ሳባ ኪዳነ
ነታ ሮዛ ፍዮሪ ዝዓብለለታ ብራሼለተይ ጠንቀምቀም ክብል፡ ካብ ጸጋመይቲ ኢደይ ኣውጺአ ናብ የማነይቲ ኢደይ ክኣስር ተጋደልኩ። ግን ወይከ! ሓንሳብ ሸተት እናበለት፡ ሓንሳብ ነታ ተቐባሊት ሰንሰለት እንዳሰሓትክ ዋ፡ ሓንሳብ ገለ. . ካን ኣቕብጽ ኣቢላትኒ።
እታ ተጓዕዘኒ ዘላ ባቡር (ሜትሮ ቁጽሪ ሓደናይ ፓሪስ)፡ ድሮ ሰለስተ መዓርፎታት ሓሊፋ ኣብ ራብዓይ ደው ክትብል ከላ፣ ድሮ ኣብ ምእሳር ብራሼሌት ኣስታት 4 ደቓይቕ ጌረ ማለት እኮ’ዩ በልኩ ብልበይ። ( ኣብቲ ‘ሜትሮ’ ዝበሃል ናይ ፓሪስ መንገዲ ባቡር፡ ካብ ፌርማታ ናብ ፌርማታ ብገምጋም ብሓደ ደቂቕ ጉዕዞ ስለ ትኸዶ)።
እታ ፊተይ ዝነበረት ሰበይቲ፡ ብራሼለተይ ብዓወት ክኣስር ተመንያ ማለት ( ቦን ኮራጅ! ) ኢላትኒ ምስቶም ኣርባዕተ ሰሰሪቖም ዝርእዩኒ ዝነበሩ ኮፍ መባህልተይ ገደፈትኒ።
ኣነ ድማ እንታይ ከም ዘከራከረኒ እንድዒ፡እዛ ብራሼለተይ መውረዲኤይ ከይበጽሐ ብዓወት እንተኣሲረያ እቲ ዝኸዶ ዘለኹ ጉዳይ ክሰልጠኒ እዩ ብምባል ምስ ውዕሎይ ከቋርና ሓጸኩዋ።
ሽዑ ድማ ሓገዝ ከብ ዝኾነ ኣካል ከይቕበል ወሰንኩ፡ ባቡረይ ተሓንበበት፡ ምውራደይ ብኡኡ መጠን እንዳተቓረበ ማለት እዩ ።
ሽዑ ሓደ ምሕድግ ኢሉ ክዕዘበኒ ዝጸንሐ’ሞ ግን ከኣ ዘየቃለብኩሉ ተሳፋሪ፡ክሕግዘኒ ጥቓይ ጥራይ በጺሑ ዘይኮነስ፤ድሮ ውን ነቶም ኣብ ኣከባቢየይ ዝነበሩ ተሳፈርቲ ‘ንምእሳር ብራሼሌተ ዘይትኾኑ ዲኹም?’ ብዝብል ኣጠማምታ እንዳገንሐ ድንን ኢሉ ብጥንቓቐ ኣሲርልለይ፡ የቕንየለይ ኢለ ከይጽገብክዎ ድማ ክብታ ባቡር ወረደ። ብዓይነይ ቁሩብ ኣሰነኽዎ፡ ብልበይ ‘ክንደይ ይምቕለል’ እናበልኩ።
እቲ ኣሳሪ ብራሸሌተይ፡ ምስታ ኣብ ሃገረ ኡጋንዳ ዝፈልጣ ዛንታ ‘ክሊክ’ ጌርለይ።እወ ምስታ ሓንቲ ካብ ዓማዊለይ ዝነበረ ኣውስትራልያዊት ዓባይ ሰብ። ንሳን ዛንታ ‘እቲ ኣሳሪ ብራሼሌተን’።
እባ! ቅድሚኡ ፡ ኣብ ካምፓላ ከለኹ ንከባቢ 9 ኣዋርሕ ኣነ ዝበልኩ ሰራሒት ጌጻጌጽ ኮይነ ምንባረይ፡ነጊረኩም ኔረ ድየ ? በሉ ሕጂ ክበግረኩም።
ብኣጋጣሚ’የ ኣትየዮ፡ ናትካ እንተ ኢልካ ግን ከምኡ እዩ መስለኒ። እታ ካሜራ-ሌዲ ኮይነ፡ ሰንካቲት እንጀራን፡ ሓንባሺት ሕምባሻ፡ ኮይነ እንጀራይ ዝምእርረላ ዝነበርኩ ካምፓላ ናይ እዝኒ ሰሪሐ ፡ ናይ ክሳድ፡ ናይ እግሪ፡ ብራሼለት ወ. ዘ. ተ ሰራሪሐ ድማ ቅጫይ ኣርጉደላ ን ነበርኩ ። ኣምላኽ ይመስገን! ነቲ ጸድፊ መደያይቦ ዝገብረሉ!
ቀሊል ስራሕ ከይመስለኩም። ስነ-ዜጻጌጽ ርእሱ ዝኸኣለ ኣካል ስነ-ጥበብ ምዃኑ ባህታ እንዳፈጠረለይ ባህታ ውን ኣብ ቦትኡ’ዩ ።
በዕናቑ ተኸቢበ ድማ፡ ከይተፈለጠኒ ወጋሕ ፈታሕ ዘብለሉ እዋን ኔሩ። መብዛሕቲኦም ምስ ተሸጡ ይጉሂ። ይናፍቖም፡ ሕልምልም ይብለኒ እሞ ካልኦት ድማ ይሰርሕ ፡ በቃ ብዘይ ብኦኦም እታ መጽሓፊተይ ጣውላ ስኽፍክፍ ትብለኒ ። ከምዚ ደቀይ ክንሶምሲ ካባይ ርሑቕ ዝኸዱ ይመስለኒ። ግን ከኣ ሰልዲ ከም ዘድልየኒ፡ ይርድኡለይ ይመስለኒ።
እውይ ኣነ ግጥምታት ንደርፊ እንተዝሸይጥ ደኣ ከመይ ስክፍክፍ ምበለኒ እንድዒ? እቶም ምስ ዜማታቶም ዝመጹለይ ባዕለይ ክደርፎም’የ፡ እቶም ተነበብቲ ድማ . . ይንበቡ. . .
ኦ! ናብ ጉዳይና ዶ ንመለስ ሓቀይ ናብ ‘ቲ ኣሳሪ ብራሸሌተ።
ዓሚለይ፡ ደሓን ሻርሎት ኢለ ከሰምያ ንጽሑፈይ።( ሓቀኛ ስማ ደኣ እንታይ ኣምሲለ)
ኣብ ኡጋንዳን ከባቢኣን ተሳልጦ ስራሕ ነበራ። ካብኡ ንንዮው ግን ብዙሕ እዚን እዚን ኣይበለትኒን፡ ኣነ ውን ኣይጠወቕኩን። ዕማማ ዛዚማ ክኸይድየ ምስ በለትኒ ግን፡ ሓቂ ዘረባ ልበይ እየ ሞሊቐ። ሻርሎት ብርክቲ ዓሚለይ እያ ዝነበረት።
ብዙሕ ሻዕ ድማ ፡ እቲ ናይ እዝንታት ጥራይ ዘይኮነስ ዳርጋ ዝተንከፍክዎ ስራሕ እንዳሓሸሸት ትድግፈኒ ነበረት ካብቲ ንመሸጣ ዝስንክቶ ዝነበርኩ እንጀራን ሕምብሻ ዋላ ዓዲጋ ንኡጋንዳውያን መሓዙታ ትህቦም ምኽንያቱ ንሳ ኣንጀራ ትፈቱ ኣይነበረትን፡፡
‘ኣጆኺ’ ኢላ ድማ ንኣውስትራልያ ክትምለስ እንከላ፡ ንህያብ ዝኸውንን ንዓኣን ደስ ዝበለኒ ዓይነት ክሰርሓላ ኣቐዲማ ርብሕ ዝበለ ገንዘብ ከፊላትኒ ስለ ዝነበረት። ሰለስተ ለይትታት ኣብ ትሕቲ ናይ መብራህቲ ናይ ኮሞዲኖ ተጣቢቐ ኣብ ዓወት በጻሕኩ ።
ከም ውዕልና ድማ ኣብቲ ዕሙር እንዳ ኤርትራውያን ረስቶራንት ( ኦክላ) ተቋጸርና። ድሕሪ ናይ መፋነዊ ምሳሕና ድማ ። ቡን እንዳሰተና እቲ ጌጻጌጽ ነቲ ጣውላና ኣጌጾ። ህንን ኢላ ኣድነቐቶ ከም ወትሩ ። የቐንየለይ ኢላ ብሃንደበት የእዳዋ ሰዲዳ ሕቁፍ ኣቢላ ሰዓመትኒ። ‘ኣጆኺ ደቕኺ ኣጥሚኺ ኣይትሓድርን ኢኺ ኣምላኽ ኣሎ’ እንዳበለት ከተባባዓኒ እንከላ ሕጂ ኮይኑ እኳ ተሰምዓኒ።
ሽዑ ነቲ ህያባት እዚኣ ን ሮዛ፡ እዚኣ ን ናታልያ ፡ እዚኣ ንሰይቲ ቶማስ፥ እ እዚኣ ንሓትነይ . . . እንዳበለት ን 36 ሰባት፡ በብስሞም ኣብ ልዕሊ ቲ መጠቕለኒ ፕላስቲክ ጽሒፋ እንዳፈለየት ኣቀመጠቶ።
ኣብ ኣጋ ምኻድና ምስ ኮነ፡ ኣነ ድማ እታ ዘዳለኹላ ህያብ ክትከፍቶ ሃብክዋ። ከም መብዛሕትኦም ጸዓዱ ፡ ‘ምሕሳብኪ እኳ እኹል’ ብምባል ሓኒቓ ክትስዕመኒ ተጸበኹ። ምንይ ኢለ ዝሰራሕ ኩላ ብራሼለት ነበረት። ግን ነገር ከም ሰፍኢ ደኣ ተገምጠለትኒ፡ ንብዓታ ተዛሕወ። ሰምበድኩ ፡(ንመን እንታይ ትህብ ምፍላጥ እባ ሓደ መወከስ ዘድልዮ ጉዳዩ ) ብህያብ ክንድዚ ትንኽነኽ፡ ኣቢደ ክኽእሎ ብዘለኒ እንግሊዝኛ ተጣፋእኹ። ህድእ ከኣ በለትለይ።
ስእልታት ናይ ዓመት ቆሎዓ ኣዕብየ፡ ዘብጽሓሎም ሓደሽቲ ሰብ ሓዳር ፡ይጽበዩን እኳ እንተነበሩ ነቲ ብዝርድኣኒ እንግሊዝኛ ጌራ ጀለም እተብሎ ዝነበረት ዛንታ ግን ከኳልፋ ኣይደለኹን።
< ኣቦይ እዩ ኣዕብዩኒ. . . ኣደይ ብሂወታ እንከላ እያ ኣዘኽቲማትና፡ ንዓይን ነቦይን። . . . ክትፍለየና እን
ከላ ከም ሕልሚ ኮይኑ ይስምዓኒ. . . ደሕር ኣቦይ እዩ እቲ ዛንታ ነጊሩኒ።
ኣቦይ ካብቲ ኲን-ላንድ ዝተባህለ ክፋል ናይ ኣውስትራልያ ካብ ሃብታማት ስድራ ተወሊዱ።
ምስ ጎበዘ ድማ ኣብ ዩኒቨርስቲ ናይ ሲድኒ እንተዘይተማሃርኩ ኢሉ ስለ ዝነቐጸ ስድርኡ ከይፈዉ ናብ ሲድኒ ይሰድዎ። ኣብኡ ድማ ምስ ኣደይ ይላለ፡ ነታ ብስድርኡ ኣዝያ ፍትውቲ ዝነበረት፡ መዓብይቱን ዓርኩን ጠንጢኑ፡ ምስታ ኣማተር ተዋሳኢት ዝነበረት ኣደይ ቡንቀልቡን ተሳሒቡ ህልም ዝበለ ፍቕሪ ይጽመድ።
እቲ እዝጊ ዝሃበ ዘይከልኦ ኣቦይ ድማ ከመይ ዝበለ ናብራ የናብራ ፡እንተኾነ ኣደይ ሕጉስቲ ኣይነበረትን። ኣቦይ ዝከኣሎ ገበረ ግን ብቐጨውጨኣ ደኣ ዓመታት ኣሕለፉ። ምውሳእ ክትቅጾ ኣተባብዓ፡ ንዓይ ብሰራሕተኛ ከም ዝእለ ጌሩ ከቀባጥረላ ብዙሕ ሃቀነ። ፈተንኡ ግን ከንቱ ደኣ ኮነ።
ሽዑ ሓደ መዓልቲ ፍትሕ ሓተተት ኩሉ ቤተሰብ ጋን ኮኖ። ግን ካብ መዓልቲ ናብ መዓልቲ ሕጉስቲ እንዳኮነት መጸት። ኣቦይ ገረሞ፡ተኸታትላ ድማ ፡ ሽዑ ሓንቲ መዓልቲ ንዓይ ትምህርቲ ኣብጺሓ ናብ ገዛ ኣይተመለሰትን፡ታኽሲ ሒዛ ተመርቀፈት፡ ኣቦይ ውን ሰዓባ፡ ደሓር ኣብ ሓደ እንዳካፍተርያ ኣተወት፡ ንእለቱ ድማ ምስ ሓደ መንእሰይ ከንፈር ንከንፈር ግጥም ኣቢሎም ክሰዓዓሙ ርእዩ ኣቦይ ቀዘዘ ! ብሕርቃን ተለለወ ግን ከኣ ዝገብሮ ኣይነበሮን፡ ጉዳዮም ድሮ ኣብ መገዲ ፍትሕ እዩ ኔሩ።
ሽጋራ ኣውጺኡ ተሳሃሎ።
ኣደይ ኣዝያ ምሕጓሳ ከይተፈለጦ ተሓጎሰ። ደጊሞም ተሰዓዓሙ ፡ የዒንቱ ኣዞረ፡ እንገደና ጠመቶም ኣብ ዲእ ዝበለ ዕላል ነበሩ። ኣቦይ ነቲ ሰብኣይ ዳግማይ ምስ ረኣዮ ገጹ ኣይሓደሶን ፡ካበይ ከምጾ ከም ዘለዎ ግን ሕርብት በሎ፡ ፈቲሹ ፈቲሹ ግን ከኣ ኣይዘከሮን። ኣብ ከምዚ ኩነታት እንዳሃለዉ ኣደይ ብኣጋጣሚ ናብቲ ኣቦይ ዘለዎ ሸነኽ ቁሊሕ ምስ በለት ምስ ኣቦይ ዓይኒ ንዓይኒ ይጋጨዉ።
ኣደይ በረድ ትኸውን። ግን ዝግበር ኣይነበረን ፡ሓዲኣ ክትወልድ ኔርዋ!
ኣቦይ ብድፍረት ትኳዕኒኑ፡ ብትሕትና ተሰንዩን ይቐርቦም። ነገራት ኣተሃዳድአ፡ ብፍቕርኩም ቀኒኤ ብሓቂ ከምዚ ጌሩ ዘሐጉሰኪ እንተረኪብኪ ካብ ዘይሕጉስቲ ጌረ ዝሕዘኪ ጻዕዳ ይጽናሕኪ። ኢሉ ነቲ ፍትሕ ከቀላጥፎ ምኳኑ ምስነገሮም ደንጽይዎም። ክኣምኑ ኣይከኣሉን። ኣቦይ ክሳብ ሕጂ ስለምንታይ ከምኡ ምባሉ ስጊንጢር እዩ ዋላ ንዕኡ።
ኣቦይ ኣስዓበ ‘እዚ ክኸውን ግን ክልተ ነገራት ቅድም ክኸውን ኣለዎ’ በለ
ኣደይ ንብዓታ ደረሪዛ ዕትብ በለት። ብመጀመርታ ነገር ጓለይ ፈጺማ ምስ ኣዲኣ ከም ዘይትኸይድ፡ ካልኣይ ነገር ድማ፡ በለ ነቲ ሰብኣይ እንጠመተ ‘ መዓስ እንድዒ ሓንቲ መዓልቲ ግን ዝረኣኹኻ ይመስለኒ እሞ ከይሓባባእካ ግዳ ንገረኒ?’በሎ
‘ እወ ሓንቲ መዓልቲ ተረኣኢና ኣሎና፡ ኣብ ኣውቶቡስ ፡ መጽሓፍ ተንብብ ኔርካ፡ ሽዑ እታ ሓድሽ ብራሼለት ዝገዝአት ሰበይትኻ ብህንጡይነት ኣብቲ ኣውቶቡስ ከፊታ ክትፈትትሽ እንከላ ነታ ብራሸለተ ክትኣስረላ ሓቲትካ ግን ሃምካን ቀልብኻን ናብ ቲ መጽሃፍ ጌርካ ኣየቃለብካላኒ. . . ንበይና ብዙሕ ተቓሊሳ። ሽዑ ነታ ብራሸሌተ ክኣስረላ እንከለኹ ድቃስ ወሲድካ ኔሩ። ኣድራሻ ተለዋዊጥና’ በሎ. . .
‘እቲ ኣሳሪ ብራሼለት!’ ኣቦይ ጨደረ
ኣደይ መኸኸት ‘ እወ ምስኡ ስምዒት ሓቀኛ ፍቕሪ ይስምዓኒ ኣሎ’ ወሰኸት።
ኣቦይ መብጽዕኡ ከም ዝፍጽም ቃል ኣትዩ ፍትሕ ከቀላጥፎ ምዃኑ እኳ ደጊሙ እንተኣረጋገጸ፡ ኣደይ ግን ደጊማ ገዛ ኣይተመለሰትን።
እዚ ዛንታ እዚ ኣቦይ ምስ ነገረኒ። ብራሸለት ዝበሃል ከፍርሓኒ መዓትኮነ። >ኢላ ነቢዓ ኣንቢዓትኒ።
ነታ ህያብ ዝሰራሕኩላ ብራሼለት ድማ፡ ‘ ኣይክለብሳን እየ፡ ግን ኣብቲ ጥቓ ናይ ኣደይ ብራሸሌት ነቐምጠሉ ቦታ ከንጠልጥላ እንተፈቒድክለይ ክወስዳ?> በለትኒ
<ከም ድሌትኪ።> በልክዋ
እዋእ እዋ! ክሉ ግዳ ነዚ ክጽሕፍ ዝወረሉ ፌርማታ ባቡር ሓሊፈዮ።
05 06 2015
19 23 በቆጻጽራ ፓሪስ
