እዛ ግጥሚ እዚኣ፡ ብዋና-ኣሰናዳኢ ጋዜጣ ዘመን፡ ሓው ኣማኑኤል ኣስራት (ወዲ ኣስራት) ተደሪሳ፡ ብ ነሓሰ 1999 ብሃገር ደረጃ ኣብ ዝተዳለወ ውድድር ግጥሚ፡ ቀዳመይቲ ብምውጻእ ናይ ገንዘብ ብልጫ ዝተሸለመት ግጥሚ እያ። ኣብ ጋዜጣ ዘመን ድማ፡ ብዕለት 6 መጋቢት 1999 ተሐትመት። ሓው ኣማኑኤል ምስቶም ንኤርትራን ቕዋማን ኣፍቒሮም፡ ንሕዝባ ባብ ዲሞክራስያ ዘርሓዉሉ ሰብ-ቕያ ጀጋኑ ብሕታውያን ጋዜጠኛታት ኮይኑ፡ ካብ ወርሓ-መስከረም 2001 ክሳብ ሎሚ ደሃዩ ከይተሰምዐ፡ ኣብ ማሕዩር መንግስቲ ኤርትራ ብዘይ ሕጊ ተሓቢሱ ይርከብ።
ኣበሳ ኵናት
ሐደ ነገር ጓዚሙ
ሐደ ነገር ተዳህዩ
ንህድኣት በሲዑ
ሐደ ነገር ኣቃሊሑ።
ኣብታ ክልተ የሕዋት ዝተሓላለፉላ
ኣብታ ክልተ የሕዋት ዝራኸቡላ
ኣብታ ክልተ የሕዋት ዝዋሰቡላ
ኣብ ቅርዓት ሂወትን ሞትን
ኣብ ወሽመጥ ጥፍኣትን ልምዓትን
ኣብ ሽንጭሮ ሻቕሎትን ሰላምን
….ተቐርቒሩ
ሓደ ነገር ተዳህዩ።
ሽዑ ሓንቲ ፍረ ዘርኢ….
ጭዓን ሰራውን እናተታፍአ
መሸላን ብልቱግን እናተጎናንአ
ዝእክቦ ስኢኑ ሓድሕዱ እናተበላልዐ
ብሰርቢ ንብዓት ተሰጕዳ
ካብ ነብሳ ጎሚዳ ነብሳ ተጎሚዳ
ካብ ነብሳ ነብሳ ዘሪኣ።
ኣብቲ ዛጊት ዘይተፈርሽሐ
ኣብቲ ኣየናይ ናይ መን ዘይፍለ
ዋሕዚ ደምን ማይን
….ተተኺላ
እታ ዘርኢ ግን…
ብቐዛሒት ጸሓይ
ብዘይሰክን ሰርቢ
ብፋሕሸዋይ በርቂ
ብዘንድድ ዝናብ…ተዓጂባ፡
ጋዕገልጠም ሐጺነ-መጺን ሰሊዃ
መልኣከ ሞት ተጊራ
ምኹን ሂወት ሓንጊራ
እነሆ ኣርኪባ ኣብ ኣዝመራ።
እታ ዘርኢ…
ካብቲ ዘይተፈርሽሐ ደምን ማይን
ናይ መን ናብ መን ዘይጠለለ
ማይኮዖኡ ዘይለለ
ባዕላ ኢያ በጺሓ
ኣብቲ ኣዝመራ ክትፍለ
ኣብቲ ኣዝመራ ግን…
የማና እንተማዕደወት
ንሱ ሰብኣይ ንሳ ጭሕሚ
ጸጋማ እንተማዕደወት
ንሱ መሬት ንሳ ተኽሊ
ደንጺዋ… ግራሞት ተዓንጊላ
ተደናዲና… ዝርያ ኸኣ ዘይኣመላ
ምስ መንያ ክትጽጋዕ ኣበይ ከተድቢ
ናበይ እያ ከተድምዕ ናበይያ ክትድርቢ
እቲ ኣዝመራ ግን ሕማቑ እቲ ዘይምጽባቑ
ብኣፍ ጥይት ሓሪሱ
ካዕቦ ሂወት ኣፍሲሱ
ሕልፈት ካብ ትንፋስ ጎልጕሉ
ንሞት ብሞት ዓጺዱ
ኣብ ዝባን ውሉድ ኣኺዱ
ኣማስያኡ ነታ ፍረ ኣብ ስግኣት ጠፍሊቑ።
እታ ፍረ….
መዓልትን ለይትን ሓደ እዩ ኮይንዋ
ሻቕሎትን ሩፍታን ተሓዋዊስዋ
ዓለም ኣብ ውሽጢ ዓለም
ኵናት ኣብ ውሽጢ ሰላም
እምነት ኣብ ሕጓ ጥልመት
ምስ ረኣየት ደንጺዋ።
ዘየደንጹ ድዩ’ሞ?
ንብዓት እንዳ ነታ ርስታ
ንብዓት መሬት ንመሬታ
ውሒዙ ውሒዙ ምስ ዛረየ
ባይታ ምስጨቀወ ምስጠልቀየ
ናውቲ ሸሚሙ
ንኹሉ ሰሊሙ… ምስራሰየ
ኣሻቡ ፈርዩ ባዴላ ኣፍራዛ
ኣሻቡ ፈልፊሉ መግነዚ ቃሬዛ
የግዳስ…
ኣሻቡ ድማ ይሃልኽ ኩሉ ይሻመዎ
ኩልና ንደልዮ ኩልና ንውንኖ
ነገር ኵናት እቲ ክፋኡ…
ኣዝመራኡ ከይደለኻዮ ምስዝበጽሕ
ፈንጤጋር መቓልሑ ማዕጾኻ ምስ ዝኹሕኩሕ
ሽዑ እዩ ኣበሳ ኵናት ኣበሳ ዘገማድሕ
ግና…
ከይፈተኻ ተሳስዮ
ከይደለኻ ተሳልዮ
ኣርሒቑ ክሃጥም ግን ኣ..ቤት ትጽልዮ!።
ኣማኑኤል ኣስራት (ወዲ ኣስራት)
