ተባዕ ፍርሒ

ይውሕዝ ኣሎ ንብዓት
ካብ ኩሉ ኩርናዓት፡
ፍጡር ይጽውዕ ኣሎ ንፍትሒ
ዓይበቱ ቀዲዱ፡ ይልምን ብጥፍሒ።
ይጋዋሕ ኣሎ ኣውያት – ካብ ክልተ ልብታት
ኣዴታት ክእውያ፡ ይዕልሉ ኣቦታት
ኣቦታት ክጭበጡ፡ ይድብላ ኣዴታት
ዘይጥመር ድምጽታት – ንዝጥመር ጊሓት!
(ኪዲ’ንዶ ንስኺ ከኣ ኣልግሲ – ደጉዓ’ለኒ፡ ደጉዓ ስለ ነፍሲ!)
ይውቃዕ ኣሎ መጥቅዕ
ክበቅዕ ከይበቅዕ
ገለ ካብ ቤት ጸሎት
ገለ ካብ ሰፈር መናኽዕ፡
ዓባይቶ ክትውርወር ናብ’ቲ “ልክዕ”
ዝተረፈ ኣጻብዕቲ፡ ንኸብዲ ኢድ የጥቅዕ።
ይንፋሕ ኣሎ ታቱላን እምብልታን
ጻውዒት፡ ፍትሕን ጸረ-ፍትሕን
እዝኒ ሓንቲ ኮይና፡ ተደሪበን ልሳን
እዝንኻ ሓቲምካ፡ ክትስማዕ ምምሕጻን
ህዳ ካብ’ቲ ምዕራብ፡ ጫውጫው ካብ ቤት ከንኣን።
ቀለም ዘዝሓዘ በብናቱ ይጭርሕ
ከልቢ እናጓዘመ፡ ኣንበሳ ይጎርሕ
ምጉዛም ኢሎሞ፡ ወግሐ ጸብሐ ዉሕ ዉሕ
ርእሲ ተቖሪጹስ፡ መሓውር ይመርሕ።
(ርሓቕለይ’ባ ተለመኒ ኣልግሲ – ደጉዓ’ለኒ፡ ደጉዓ ስለ ነፍሲ።)
ሸናዕ ክንብለሉ እተፈጥረ መገዲ
ቀለም ለለኺኻስ ናይ መስርዕ መኣዲ
ዕዳኻ ሓቢእካ፡ ክትከውን ኣዋዲ
“እተመረቐት” ልሳን፡ ቅልጽም ኮይና ሕጂ።
ኣቤት ጓይላ፡ እዝም! እዝም! እዝም!
ኣንበሳ ‘ተስቀጠስ ከልቢ “ይጓዝም”።
(ንዒባ በጃኺ ኣልግሲ – ደጉዓ’ለኒ፡ ደጉዓ ስለ ነፍሲ።)
ኣእዳውን ክሳድን ሰማይ ከየንቃዕርራ
ንቡር ተመንይወን ሓድሕድ ይፈኻኸራ
ፈጣሪ ረሲዐን፡ ፈጠርቲ ክመስላ
በቲ ይትዕነና፡ በቲ ይጭሕግራ
ርግቢት ደም እናነብዐት፡ ይምርቕ ኣሞራ።
(ግደፍኒ’ባ ንዒ ኣልግሲ- ደጉዓ’ለኒ ደጕዓ ስለ ነፍሲ።)
ቆቓሕ ምስ’ታ ዛግራ ሓድሕድ ክካሰሳ
ወኻርያ ትዳኒ፡ ብድቅሱ ኣንበሳ
በ’ናፍራ ብርኒህጎ ዝበርገገት ነብሲ
ጽላል ትሓትት ኣላ፡ ኣብ ናይ ኣባጉንባሕ “ጋዕሲ”።
ቀይሕ ምንጻፍ፡ ተቐይሩ ወለንሳ
ጣዕሳ ኸኣ ይተኻኻእ ብ”ጣዕሳ”
በቑባቝ ከብዲ መሓውር ዘፍለሳ
“ንርኢ” መቸም ትፈጥሮ መለሳ።
(ኣይሰምዓክን’የ ኪዲ ግዳ ኣልግሲ – ደጕዓ’ለኒ – ደጕዓ ስለ ነፍሲ።)
እዚ ዘመን ንባዕሉ’ውን ሽሉ
ፍጡራት ኣብዚሑ ሽሉ ምሉ
ኣራእስ ኣጽቢቦም ከብዶም እናግፍሑ
ኣብ ሓንጎል ሰብ እግሮም ዘሳፍሑ
ኣብ ጨው ቀትሪ በይኖም ዘንፋሕዅ
ሰብ ክህርህር ንሶም ይሕርንኹ
ሰብ ክድቅስ ወንጌል ኣስቆሮት ይሰብኩ።
ተለኻኸም ኮይኑ ናብ ናብ ጸሓይ ናብ ቀላይ
ተሳሓሓብ ኮይኑ ናብ ቀይሕ ናብ ሓምላይ
ብጽጋቦም ኣብታይ እንተዓንደሩ
ዝበልዐት ዘይብላ ትኽተሎም ዒሉ
ጡብ ኣደ ነኺስካዶ፡ ጥበብ ተፈጢሩ!?
እናተሳሕገት ዝረገጽካያ ነፍሲ
ኣውያት ምስ ተሰምዐስ፡ ቋሬጣ ኣብ ርእሲ ርእሲ
ንሓቂ ረጊጽካ፡ ፍትሒ ከተሳሲ
‘ጽላል ዳዕሮ’ ክንሳ፡ ‘ታ ደም ዘዕበያ ፈልሲ።
(ኪዲ ከኣ’ቲ ንስኺ ኣልግሲ – ደጉዓ ኣለኒ፡ ደጉዓ ስለ ነፍሲ።)
ውሻጠ ከም ዝጸበበ መቐመጥ ስፈታት
ይምሃዝ ኣሎ – ላዕልን ታሕትን ቅርጫት፡
ህድሞ ብሰፊሑ – ከብቲ እናሳፍሑ
መጉስዕ እናመለሱ፡ ከብቲ እቶም ዘይጎረሑ
ላዕልን ታሕትን ንእዲ መን’ዩ ሰራሒኡ
ንዘይድቅሰሉ፡ ሰብ’ምበር “በሊሑ”
“ፍትሒ” ይጽውዕ ኣሎ፡ ቁልፉ ፈፈቲሑ።
(ግድፈኒ’ንዶ ኣልግሲ – ደጉዓ’ለኒ፡ ደጉዓ ስለ ነፍሲ።)
ዓሳ-ወርቂ ክንዲ ምዃን ኣብ ማዕበላት ሓዊ
እናተቐበርካስ ስለ ዕሩፍ ተአዊ
ኣብ ዓዲ ህሉዋት፡ ምህላውካ ብህይወት
“ኣለኹ” እናበልካ፡ ትረግጻ ንመሬት
ምርቓ ትረክብ፡ ካብ ነፍሲ ወከፍ ሓጢኣት።
(ግደፍኒ’ንዶ ፍርሒ ኣልግሲ – ዋዛ ኣይኮነን ደጕዓ ስለ ነፍሲ።)
ክላ. . . ካላ. . . ክላ
ሓርገጽ ጀበብ እናበለ’ንድሞ
ርግቢት ስቕ ኢላ።
***