ንብዓት ተለማኒ! ጽውዕ ኔረካ’ሲ
ግዜኻ ኣኺሉ ሎሚ ከምዛ ጥንሲ
እንከይጸዋዕኩኻ ኣኺሉልካ ሕርሲ፣
ኣኽሊል ሞት ዘሕፍስ ማራቶን ብድዐ
ጸወታ ክጅምር ፊስክኡ ምስወቕዐ
ተጓይና ንሞት ተዳፊርና ምስ ሞት
ሓንቲ ከይፈለጥና እንታይ ከም ንዕወት
(ለካ ተማዊትካስ ሰላም’ዩ ‘ቲ ዓወት)
ሽዑ ክልተ ሞይትና ልብና መቓብር
ሽዑ ክልተ ሞይተን ዝውንጨፋ ሃገር
ሽዑ ኣሽሓት ሞይቶም ምኽንያቶም ሃገር
ሽዑ ብምልዮን ረቢሑ ጸላኢና ሽግር
ሽዑ ዘርኢ ዓለም ኮይንና ኣብቲ ጻዕዳ ዋህራር
ንሕና ብቐረባ ንሕና ኣብ ቀረባ
ኣብ እግርናን ኢድናን ሰንሰለት ላቔባ
ምድሪቤተናን ዶጎልናን ዙርያ ሓጹር ጋባ
ምስ ኮነ ካብ ሩሑቕ ርሒቑና ‘ቲ ቀረባ
ነጋሪትና ጽልኢ ለባምና ቅርሕንቲ
ታቱላና ንሞት ኣካልና ሰላዒ
ሰማይናን ምድርናን እሳት ተባላዒ
ኮይኑ እናሰሰነ
ዘዝኸደ ብጽንዓት እምበር
ብንብዓት ዘይስነ
ሓለፋ ዕሽነት ሞት ብስራት ኮይኑ
ኩርኩማ ዋጣና ሓርኢ ዝብኢ ዕጣኑ
ዜማ ሞሶንቆና ጨና ዕነ ኮይኑ፣
ዕነ ብዕንኡ ኣካል ውዲ መሬት ዝደኮዖ
ዕነ ብዕንኡ ዝዛረየ ደም የሕዋት ዘብኩዖ
ዕነ ብዕንኡ ርእሲ በዓል ትልሚ ዝወደቖ
ዕነ ብዕንኡ ዓጽመ ደም ዕሸላት ዝወረቖ፣
ሽዑ ‘ቶም ሚልዮናት
ፊስካ ዘውፈረና ፊስካ ጥፍኣት
ዘይተቐጽዐ ባህጊ ዘይተገርሐ ትምኒት
ብፍታው ንራርዎ ዘይሱሩት ኩርባታት
ሓሊምካ ዘይመልእ ጠሚትካ ዘይጎድል
ግብሪ ተጸይፍና ተሃንጢና ዕድል፣
ዘይርአ ጸላኢ ክንሕሉ
ምምዋትና ከይትሓበንናሉ
ምስዕዓርና ከይተሸለምናሉ
ዕድመ ጎበዝ ብፍታው ደስኪሉ
ቆራያት ኢድ ናይ ሓዊ ወሓላሉ
ምስ ኮነና፡
ሞት ዝጸየነቶ ካብ ዕርዲ መስዋእቲ
ንሞት ዝጸየነ ካብ ዓዲ ዓመጽቲ
ናብ ዘይፈልጦ ዓለም
ካልእ ገጽ ናይ ሳህራ
እንተሞትካ ሓላል
እንተለኻ መከራ
ብዓይኒ ዘይውዳእ ሰላሙ ምጭካኑ
ክትሰምዮ ዘቖጥዕ ‘ቲ ናይ ሞት ህርፋኑ
ባሕሪ ተቐባሊ ብስቕታ ኣብ ዝፋኑ፣
ተበራርዮምልና ዕድመ ጎበዝ
ዓዱ ዝፈንፈኖ ኸ ብመን ክሕገዝ!
ቀብርናን ሽግርናን ንልብና ኣቑሲሉ
ሞስኮት ዜና ዓለም ብሞትና ምውዓሉ
‘ቲ ቀባሪ ሳህራ ዘይነጋሪ
ጽርየት ኮላሊትና ኮይኑ መመስከሪ
‘ቲ ሰሓቒ ባሕሪ ዘይጠባሪ
ለሚዱልና ኣብ ከብዲ ዓሳ ቀብሪ፣
ናይዚ ኩሉ ከንሰይ ኣነ ውጻእ መዓት
‘ሞ ለሚነካስ ትኣብየኒ ንብዓት?
ሰብኣውነተይ ሸጥካስ ትኸልኣኒ ትብዓት፣
ከምዛ ዘይነብርካስ
ሎሚ ተኸፊትካ ትኣብየኒ ምዕጋት!
ለካ ኣብ መከራስ
ለካ ኣብ ምግደራስ
ለካ ኣብ ዓመጻስ
ለካ ኣብ ምክሳስ
ንብዓት የለን ካብ ልቢ ዝብገስ
ሓቂ የለን ናብ ልቢ ዝፈስስ
ኣብ ሰላም ‘ዩ ንብዓት ልቢ ስፈስስ!
30.07.2018.
ክብሮም ደሞዝ
