ኣሕመድ ናስርን ኣባሓጉኡ ናስር ባሻን (ናስር በ)

ኣብ መጋቢት 2014 ኣብ ሃገረ ሽወደን ብመስዋእቲ ዝተፈልየ ስውእ ኣሕመድ ናስር ብልሙድ ኣዘራርባ ብኣሕመድ ናስር ይፈለጥ እምበር ሙሉእ ስሙ ኣሕመድ መሓመድ ናስር ኢዩ። ኣሕመድ ናስር ወዲ ወዶም ንናስር በ ከም ዝኾነ ድሕሪ መስዋእቱ እየ ዝፈልጥ ዘለኹ፡፡ ብዝኾነ ብዛዕባ ኣሕመድ ናስርን ታሪኹን ንዝያዳ ነቶም እቲ ዝርዝር ዝፈልጡ ገዲፈ ብዛዕባ ናስር ፓሻ ወይ ከኣ ናስር በ ኣብ መጽሓፈይ መጽሓፍ እዝኒ መስታ ቀዳሞት ከምኡውን ተጋዳላይ ሰለሙን ጸሃየ ኣብ ዝጸሓፋ ዓባይ መጽሓፍ ማሰን መልቀስን ቀዳሞት ሰፊሩ ዘሎ ማሰ ከካፍለኩም።

ናስር ፓሻ ኣቡበከር ብግዜ ጣልያን ሓለቓ ኣሕሉቕ (capo dei capi) ተባሂሎም ኣብ ዓዲ ቐይሕ እናተቐመጡ፡ ንሓሙሽተ ምስሌነታት ዓሳውርታ ከመሓድሩ ሓላፍነት ዝተዋህቡ ፍሉጥ ሹመኛ ሳሆ ኢዮም ኔሮም፡፡

ባሻይ ተመልሶ ቀለተ ምስ ናስር ፓሻ ኣቡበከር፡ ኣዚዮም ይፋተዉ ከም ዝነበሩ ይዝንቶ፡፡ በዚ መሰረት ሓደ እዋን ምስ ካልኦት ፈተውቶም ወሲኾም ከምዚ ክብሉ ማሰ በሉሎም

ናስር ባሻ ካብ ሙስሊማን

ካብ ክርስትያን ተመልሶ ኣማን

ገብረመስቀል ወልዱ ካብ ትርጁማን

ነዚኦም ሒዝካስ እዝግኻ ምልማን።

ፊተውራሪ ገብረመስቀል ወልዱ በዓል ኣኹሩር ክኾኑ እንከለዉ ተመልሶ እማን ከኣ በዓል ዓዲ ቐይሕ’ዮም።

ኣብ ካልእ ግዜ ከኣ ከምዚ ኢሎም ማሰ በሉሎም ንናስር ባሻ

ናስር ባሻ

ኣቱም ናስር ባሻ ናስር ባሻ

ኣብ ዝኸድኩም ኬድኩም መናገሻ

ግጻ ዝመጻእኩም እንካብ ኣውሳ

ኣሓኹም ዝወፍራ ብዘይ ጓሳ

ይትረፍ ዝብኢ ዘይደፍረን ኣንበሳ

ነታ ቓላይ ንስኹም ንጉሳ

ንምድሪ’ውን ንስኹም ንጉሳ

ፍርቂ ለይቲ ትገብሩ ኣልዕሻ

ሰበይትኹም ባርኖስ መብኢ ጥሻ፡፡

* ማሰን መልቀስን ቀዳሞት ገጽ 400

* * *

ኣቶ ናስርበ ንዓሊ በ ጸዊዖም “ስማዕ ኣነ ምስ ሞትኩ ከምዚ ባህልና ጌርካ ሙሉቕ ኣቢልካ ከይተቕብረኒ መላቐስቲ ጸዊዕኻ ኢኻ ተቕብረኒ” በልዎ፡፡ ዓሊበ ከኣ “ዋእ ዓሌትና ዘይናትና ዘይናይ ኣቦና ኢሎም ኪኽልኩልኒ ኢዮም” በሎም። “እሞ ኣነስ ምስ በዓል ራእሲ ተሰማ ኣስመሮም፡ ሰቛር ባሕሮ፡ ደግያት ባህታ፡ ህብትማርያም ዘሞ ምስ ግራዝማች ሚዒተልካ ዝወዓልኩ እየሞ መልቀሰይ ክሰምዕ ባሻይ ተመልሶ ቀለተ ጸውዓለይ” በልዎ በዚ መሰረት ከይሞቱ ከለው ሽሻይ ተዳልዮ ባሻይ ተመልሶ ቀለተ ተጸዊዖም መጹ፡፡ ሽሻይ ተበሊዑ ተስትዩ ምስ ተወድአ፡ ባሻይ ተመልሶ ከምዚ ክብሎ ማሰ በሉሎም ፡-

ጎይታየ ጎይታየ ንጉስ ዓንተቦ

ኣንቱም ዓርኪ በዓል ፋን ብዓንተቦ

ኣንቱም ዓርኪ በዓል ኢኳ ብዓንተቦ

ኣንቱም ዓርኪ ቡላ፡ ዓርኪ ኣዲ፡ ዓርኪ ኣየት ብዓንተቦ

ኣንቱም ብሓቂ ደሊኹም ኣጋብቦ

ኣይትኽስትኑንዶ ብዓንተቦ

ደጊም ከኣ ሕርድ ከብሉልኩም’ዮም ሓንቲ ዓቦ

ድርብይ ከብሉኹም’ዮም ኣብቲ ጎቦ

መቓብርኩም ዔረ ዝኸበቦ፡፡

* እዝኒ መሰታ ቐዳሞት ገጽ 88