ሂወተይ ግን ኣብ ሜድያ እዩ ካብ 1992 ጀሚሩ ካልእ ስራሕ ኣይፈልጥን እየ ስለዚስ ኣብቲ ዓልኬል ክህሉ ባህርያዊ ይመስለኒ. . .”
እሞ ‘ዚ ዝሓለፈ ሓሙሽተ ዓመታት እንቋዕ ረድዮ ኤረና መስረትኩሉዶ ትብል?
“እወ፡ከመይ ደኣ፡ ንህዝበይ እቲ ዝግበኦ ግን ከኣ ዝተነፍጎ መሰል: መሰል ናይ ሓበሬታ ምርካብ ዝከኣለኒ ምግበረይ ሕጉስ እየ”
ግርም ካብ መደባት ሬድዮ ኤረና እባ ነየነይተን ትፈቱ? (እዚኣ ንኡስ ሕቶታት ሓንቲ እያ ኔራ)
መደብ ሽኮሪናታት
እምቧእ እሞ ንዮናታን ከይትምንጥሎ ተፍርሕ ኢኻ?
“ ኣይ ከመቢለ ከምቲ ናቱ ሰሓቕ ክኽእሎ ! ( ብሰሓቕ ክርትም እዳበለ) ደሓር ከኣ ንዒ ጓለይ ምስ መሳርሕተይ ከይተባእስኒ ብዙሕ ዝስሕበኒ መደባት ኣሎ እታ ናይ ሽኮሪናታት ግን ዝያዳ ምስ ሰማዕቲ ዘሎ ኢሂን ምሂና ደስ እዩ ዝብለኒ፡ብዛዕባ ምምንጣል ድማ ናቱ ቅዲ ኣለዎ ኩሉ ሰብ ኣብተድምዓሉ ምስራሕ እየ ዝኣምንን ዘተባብዕን ኣጆኻ ቕሰን ሸኾርተቲኖ!”
ቢንያም ሓደ ዕዉት መድያ ረድዮ ንኽህልወካ ዘኽእል ምስጢር እንታዩ እንተ ትበሃል እንታይ ምበልካ ?
“ዕላማኻ ምፍላጥ ፥ በቲ ኤቲክስ ናይ መድያ ምኻድ ፡ልዕሊ ኩሉ ግን ኣብዚ ናትና ክዛረብ እንተኾይነ ዕቱብነት ኣባላታ ኣብ’ቲ ስራሕ እዩ:: እቶም ኣበየ ቦትኡ ዘለዉ ኣባላታን ወኪላታን ነዛ ረድዮ ይጠቅም እዩ ዝበልዎ ብስራሕ ካብ ምርኣይ ድሕር ዘይብሉ እዮም:: ኩሉ ግዜ ስጡም ምውህሃድ ኣሎ ኣብ መንጎና:: ኣብ ትርፊ ግዚኦም እዮም ዝሰርሑ መብዛሕቲኦም ግን ኩሉ ግዜ ነታ ረድዮ ብዋንነታዊ መንፈስ ካብ ምስራሕ ኣየቋርጹን እዮም::”
እሞ በዚ ኣኣጋጣሚ እዚ ምስጋና ከብጽሓልካዶ?
“እወ ኩሉ ግዜ እንድየ ዘመስግኖም ፡ኣራጉድሎም እምበር”
ቢንያም ኣብዚ ናይ ሓሙሽተ ዓመታት ናይ ስራሕ ኣጋጣሚኻ ብፍሉይ ትዝከረካ ማለት ኣዝያ ተንካፊት ሁመት ኣየነይቲ ኔራ?
“ዋ ብዙሕ ብዙሕ! ካብዚ እዚ ክፈላሊ የጸግመኒ፡ ( ዝን በለሞ ቀጸለ) እቲ ኣብ ውሽጢ ዓዲ ዘሎ ሕሰም መነባብሮን ጸልማትን ኣዝዩ ኣዝዩ ክትኣምኖ ዘጸግም እዩ።ሓደ ሓደ እዋን ካብ ወኪላትና ዝመጸና ሓበሬታታት ኦይ እዚስ ኣማኒ ኣይንረኽበሉን ኢና እንዳበልና ንታሪኽ እንቐምጦ ብዙሕ እዩ።ካብኡ ዘይሰንፍ ድማ እቲ ኣብ ስደት ንኤርትራውያን ዘጋጥም ዘሎ መሰናኽል ዕረፍቲ የብሉን እዚ ኣብ መዓልቲ ምረት ከይሰማዕኩላ ዝሓለፈት የላን ስለዚ. . . እ ህ. . ከቢድዩ በጃኺ።”
ቢንያም ገለ ገለ ሰባት፥ “ እምቧእ እዚ ወዲስ ኣይደፈረንዶ?” ይብሉ እዮም ብስራሕካ ስለዚስ ከመይ ኢኻ ኣብ ፍርሒ?
“ፍርሒ ደኣ ከም ሰበይ ይፈርሕ እወ ግን ኣብዚ ጉዳይ እዚ ዘፍርሕ የብለይን ።ንህዝበይ እየ ዘገልግል ዘለኹ፡ ነቲ ዝተነፍጎ ናይ ሓበሬታ ምርካብ መሰሉ ጩራ ከነብርሃሉ ኢና ንጽዕር ዘሎና፡ኣሞ እንካ ሓበሬታ ክንዲ ዝበልና ክንፈርሕ ዘሎና ኣይመስለንን:: ክሳብ ሕጂ ዘጓነፈኒ ጸገም የለን ኣምላኽ ይመስገን!”
ካብ ረድዮ ኤረና ኣብ ዝመጽእ ሓሙሽተ ዓመት እንታይ ኢና ክንጽበ ንእትብል ሕቶ ብሓንቲ ቃል ግለጻ እንተትበሃል?
“ዕቤት”
ሕጂ ኸ ረድዮ ኤረና ኣብ ከረን ከም ዘላ እሞ ንሕሰብ፡ንኣስመራ ኣብ እትገብሮ ጉዕዞ ኣበይ በጺሓላ ምበልካ?
“ኣይ ርሑቕ ኣይከደትን ኣብ ጥቃ ሰሪን ሆቴል ኣያ ዛላ ጥቃ ብሎኮ ከረን በቃ”
እሞ ቢንያም እቅሬታ ሕቶታተይ እኳ ሓሙሽተ ኢለ ሰሲዐ’የ ግን ክትብሎ ትደሊ ነገር እንተሎ ዕድል ክህበካ ( እምቧእ ኣነ ደረቐኛ ምሽ ) ንወሃቢ መድረኽሲ መድረኽ ንዓኻ ክብል ብዝኾነ
“ኣነስ እንታይ ክብል ምደለኹ፡ ሓያሎ ጋዜጠኛ ኣብ ስደት ኣሎ፡እቲ ኣዝዩ ዝበዝሐ ግን ኣብቲ ዓውዲ ይነጥፍ የሎን፡ ስለዚ ድማ ካብ ረድዮ ኤረና ጀሚርካ ዋላ ኣብ ካልኦት ረድዮታትን ካልኦት መራኸቢ ብዙሓትን ብዙሕ ሃጓፍ ፈጢሩ ይርከብ።ስለዚስ በዚ ኣጋጣሚ ሓቢርና ንኽንሰርሕን ህዝብና ከነገልግልን ይላቦ::”
እሞ ቢንያም ዕላልና ቅድሚ ምዕጻውና ኣንታይ ክብል ምደለኹ ፡ሓቂ ዘረባ ኣብዚ ዝሓለፈ እዋናት ንኤርትራዊ መድያ ብዙሕ ብዛዕባ እታ ረድዮ ዝተገበረ ዕላላት የለን ከምዚ ወዲ ሰራሒ ማዕጾስ ዝብኢ ወሰዶ ዝዓይነቱ እዩ፡ እሞ ንዝቕጽል ሓሙሽተ ዓመታት ከ ክንደይ እዋን ኢና ንሓበሬታ ክፉት ክኾነልና ብወገንካ?
“ የቐንየልና እሞ ነቲ ጽቡቕ ፋል ወሸለ ኣብዚ ዝቕጽል መደብ ስራሕ ናይ ሓሙሽተ ዓመት ሰሲኑልና ሓበሬታ ደኣ ርኸቢ ኣይትስኣኒ”
የቐንየልና በል ቢንያም ሰሰላሙ !
“ሰሰላሙ!”
