ናይ ቀደም ኣዕሩኽ

የውሃንስ ኣብርሃም

“ምን ልታዘዝ?” ፍሽኽታ ኣሰንዩ ብትሕትና ሓተተ እቲ ኣሳሳዪ።

“እንታይ ኢኻ ትበልዕ?” ነቲ ካልኣዩ ተወከሶ እቲ ረቃቕ ዳቢስታ ዝገበረ ቀይሕ ቀጢን። ብግቡእ ዝተስታረረት ሰማያዊት ካምቻን ባድላ ስረን ወድዩ ነይሩ።

“ዝኾነንዶ ኣዝዝ፣ ንስኻ ኢኻ ትፈልጦ ነዚ ቦታ” መለሰ እቲ እግሩ ኣሳፊሑ የማነይቲ ኢዱ ብልዕሊ እቲ ዝተጸግዖ ናይ ዕንጸይቲ መንበር ኣንጠልጢሉ ዝነበረ ካልእ።

“ኣንዲ ጎመን በስጋ፣ ኣንዲ ደሞ በየኣይነቱ።”

“እሺ ቦስ” ሕቖኡ ሰይሩ ኢድ ነሲኡ ከደ።

“ኣምሓርኛ ድኣ ካብ መዓስ?”

“ኣብዚ ስደት ብዙሕ ኢኻ ትመሃር፣ በቲ በቲ ድማ ኣብ ኣገልግሎት ብብዝሒ ኢና ንራኸብ” መለሰ መንበሩ ስሒቡ እናቐረበ።

“በል እስከ የዕልለኒ፣ ካብ እንፈላለ ዓሰርተ ዓመታት ሓሊፉ። ይገርመካ’ዩ!” ሓንሳብ ኣመንግው ኣቢሉ ድሕሪ ምስትንታን “ሂወት ምስ ጎይታ ከመይ ኣሎ?” ኣስዓበ።

“ደሓን’ዩ መስገን” መለሰ እቲ ካልእ ናብ መመገቢ ጣውላ ዓይኑ ተኺሉ። “ናትካ’ምበር ንገረኒ፣ ድሕሪ ሳልሳይ ወራርኮ ኣይተራኸብናን፣ ተኣሲሩ ሰሚዐ ነይረ”

ኣዕሚቑ ኣስተንፈሰ እቲ ቀይሕ ቀጢን። ገጹ ኣብሪሁ ድማ ክምስ በለ።

“ንወንጌል ኢልና እንሓልፎ መከራዶ ጠፊኡካ፣ ግን ንበረኸት’ዩ ዝኸውን ጎይታ ይባረኽ! ንሓሙሽተ ዓመታት ተኣሲረን ተሳቕየን ኢየ ብርግጽ፣ ሰይጣን ግን ኣይሰዓረንን!” ኣዒንቱ ብስምዒት ኣጨምቲሉ ናብ በሪኽ ማዕዶ ኣቋመተን።

ካልኣዩ ብዘይ ምቹእ ስምዒት ሓንሳብ ነቲ ወንጨርጨር ዝበለ ዛዕኳር ጸጉሪ ርእሱ እናጠቕለለ እንሓንሳብ ድማ ናብቶም ኣብ ፊቶም ፑል ዝጻወቱ ዝነበሩ ሰሰሪቑ እናጠመተ ብዓቕሊ ጽበት ተኸታተሎ።

“ሽዑ’ኸ?”

“ሽዑ ድኣ እቲ ንናይ ጳውሎስ መቑሕ ዝፈትሐ ጎይታ ንዓይ’ውን ፈቲሑለይ። ኣብ ሱዳን ዓመት ተቐሚጠ ነይረ፣ ኣብዚ ድማ ሕጂ ሸውዓተ ዓመታት ገይረ ኣለኹ። ካብ ዝመጽእ ጀሚረ ድማ ኣብዚ ናይ ካምፓላ ቤተክርስትያን የገልግን ኣለኹ – ከም ፓስተር።”

ኣብ ከናፍሩ ክምስታ ኣብ የዒንቱ ድማ ዕግበት ተነበበ። “ኣላ ኖህ ሓወይ! ስለዝመስከርካለይ ጎይታ መመሊሱ ይባርኽካ! እታ ፈለማ መዓልቲ ዝመስከርካለይ ትዝክራዶ?”

ርእሱ ብኣሉታ ነቕነቕ እቲ ካልኣይ።

“ኣብ ታዕሊም ኣብ ሳዋ ኣብታ ወዲ ዓሊ ዝድቅሰላ ዝነበረ ሶሌታ ሰንበት መዓልቲ ኢያ ነይራ።”

ኖህ ናብ ሓደ ናብቲ ቤት መግቢ ዝኣቱ ዝነበረ ጸሊም ክነሱ ፍረገጹ ግን ሓበሻ ምንባሩ ብቐሊል ዝልለ መንእሰይ ኣናኣማዕደወ ኢዱ ንሰላምታ ኣወጣወጠ።

“ሄሎ ኖህ ዓርከይ!” ብዓውታ ኣድሃየ እቲ መንእሰይ።

“ሶሪ ሓንሳብ ሰላም ክብሎ “ ተንሲኡ ከደ። ምስቲ ዓብዪ ፍሽኽታ ለቢሱ ዝተጸበዮ ወዲ ብመንኩብ ተጎናነጹ።

“እሂ ዝዓርከይ! ድሓን ዲኻ ድኣ?” በለ እቲ ጸሊም ወዲ፣ ጉርሒ ብዝነበሮ ቃና እናተዋዘየ።

“እሂ እንታይ ከፊኡካ?”

“ኣይ… ዋላ! ኣነስ ካብ መዓስ ድኣ ካብ ማሕበር ሰኽራማት ደረፍቲ ናብ ማሕበር ቅዱሳት መንፈሳውያን ሰጊርካ ኢለ ኢየ” በለ ሳንቲም ኣውጺኡ ኣብ ልዕሊታ ናይ ፑል ጠረጴዛ ሪጋ ንመትሓዚ እናኣቐመጣ።

ሓደ ስንኩል ኢዱ ሓበሻን ሓደ ህንዳዊን ይጻወቱ ነይሮም። እቲ ሓበሻ ጸጸኒሑ ነታ ኣብታ ሓላቕ ኢዱ ዝቐርቀራ ሽጋራ እናሰሓበ ቅድሚ ካልእ ኩዕሶ ምህራሙ ነቲ ጠረጴዛን ነተን ኩዓሳሱን ኣብ ከቢድ ሓሳብ እናጠሓለ ብፍልስፍናዊ ዝመስል ኣጣምታ የጽንዖም ነበረ። ብብርቱዕ ጥንቃቐ ድሕሪ ምዕቃን ድማ ንሓንቲ ኣብ ዘይምቹእ ጸግዒ ዝነበረት ኩዕሶ ብፈኩስ ሃሪሙ የእተዋ።

“ብራቮ ግልገለ! ኣስሊ ህራም!” ጨደረ እቲ ምስ ኖህክዛረብ ዝጸንሐ መንእሰይ።

“ምስዚ መንፈስ ድኣ እንታይ ኣራኺቡካ?” ብዘይ ስክፍታ ሓተተ።

“ናይ ቀደም ዓርከይ ኢዩ።”

“ናይዞም ኣብ ካምፓላ ዘለዉ መንፈስ ፓስተር ኢዩ”

“እወ ነጊሩኒ።”

“ዎ! ኣንታይከ ዘሸግር ኣለኒ ‘ዚዓርከይ! ካልእ ሰብ እንተትኸውን ተጠንቀቐሉ ምበልኩኻ፣ ንዓኻ ግን ንሱ ኢዩ ክጥንቀቐልካ ዘለዎ!” ዋዛ ከምዝነገረ ክርትም ኢሉ ሰሓቐ።

“ሎሚ ምሸትከ’ሞ እታ ናይ ብቐዳማይ ንድገማዶ? ንዓኻ ትኸውን ቦታ ክወስደካ ኢየ! ሺሻ፣ ጫት፣ ሓራሙ፣ ጩርማ..ኩሉ ዘለዋ! ንኣርቲስት ትኸውን ቦታ!”

“ምስዚ ዓርከይ ምስወዳእኩ ክድውለልካ’የ” በለ ህውኽ እናበለ።

ምስተመልሰ ሻሽ ዝመስል እንጀራ ዝተነጸፎ መሰጣሕ ኣብቲ ጣውላ ተነቢሩ ጸንሖ። ኣብ ማእከል ብሓምሊ ዝተሰርሐ ስጋ፣ ኣብቲ ወሰናወሰን ድማ በዓል ሽሮ ዓደስን ኣልጫን ከቢቦም ነበሩ።

“ካብዞም ናይ ኣስመራ የዕሩኽትና ኢዩ፣ ውዕይ ኢሉ’ዩ”

“ምሽ?” በለ እቲ ሓደ ናይ ጥርጣረ ደመና ኣብተን ትኩራት የዒንቱ እናዓሰለ።

“ክሓተካ ኖህ ሓወይ፣ ክርስትያናዊ ሂወትካ ከመይ ኣሎ? ከምቀደምካ ትብርትዕዶ ኣለኻ?”

“ድሓን’የ። ኣይገርመካን ዴቭ እቲ ፈለማ ዝኣተኹሉ ነዚ እንጀራ ጻዕዳ ጣፍ ኢዩ ኢለን ሰሙን ሙሉእ ኣብሊዐናኒ ኣይፈለጥክዎን…ጻዕዳ ጣፍ መዓስ ምስረኣናዮ ከነለልዮ! ጻዕዳ ጣፍ ጻዕዳ ኣይኮነን ደባን ኢዩ – ሓመኹስታይ።”

“ተዓንቂፍካ ዲኻ ኖህ ሓወይ? ኣብ ክርስትና ምዕንቃፍ፣ ምውዳቕ፣ ምትንሳእ መናብርትና ኢዩ፣ ንገረኒ”

“ሕራይ ከዕልለካ ኢየ፣ ድሕሪ መኣዲ ይኹነልና”

ዳዊት ኣዒንቱ ከዲኑ ንጸሎት ደነነ።

“እግዚኣብሄር ጎይታ ሰራዊት፣ ነዛ ዕለትን ደቒቕን ስለዝሓሎኻና ተመስገን። ብምሕረትካ ንኣገልግሎትካን ጸጋኻን ስለዝመረጽካና ተመስገን። ካብ ውዲት ሓይልታት ጸላም ከተድሕነና እጽሊ ኣለኹ። ስለዚ መኣዲ ነመስግነካ ኣሎና። ብስም የሱስ ኣሜን።”

ንነዊሕ ካልኢታት ብዘይካ’ቲ ጦቕማዕታ ናይ ዝሕየኽ ዝነበረ ኮላሶታት ካልእ ኣይተሰምዐን።

“ይርግኣለምከ? ደሃያ የብልካን? እቲ ንስኻ ዝተኣሰርካሉ ወርሓት ኢያ ንሳ’ውን ተኣሲራ” በለ ኖህኣብ መንጎኦም ክሰፍን ጀሚሩ ንዝነበረ ዘይቅዱው ውጥረት ንምፍዃስ።

ዳዊት ነዊሕ እህህታ ንደገ ሰደደ።

“ኣብ ማይ ስርዋ ተኣሲረ ከለኹ ክንሸይን ምስወጻእና ስሕት ኢለ  እርእያ ኔረ። ብድሕሪኡ ኣነ ንዊዓ ተወሲደ፣ ንሳ ግን ኣብኡ ነይራ። ብድሕሪኡ ኣብዚ ምስመጻእኩ ሓሚማ ንሕክምና ሓንሳብ ምስወጸት ገለ ሰባት ከምዝረኣይዋ ሰሚዐ። ይርግኣለም ኣምላኽ ንፈተና ዝሓረያ ናይ እምነት ጅግና ኢያ!” መትንታት ግንባሩ ብመጠኑ ተራእዩ።

ናብቲ መኣዲ ኢዱ ክሰድድ እንከሎ እንከሎ ነቲ ልምሉም ቆርበቱ ጨማዲዶም ዝተሳእሉ በሰላታት ኣብ ዝባን ኢዱን ጉንቦ ኢዱን ይርኣዩ  ነይሮም።

“ናይ ፌሮ?”

“እወ” ብሓጺር መሊሱ ዝን በለ።

“ሓንቲ ሕቶ ጥራሕ ኢዮም እኮ ዘቕርቡልካ፣ ኣይኣምንን ኢየ በል – ሕጂ ገዛኻ ክትምለስ። የሱስ ኣብ ልዕሊ ማእሰርትን ሞትን ጎይታ ምዃኑ ኣይርድኦምን’ዩ። ኣይገርመካን ግን ናይ ክርስትና ነገር!”

“ይገርመኒ’ምበር፣ ኣዝዩ ይገርመኒ” መለሰ ኖህ ነታ ቤት መግቢ ብኣዒንቱ እናኾለላ። ኣብ ካምፓላ ዝበለጸት ናይ ሓበሻ ቤት መግቢ ስለዝኾነት ኢዮም ኣብኣ ተቛጺሮም። ኩላቶም ኣብኣ ዝነበሩ ግን ሓበሻ ጥራይ ኣይነበሩን። ካብኣቶም ፍንትት ኢላ ኣብ ዝነበረት ጣውላ ክልተ ቻይናውያን ዝመስሉ ነይሮም። እቲ ሓደ እንጀራ ምስ ዝግኒ ኢዩ ኣዚዙ። ድሕሪ ኣብታ ብያቱ ነቲ እንጀራን ጸብሕን ኣጸቢቑ ምቁምጣዕ፣ ዳርጋ ሓሓፊሱ ይኹልስ ነበረ። ኣብ ስግሮም ዝነበረ ኩርናዕ ድማ ማይ ጋዝ እናሰተዩ፣ ነቲ ምስቲ ስንኩል ኢዱ ሓበሻ ዝጻወት ዝነበረ ወዲ ዓዶም ዝከታተሉ ሰለስተ ህንዳውያን ነይሮም።

“እዚ ገዛ ሓበሻ ድዩ ዋናኡ?” ሓተተ ኖህ።

“እወ፣ ሰበይቱ ግን ኢትዮጵያዊት ኢያ” ነታ ዝሓይካ ዝነበረ ውሒጡ መለሰ።

“ቤት መግቢ ኦክላ? ኦክላ እንታይ ማለት ኮን ይኸውን?”

“እንድዒ፣ ኣነ’ውን ቅድሚ ሕጂ ኣይሓሰብኩላን፣ ብሉጋንዳ ኢዩ ዝኸውን”

“ኣብዚ ከባቢ ብዙሓት ሃብታማት ኤርትራውያን ኣለዉ ሰሚዐ”

እቲ ሓደ ዘባል ክምስታ ክምስ ድሕሪ ምባል መለሰ።

“ርብዒ ናይቲ ኣብ ቤት ጎይታ ጥራሕ ጁባኡ ዝማላለስ ዕጋበት ዘለዎም ግን ኣይመስለንን። ኣምላኽ ይባረኽ!”

ኖህ ደጊሙ ነቲ ቦታ ብዓይኑ ዞሮ። እቲ ጠዋሉን ሰድያታትን ኩሉ ካብ ዕንጸይቲ ዝተሰርሐ’ዩ ነይሩ። ደሓር’ውን ናብ ናሕሲ እቲ ኣጽሊሉሎም ዝነበረ ዳስ ሓረግ ኣንቃዕረረ። ኣብ መወዳእታ ድማ ቆላሕታኡ ብመንጎ’ቲ መካበብያ ልኢኹ ንነዊሕ ካልኢታት ናብቲ ነዋሕቲ ህንጻታት ተጨቓጪቖሙሉ ዝነበሩ ማእከል ከተማ ጠመተ። እታ ዝነበርዋ ቤት መግቢ ኣብ ጎቦ ዝተደኮነት ስለዝነበረት እቲ ኣብ ካምፓላ ካብቶም ነዋሕቲ ዝበሃል ብዓቢ ናይ እንግሊኣዝኛ ፊደላት ‘ኪንግ ፉሃድ’ ዝተጻሕፎ ሰማያዊ ፓላሶ’ውን ኣብ ትሕቲኦም ኢዩ ነይሩ።

“እዞም ዓዲ ጽቡቕ ህንጻታት ኣለዎም ጎደናታቶም ግን ኣይግድን! ማርቻፔዲ ዳርጋ የብሎምን!”

“መንፈስ ቅዱስ ግን ብብርቱዕ ይዓየሎም ኣሎ! ኣብ ምብራቕ ኣፍሪቃ ከምዚኣቶምን ከም ኬንያውያንን ብኣገልግሎት ጎይታ ዝሰጎመ የልቦን”

ብኢዱ እቲ ኣሳሳዪ ንኽመጽእ ኣመልከተሉ። ንሱ’ውን ጠበቕ በለ።

“ለኔ ኣንድ ውሃ” ናብ ኖህ ተጠውዩ፣ “እንታይ ኢኻ ትሰቲ?”

“ንዓይ’ውን ማይ፣ ካምፓላ ቁሩብ ሙቕት ኣለዋ”

“ሁለት ውሃ”

ናይ ኩሉ ጠቕሊሉ ሕሳቡ ሃቦ።ድሕሪ ሒደት ደቓይቕ ክልተ ጎማ ማይን ማልሶምን ሒዙ ተመልሶም። ዳዊት ነታ ደብተር ሕሳብ ከፊቱ ነታ ቅርሺ ድሕሪ ምውሳብ ነተን ሰናቲም ገደፈሉ።

“ኣመሰግናለሁ!”፣ ዝተጋነነ ፍሽኽታ ኣርእዩ ናብ ካልኡ ከደ።

“በል ሕጂ ኣዕልለኒ፣ መንፈሳዊ ሂወትካ ከመይ ኣሎ?”

ነታ ማይ ፍርቃ ሰትዩ ኣፉ ድሕሪ ምጽራግ ገጹ ኣዕቲቡ ተጸበዮ።

ኖህ ቅንዕ ኢሉ ጠመቶ።

“መንፈሳዊ ሂወት የብለይን” ነዚኣ ኢሉ ኣቋረጸ።

“ዓለማዊ ኮይነ ዲኻ ትብለኒ ዘለኻ?” በለ እቲ ካልእ ስንባደኡ ክቆጻጸር እናፈተነ።

“እወ።”

ንነዊሕ ካልኢታት ኣብ መንጎኦም ከቢድ ስቕታ ሰፈነ። ኖህ ናብቶም ፑል ዝጻወቱ ዝነበሩ ዳዊት ድማ ናብ ኪንግ ፉሃድ ገጾም ኣዒንቶም ተኸሉ።

“ንስኻ እኮ ኢኻ ንዓይ ነቲ ኣብ መስተን ሽጋራን ተኣሊኹ ዝውዕል ዝነበረ ሰብ መስኪርካ ለዊጥካኒ! ንስኻ እኮ ኢኻ ምስ ጎይታ ኣፋሊጥካኒ፣ ዓቢ ውህበት ቃል ዝነበረካ ሰባኺ ዝነበርካ! ከመይ ጌርካ ወዲቐ ትብለኒ!”

እቲ ሓደ ኣይመለሰን።

“ደሓን ኖህ ሓወይ፣ ኣብ ጉዕዞ ክርስትና ምውዳቕን ምትንሳእን ዘሎ ኢዩ፣ ኤርትራ ድማ ንእምነት ብጽኑዕ ትፈታተን ግዝኣት ኢያ፣ ኣብዚ ኣብ ማእከል ኣሕዋት ምስቆምካ ክትትንስእ ኢኻ!” በለ ካብቲ ዝጸንሖ ስምዒት ረጊኡ።

“ኣይትሓዘለይ፣ ግን ክነግረካ ኣለኒ። ኣነ ኣይወደቕኩን፣ ጥራሕ ተለዊጠ ኢየ። ንሱ ድማ ምርጫይ ኢዩ ነይሩ።”

“ናብ ዓለም ምምላስ?” ሓተተ ግንባሩ ሰብሲቡ።

“እወ፣ ንዓለም ክጸልኣ ኣይከኣልኩን። እቲ ምግልጋል ግን ኣይገደፍክዎን።”

“ኣይተረዳኣንን።”

“ንዓለም ብደርፊ የገልግላ ኣለኹ”

“ደራፋይ?”

“ኣይሰማዕካየንን ኢኻ ትኸውን ድኣ’ምበር ብዙሓት ንጽል ደርፍታት ዘርጊሐ ነይረ። ንብዙሓት ካልኦት ድማ ደርፍታት ይሰርሓሎም ነይረ። እመስገኖ ጽቡቕ ኢየ ከይደ።”

ዳዊት ኖህ ይብሎ ንዝነበረ ኣየናዓረሉን። እቲ ናይ ቀደም ዓርኩ ኣዒንቱ ብስምዒት እናበርሃ ዝተዛረበሎም ዕዮታት ንኣዑ ትርጉም ከምዘይነበሮም ኣብ ገጹ ብንጹር ተመልኪቱ ነይሩ። መመልከቲቶኡ  ኣብ ምዕጉርቱ ኣደጊፉ ዝን ኢሉ ድሕሪ ምጽናሕ ሃንደበት፣

“እቲ ምርጫ ናትካ ኢዩ ዝብለካ የብለይን፣ ግን ስለምንታይ?” ሓተተ።

ኖህ ሓንሳብ ርእሱ ሓኺኹ ናብ ደገ ድሕሪ ምጥማት እንደገና ናብ ዳዊት ተጠውዩ መለሰ።

“ንስኻ እምነትካ ነቕ ኣይበለን፣ ንሕቶታትካ ዝኸውን መልሲ ኣብ እምነትካ ስለዝረኸብካ ክሳብ ሕጂ ኣብኡ ኣለኻ፣ ኣነ ግን ንሕቶታተይ ዝኸውን መልሲ ኣይረኸብኩሉን፣ እምነት’ውን ሰፈሩ ዝኾኖ ግርህነት ኣባይ ኣይረኸበን። ደድሕሪ ሕቶታተይ ስዒበ። ተፈላሊና። ኣብ መንገደይ ምስ ደርፊ ተላሊና፣ ተፋቲና። ምድራፍ ኢየ ዘፍቅር፣ ክደርፍ ኢየ ዝደሊ ሕጂ”

“ናይ ሙዚቃ ድልየት እንተሃልዩካ እምነት ኣይምኸልከለካን፣ ተውህቦኻ ግን ንኽብሪ ኣምላኽ ክትጥቀመሉ ኣለካ፣ ዘማራይ ክትከውን ምኸኣልካ”

“ምናልባት። ውሽጠይ ግን ኣይፈቐዶን”

“ንሱ’ዩ ድማ ንውድቀትካ ኮይኑ” ኣጻብዕቱ ኣወጣዊጡ መለሰ ዳዊት።

“ኣየናይ?”

“ንውሽጥኻ ምእዛዝካ፣ ኣብ ክንዲ ንቃል ኣምላኽ ንውሽጥኻ ምስማዕካ።”

ካልእ ሰብ ብምስሊ እቲ ናይ ቀደም ዓርኩን፣ መንፈሳዊ ሓዉን ኣብ ቅድሚኡ ኮፍ ኢሉ ዘደናግሮ ዝነበረ ኮይኑ ዝተሰምዖ ይመስል ብኣግሞት ተዓኒዱ ጠመቶ።

“ገላትያ ምዕራፍ ሓሙሽተ፣ ጳውሎስ፣ ክርስቶስ ሓራ ኣውጺኡና’ዩሞ ከም ብሓድሽ በርዑት ባርነት ኣይትቆረኑ ይብለና” ኣሰረት ሕርቃን ዝነበረን የዒንቱ ተኺሉ ክምልሰሉ ተጸበዮ።

“ንስኻ ብእምነት ሓራ ኣለኻ ኣነ ድማ ካብ እምነት ሓራ ኣለኹ። ዳዊት ሓወይ ከምቲ ኣነ ንምርጫኻ ዘኽብሮ ንስኻ’ውን ንናተይ ….” ሓሳባቱ ኣብ መንጎ ገደፎ። ኣዕሚቚ ድሕሪ ምስትንፋስ ገጹ ናብቶም ፑል ዝጻወቱ ዝነበሩ ኣዞረ።

ዳዊት ቅሬታኡ ብግሁድ ኣብ ገጹ ይንበብ ነይሩ። ቃል ከየተንፈሰ ነታ ኣብ ጎድኑ ኣብ ዝነበረት ሰድያ ኣቐሚጥዋ ዝነበረት ማህደር ኣልዒሉ ሓንቲ ጸላም መጽሓፍ ኣውጽአ። ከፊቱ ንኖህ ከንብበሉ ንዝደለየ ክረክብ ገጻት ገማጠለ። ኣብቲ ገጻት ኣገደስቲ ምዃኖም ንምምልካት ብዙሓት መስመራት ሃሳስ ቀይሕ ሃሳስ ብጫን ሃሳስ ቀጠልያን ሕብርታት “ሃይላይተር” ተደሪብዎም ነይሩ። ዳርጋ  ኣብ ነፍሲ ወከፍ ዝገንጸላ ገጽ ገለ ሕብሪ ይርኣ ነይሩ።

ኣብ መጠረሽታ መመልከቲቶኡ ኣብ ሓንቲ ገጽ ኣቐሚጡ ዝያዳ ናብ ኖህ ድሕሪ ምውራም፣  ኣንበበ።

“ጠበብ ጠቢባን ከጥፍእ ኢየ፣ ምስትውዓል እቶም ኣስተውዓልቲ ውን ከፍርስ ኢየ…ቃል መስቀል ነቶም ዝጠፍኡ ዕሽነት ኢዩ፣ ነዓና ነቶን እንድሕን ግና ሓይሊ ኣምላኽ ኢዩ….” ቀጸለ።

ንገለ ደቓይቕ ድሕሪ ምንባብ ቀኒዑ ጠመቶ፣ ኣብ ገጽ ኖህ ግን ዝኾነ ለውጢ ወይ ተመስጦ ወይ’ውን ስምዒት ኣይነበረን። እንደገና ደነነ፣ ንሱ ምስ ደነነ ኖህኣቓልቦኡ እንደገና ናብቶም ኣብ ፊቶም ፑል ዝጻወቱ ዝነበሩ ሰባት ኣዞረ። እቲ ሓበሻ ምስ ካልእ ህንዳዊ ይጻወት ነይሩ። ተበሊጹ ግዲ ኮይኑ ግን ዓውዓውታኡ ኣቃሪጹ ተኣማማንነቱ ዘጥፍአ ይመስል ነይሩ። ድምጺ ንባብ ዳዊት ምስ ኣቋረጸ ክሳዱ መለሰ’ሞ ዓይኒ ንዓይኒ ተጋጠሙ።

ዳዊት ኣዒንቱ ሰይሩ ሰዓቱ ረኣየ።

“ንስኻ ዝበልካ በል፣ ጎይታ ንውሽጥኻ ሓንቲ መዓልቲ ከምዝረትዖ ግን ርግጸኛ ኢየ” ድምጹ ድኻም ነይርዎ፣ ውዕውዕ ኣይነበረን።

እቲ ሓደ ኣይመለሰን።

“ሎሚ ሓዳሪ ጸሎት ኣለና። ክገድፈካ ኢየ…” በሎ ነቲ ዝገደፎ ናይ ፈለማ ሰባኺኡ።

“ሕራይ ዴቭ፣ ንደዋወል” በለ ካልኣዩ ክምስታ እናፈተነ።

“ካብ ሎሚ ጀሚረ ክጽልየልካ ኢየ። ኩልና ኣሕዋት ክንጽልየልካ ኢና”

ነታ ጸላም መጽሓፉ ጥራይ ዝሓዘለት ማህደሩ ኣብ መንኮቡ ሰቒሉ ሰጎመ። ኖህ ክልተ ኣእዳዉ ኣጣሚሩ ዝባን ዝባኑ እናጠመተ ኣሰነዮ። ናብ ድሕሪት ናብ ጎድኒ ወይ’ውን ናብቶም ኣብ ፊቱ ኣብታ ፑል ሃንደበት ብርቱዕ ያዕያዕታ ዘስምዑ ዝነበሩ ሰባት ንሓንሳብ’ውን ትኹን ኣቓልቦኡ ሂቡ ግልጽ  ኣይበለን። ታህዋኽ ነይርዎ። ብፍጡን ስጉምቲ በቲ ኣስካላ-ኣስካላ ወሪዱ ተኸወለ።  ምስተኸወለ’ውን ኣዒንቲ  ኖህ ኣብቲ ኣፍ ደገ ቀው ኢለን ደሪቐን ነዊሕ ጸንሓ። ብርቱዕ ቃንዛ፣ ወይ ናፍቖት፣ ወይ ጽምዋ ወይ ገለ ንኣዑ ዝመስል ስምዒት ይንበበን ነይሩ። ብርግጽ ግን ቁጽርጽር ኢለን ነይረን።

 

ሓምለ 2013

ናይሮቢ