ከሲርና እምበር

እዛ ጋንታ ፡ ጋንታ ቆልዑ መደሽቶ እያ። እታ ስእሊ ድማ ካብ ሰማንታታት እያ መጺኣ። ምናልባት ዶኾን ኣብ ፎቶ ወይና ወይ ፎቶ ምሕረትኣብ ዝተላዕለት ስእሊ ትኸውን? ኣብቲ ግዜ እቲ ጋንታ ኴንካ ናብ ቤት ስእሊ ምኻድ ልሙድ እዩ ዝነበረ። ጋንታ ሓገዝ እናበልካ ገዛ ገዛ ምኩሕዃሕ እውን ከምኡ ዝውቱር እዩ ነይሩ። እንሆ እምበኣር ሳላ እቲ ዝነበረ ልምድን ግዱስ ዓቃብን እዛ ሓወልቲ ዝኾነት ስእሊ ረኺብና ኣለና።

ንኺድ! ምስዛ ጋንታ ከላልየኩም እየ።

ካብ ጸጋም ንየማን ዓብዳት ኣማን፡ ናስር ቃስም፡ መሓመድ ዓብዴ፡ ዮናስ መሓሪ፡ ዓብዱራሕማን ሓጂ ያሲን፡ ዳኒኤል ሚኪኤል ደው ኢሎም ኣለዉ። ሙሴ ክንድያ፡ ካልድ ዓብደልዓሊም፡ ኤፍሬም ኣስመላሽ፡ ኣማን ዓብደልዓሊም ኮፍ ኢሎም ኣለዉ። ታኣምራት ገብረብርሃን ድማ ሓውሲ በጥ ኢሉ ኣሎ።

ብርግጽ መብዛሕቶም ኣባላት እዛ ጋንታ እንተወሓደ ምንኣሰይ እዮም። ብዛዕበኦም ግን ግዜ ዘይስዕሮ ዝኽርታት ኣለኒ። ካልድን ኣማንን ክዋኽብቲ ናይታ ጋንታ ኣሕዋት ደቂ ዓብደልዓሊም እዮም። ክልቲአም ኣሕዋት በዚ ዘመን እዚ ክውዳእ እዩ ኢልካ ዘይትሓስቦ ንፋጥ ኔርዎም። ብፍላይ እዛ ሓጻር ኣማን ብእጅገኣ ፊጥ እናበለት ተኣምር ዝኾነ ምልከት ኩዕሶ እያ ተርእየና ኔራ። ማራዶና! ዮናስ ወዲ መሓሪ ክሳዱ ንጸጋም ኣዘንቢሉ እንተ ጎይዩ ዘርክቦ ኣይነበረን። ክሳዱ ንየማን እንተጠውይዋ ድማ ነገር ኣላ ማለት እዩ። ብውልቀይ ከምኡ ዘይወጸሉ ዓጭዓጭን ወጫጭን ሰብ ገጢሙኒ ኣይፈልጥን እዩ ። ናስር፡ ብድፍረትን ብልሓትን ዝጻወት ነግናግ ተጻዋታይ እዩ ኔሩ። ዓብዱራሕማን ኣብ ሞንጎ ጸወታ ጣዓሞቱ ክበልዕ ንገዛ ይኸይድ ኔሩ ይብልዎ። ሕሜታ ኣይኮነን። ንሱስ ኣይገድፍን እዩ።

ሰለስተ ካብዛ ጋንታ፡ ሙሴ ክንድያ፡ ታኣምራት ገብረብርሃን፡ ኤፍሬም ኣብዛ ዓለም የለዉን።

ምስ ሙሴ ክንድያ ካብ ስድራ ተሓቢእና ኣክሮባት ክንገብር ናብ ወክማ ዕዳጋ ሓሙስ ንኸይድ ኔርና። ኣብቲ ገዛውቲ፡ ኪሮሳ ቻኑ፡ ሙሴን ኣነን ብኣክሮባት ፍሉጣት ኢና ዝነበርና። ኣየርን ቲፎን ሕዛእትና እዩ ዝነበረ። ብፍላይ ኪሮሳ ቻኑ ብሮል ኣክሮባት ዘርክቦ ሰብ ኣይነበረን። ብኢድካ ኣካያያድን ምትዕጽጻፍን ድማ ንሙሴ ዝወዳደሮ ኮቶ ኣይነበረን። ሙሴ ብእግርና ዝህከየና እዩ ብኢዱ ዝኸዶ ኔሩ። ፍሉይ ድፍረት ድማ ኔርዎ። ካብ ዝባን ማይ ቡንባ፡ ካብ ልዕሊ ዚንጎ፡ ካብ ቸንቶ ዴሺ ንድሕሪት ተገምጢሉ ይወርድ ኔሩ። ሙሴ ክንድያ!

ታኣምራት ገብረብርሃን “ኳቴ” ኢና ንብሎ ኔርና። እንተዘይተጋግየስ ኳትሮ ክብል እዩ መስለኒ “ኳትዮ” ኢሉ። ዶስ ሓጺር ስለዝኾነ ኢና ኳቴ ንብሎ ኔርና? ሓዲኡ እዩ። ካብ መደሽቶ ናብ ማይተመናይ ገዛ ምስ ቀየሩ ግዳ ሳጓ ቀይሩ ኔሩ። “ኣሞካቺ” እዩም ዝባሃልዎ ኔሮም። ናይጀርያዊ ኣጥቃዓይ ዳኒኤል ኣሞካቺ መን ኣሎ ዘይዝክሮ? እታ ሳጓ ካብ ስም እዚ ተጻዋታይ እያ ጠቢቓቶ። ታኣምራት፡ ዘይደክም ፍጥረት እዩ ነይሩ። ኩዕሶ መንጢልካዮ ዘይለቀካ ከም ታኣምራት ተሃላላኺ ሰብ ኣይነበረን። ኣሞካቺ!

ኤፍሬም ኣስመላሽ ነቕ ዘይብል ተርሲን እዩ ኔሩ። ካብ ገጹ ዘይትጠፍእ ፍሽኽታ ድማ ኔራቶ። ተጀሊዑ ጀሊዑ ወትሩ ፍሽኽ ምስበለ እዩ። ደስ ዝብል ግርህነት ድማ ኔርዎ። ሓደ እዋን ናይቲ ገዛውቲ ከልቢ፡ ቡኪ ድያ ኣንታ ስማ ኔራ? ባዕላ ኣብ ዝፋሓረቶ ዓሙቕ ጥውይዋይ ጉድጓድ ሓሪሳስ ብዙሕ ተሸጊራ። ንሕና እውን ማዕሪኣ ተሸጊርና። ብዘይካ ኤፍሬም ናብታ ጉድጓድ ኣትዩ ክሕግዛ ዝደፈረ ቆልዓ ግን ኣይነበረናን። ኤፊ!

ነዛ ዛንታ ንብዓት ክስዕረኒ እናደለየ ክዛዝማ እቀራረብ ኣለኹ፥-

እዛ ብፍቕርን ሕውነትን ተኾስኲሳ ዝዓበየት ጋንታሲ መን ፋሕ ጭንግራሕ ክትብል ሓሲብዎ ይፈልጥ? መንከ ኣባላታ ኣብ ክልተ ሰራዊት ተሰሊፎም ንሓድሕዶም ክቃተሉ እዮም ኢሉ ሓሊሙ ይፈልጥ? ግናኸ ሂወት ጽልልቲ ጽውጽዋይ እያ። ከምኡ ኾይኑ። ኣብቲ ኣብ ሞንጎ ኤርትራን ኢትዮጵያን ዝተገብረ ኲናት ታኣምራትን ኤፍሬምን ብወገን ኤርትራ ተሰሊፎም ኔሮም። ሙሴ ድማ ብወገን ኢትዮጵያ ተሰሊፉ ኔሩ።

ኲናት ኣረግቶት ዝምድሩሉ መንእሰያት ድማ ዝሞቱሉ ሕማቕ ዛንታ እዩ። ሎሚ ሰለስቲኦም መታዓብይቲ ነዛ ስእሊ እዚኣ ገዲፎሙልና ተሰዊኦም እዮም። እቲ ኣብ ሞንጎ ሃገራት ጥራሕ ዝመስለና ዝነበረ ኲናት ኣብ ሞንጎ መታዓብይትን ደቂ ጋንታን እውን እዩ ኔሩ። ተማሂርና ኣለና!

እግዝኣብሄር ንሰለስቲኦም ሰማእታት ኣብ ገነቱ የንብረልና። ኲናትን ወረ ኲናትን ዘይንሰምዓሉ ዘላቒ ሰላም ይግበረልና።