ኣብ መዓልቲ ናጽነት ካብ መምህር ናብ ፖሊስ ዝተቐየረ ሰብ

መኮነን ተስፋይ

መምህር ሃብተወልድ ምስግና ይበሃል። ኣብ ከረን ከም መምህር ኮይኑ ንንውሕ ዝበለ ዓመታት ዝሰርሐ ኣዚዩ በሊሕ ተጋዳላይ እዩ። መምህር ሃብተወልድ ጸሓፊ፡ ቀራጺ፡ ሙዚቀኛ ኮታ ኩሉ እዩ ምባል ይከኣል። ኣብ ቅርጻ ንኣብነት እቶም ንኣስመራ ድሕሪ ናጽነት ትፈልጥዋ ሰባት ኣብ ኣደባባይ ዝነበረት ዓባይ ምስሊ ርግቢት መምህር ሃብተወልድ እዩ ሰሪሑዋ። ንመምህር ሃብተወልድ ኣብ 2000 ዓም መኣዲ ስነ-ጽሑፍ ዓዲ ቐይሕ ናብ ከረን ዕድመ ስለዝተገብረላ ኣብኡ ፍርያት ስነጥበብ ከነቕርብ ምስ ከድና እየ ተላልየዮ። ሽዑ ኣዚያ መሳጢት ሓጻር ዛንታ ብዘይ ወረቐት ኣዘንትዩልና ነበረ። መምህር ሃብተወልድ ኣብ ሳሕል ከሎ ብሓያሎ ተረካብ ዘረባ እዩ ዝፍለጥ። ሓደ እዋን ናብቲ ናይ ሽዑ ናይ ሕብረት ሶቬት መራሒ ዝነበረ ሚካኤል ጎርቫቾብ ደብዳቤ ከም ዝጸሓፈሉ ይዝንቶ። ገለ ካብቲ ትሕዝትኡ “ንስኻ ንሰውራ ኤርትራ ኣይትፈልጦን ኢኻ ወይ ድኹም እዩ ዝብል ግምት ይህልወካ ይኸውን እንተኾነ ሰውራ ኤርትራ ከም ኣብ ጸልማት ካብ ርሑቕ ቦታ መብራህቲ ወሊዓ ትመጸካ ኦራል ሕሰቦ ኣቲ መብራህቲ እናቐረበ እናቐረበ መጽዩ ዓይንኻ ክደጉሓካ እዩ” ዝብል ነበረ። ሓደ መዓልቲ’ውን ንተማሃሮ ቤት ትምህርቲ ሰውራ “ዝናብ ካብ ፈጣሪ እዩ” ስለዝበሎም ከመይ ጌሩ ኣምላኽ ዝናብ የዝንብ ዝብል ሕቶ ሓተትዎ። ሽዑ ንድር ኢሉ “ኣንቱም ሰባት ኣምላኽ ሓደ እግሩ ኣብ ሪጎለ ሓደ እግሩ ኣብ ፊደል ፐ (ኣብ ናቕፋ ዝርከቡ ቦታታት እዮም) ረጊጹ ክሸነልኩም ኣይትጸበዩ በቲ ኮይኑ በቲ ግን ዝናብ ኣምላኽ እዩ ዝህበና” በሎም።

ናብ መበገሲ ኣርእስተይ ክኣቱ ። እዛ ስዒበ ዘዘንትወልኩም ዛንታ ከም ዘላታ ኣብ 2006 ቅናያት መዓልቲ ናጽነት ኣብታ ዳርጋ ባዕለይ ዘዳልዋ ዝነበርኩ ዓምዲ ኣጋጣሚ ናይ ጋዜጣ ሓዳስ ኤርትራ ከውጻኣለይ ንኣሰናዳኢ ጋዜጣ ሓዳስ ኤርትራ ዝነበረ ጳውሎስ ነታባይ ምስ ሃብኩዎ ከም ዘይተወጽእ ደኣ ኣይሓበረንን እምበር ነታ ወረቐትስ ሸሪቡዋ እዩ። ስለዚ ብሰንኪ ሳንሱር ናብ ኣንበበቲ ኣይበጽሐትን እሞ መሰል ሓሳብካ ብናጻ ናይ ምግላጽ ተጠቒመ እንሆ ሎሚ ድሕሪ ሸሞንተ ዓመት ናብኹም የብላ። መምህር ሃብተወልድ ቅንያት መዓልቲ ናጽነት ኮይኑ ኣብ ኣስመራ ኣብቲ ህዝቢ ኣብ ናይ ሰዓታት ናይ ምሸት ወጽዩ ዝስዕስዓሉ ቦታ ክዛወር ኢሉ ከደ። ኣብኡ ምስ ብጾቱ እናተዛወረ ከኣ ኣብ ሓደ ናይ ጽቕጥቅጥ ቦታ ሓደ መንእሰይ ንሓንቲ ጓል ክሃርማ ረኣየ። መምህር ንጡፍ’ዩ፡ ጎይዩ ከይዱ ነቲ ሃራማይ ሒዙ ብኽሳዱ ሓኒቑ ናብ እንዳፖሊስ ወሰዶ። ፖሊስ ከኣ ጓል ሃሪምካ ኢሎም ነቲ ወዲ ዳጎንዎ። መምህር ነቲ ወዲ ኣብ እንዳ ፖሊስ ኣብጺሑ ምስ ተመለሰ ናብ ምዝንግዑ’ዩ ኣትዩ። ብዙሕ ክየጸንሐ ግን ክልተ ዝባኣሱ ሰባት ረኣየ። ናብዚ ኦም’ውን ዘሊሉ ብምእታው ንኽልተ ተባኣስቲ ፈላልዩ ምስ ወድአ ንኽልቲኦም ከይሃድምዎ ብኽሳዶም ሓኒቑ ሕለፉ ብምባል ናብቲ ኣቐዲሙ ጓል ዝሃረመ መንእሰይ ዘብጻሓሉ እንዳፖሊስ ወሰዶም። ፖሊስ እንታይ ከም ዝኾኑ ሓቲቶም ነቶም ተባኣስቲ ከአ ዳጎንዎም። መምህር ሃብተወልድ ነዚኦም ኣብጺሑ ምስ ተመልሰ ምዝንግዑ ገዲፉ ኣብ ሓደ ብርኽ ዝበለ ቦታ ኮፍ ኢሉ ዝበኣሱ ከቋምት ጀመረ። መዓልቲ ናጽነት ኢሉ ክስዕስዕን ክጻወት ዝመጸ ዘይተሓስበ ናብ ፖሊስ ተቐየረ።

ንሱ ኣብ ብርኽ ዝበለ ቦታ ሓለዋ እናቐጸለ ከኣ ሕጂ’ውን ኣብ መንጎ’ቲ ብዙሕ ህዝቢ ካልእ ባእሲ ተዓዘበ። ናብዚኦም’ውን ነጢሩ ብምእታው ነቲ ባእሲ በቲኑ ነቶም ተባኣስቲ “ሕለፉ መን ዘምጻእልኩም ናጽነት ኢኹም ኣብዚ ሰብ ትርብሹ” እናበለ ናብቲ ብኡሳት ከም ዓማዊሉ ዘእሰረሉ ቦታ ወሰዶም፡ ፖሊስ ሕጂውን ዓቕሎም ኣይጸንቀቑን ነቶም ብኡሳት ሒዞም ኣሰርዎም። መምህር ሃብተወልድ ከኣ ናብቲ ደሞዝ ዘይክፈለሉ ስርሑ ተመልሰ። መስተ፡ ንእስነትን ካልእን ዝፈጠሮ ምግርጫው ኣብ ማእከል ህዝቢ ክህሉ ከም ንቡር ዝውሰድ ነገር እዩ። ብፍላይ ከኣ ደፊእካኒ ረጊጽካኒ ዘበገሶ ፈኩስ ጎነጽ ልሙድ እዩ። መምህር ናብ ስርሑ ተመሊሱ ከም ስርዓት ተባኣስቲ ክሃድን ዘምጽኦ ረሰዖ። እቲ ሳዕስዒት ተወዲኡ ሰብ ነናብ ገዝኡ ከይከደ እቲ ሓሓሊፉ ዝረኣይ ባእሲ’ውን ደው ስለዘየብል ኣብዚውን መምህር ሃብተወልድ ስራሕ ረኸበ። ሕጂውን ካልኦት ዝተባእሱ ረኺቡ ሕለፉ ብምባል ናብታ ለሚዱዋ ዘምሰየ እንዳፖሊስ ወሰዶም። ፖሊስ ብኹነታት መምህር ሃብተወልድ ተገሪሞም ነቶም ተባእስቲ ምስ ኣእተውዎም “ስማዕ’ስከ ንምዃኑ ንስኻ መን ኢኻ? ዘዝተባእሱ ጎቲትካ ተምጻእልና ሕለፍ” ብምባል ንዘረባውን ዕድል ከይሃብዎ ደፊኦም ናብቲ ቤት ማእሰርቲ ኣእተውዎ። ንሱ ከረድኦም ፈቲኑ ግን ክሰምዕዎ ኣይከኣሉን። ዝነበረቶ ኣማራጺ በትሪ ኣብ ነብሱ ከየዕለብሉ ከለዉ ሕራይ ኢሉ ምእታው እዩ። በዚ ከኣ ክዛናጋዕ ኢሉ ዝመጸ መምህር ሃብተወልድ ፈለማ ናብ ፖሊስ ጸኒሑ ናብ እሱር ተቐየረ። ድሮ መዓልቲ ናጽነት ፍርቃ ፖሊስ ኮይኑ ፍርቃ ከኣ እሱር ኮይኑ ኣሕለፋ።