ድኽነት ተዛማዲ ኢዩ

ንምዃኑ፡ ሓቂ ዲዩ ብሎተሪ ብዙሕ ገንዘብ ምስ በጽሓካ፡ እቶም ቁማልካ ባዕላቶም ኢዮም ዚረግፉ ዚብሃል። ውረድ ዘይበቕልኻ ኢዩ ነገራቱ።

ግን ንጽባሒቱ፡ እቲ ጎረቤተይ ኣብ ናይ ኵዕሶ ሎተሪ ተጻዊቱስ ሓምሳ ሚልዮን ዶላር ከም ዝበጽሖ ምስ ሰማዕኩ ብዙሕ ሰምቢደ። ናብ ምድንጻው ዘድሃበ ስምባደ። ብውሽጠይ ክቈጻጸሮ ዘይከኣልኩ ናይ ድኽነት ስምዒት ሃዊኹኒ።

ገለኻትኩም፡ ናትካስ እኩይ ቅንኢ ኢዩ። ቅዱስ ነይሩ እንተ ዚኸውን ኣይምሰምበድካን ትብሉኒ ትኾኑ። ኣይተጋገኹምን። ግን ብቐደሙስ ሓጎስ ብገንዘብ ኪመጸልካ ኢልካ እንተ ደኣ ሓሲብካ፡ ኣብቲ ግጉይ መገዲ ዶ ኣይኮንካን ዘሎኻ?

ዝኾነኾይኑ፡ ብድሕሪኡ፡ እቲ ኣብ ኣመሪካ ዚቕመጥ ዓርከይ ክልተ ሚእቲ ሚልዮን ዶላር ከም ዝሰዓረ ሰማዕኩ። ሽዑ’ሞ ቍሪ ኢዩ ዝኣተወኒ።

ነዘን ክልተ ሚልዮን ዶላረይ ሒዘ ናብ ዓዲ ኸድኩ። እቶም ምምጻአይ ዝፈለጡ ኣዝማደይ፡ ናይ ንጉስ ኣቀባብላ ገይሮምለይ። ገሊኣቶም ነታ ናይ ዕለት ድራሮም እኳ ብኽንደይ ጻዕርን ውርደትን ኢዮም ዚረኽቡዋ ነይሮም። ኣብ ዘእትዉኒ ጠፊኡዎም። ሽዑ ኣነ ብዘይ መጠን ሃብታም ኮይኑ ተሰሚዑኒ።

ርሑቓትን ቀረባን ኣዝማደይ ካብ ዓዲ መጺኦም። ኩሉ ዕዳኦም ሸፊነሎም። በሊዖም ሰትዮም። ከብቲ ገዚአሎም። ክዳን፡ ምግቢ፡ ኮታስ ኩሉ። ተሓጒሶም። ኪሰግዱለይ ቀንዮም።

ነገር ኪጽየቕ ግዲ ኢሉዎ ኾይኑ ግን፡ እቲ ኣብ ኣመሪካ ዚቕመጥ ዓርከይ’ውን ናብ ዓዲ መጺኡ። ሰለስተ ሰማይ ዚጠቅስ ባላሶታት ኣስሪሑ። ኣብታ እተወልደላ ዓዲ ድማ ካልኣይ ደረጃ ቤትትምህቲ ተኺሉ። ንልምዓት ሃገር ዚኸውን ድማ ክልተ ሚልዮን ዶላር ለጊሱ።

ግርም። በቲ ግብሩ ተሓጒሰ። ግን ካብ ናይ ንጉስ ደረጃ ናብ ናይ ዘብዐኛ ደረጃ ዝወረድኩ ኾይኑ ተሰሚዑኒ። ነቲ ናተይ ኩነታት ምስቲ ናቱ ምስ ኣነጻጸርኩዎ፡ ሓጎሰይ ንፋስ ኪኣትዎ ጀሚሩ።

እሞ፡ ብሓደ ሸነኽስ ሃብቲ ናይ ኣእምሮ ጉዳይ ኢዩ ’መስለኒ።

ዎ ኣምላኽ፡ ነታ ዘላትና ባርኸልና። ዘልመድካና ድማ ኣይትኽለኣና። ኣሜን።

source  facebook group Inquest of Freedom