ቁዛምኪ ይኣኽለኪ

ቁዛምኪ ይኣኽለኪ
ኣንቲ ደፋእ ትብሊ ሒዝኪ ኮሎክዮ
ኣንቲ ንቕድሜኺ ትሕዚ ሰታዮ
ትቐብጺ’ምበር ይጸንሕዶልክዮ፡
ካብ ኩሉ ዝኸፍአ
ማሕዩር’ዶ’ይከፍእን ገለ ከየጥፈአ
ምጭካን ማለት ደምበ ከይትምለስ ናብ ቀደማ
ኣሚናን ውላዳን ጠፍጢፋ ስዒማ
ወርቃን ጨርቃን በታ ዓቕማ
ወዲቓ ‘ዋዲቓ ንዕላማ
ሓጹር ዝኸለለት ብዓጽማ ብደማ
መስሓቒኦም ኮይኑ ሕቶ ጻማ።
ምጭካን ማለትእቲ’ኳ እንክሓስቡ ንሱ ርእሶም
እንክጸድፉ ንሱ መልሶም
ክቕይሱ ንሱ መሃንድሶም
‘ሓጥእ’ተ በሉዎ ታሪኹ ደምሲሶም
ቀደም ንሶም ሎሚ ንሶም
ክኣትዉ ጸያናት ሎሚ’ዶ ርሒሶም፡
ሞት ዲኺ’ልኪዮ ሞት ሎም ዘበን
ምእሳር’ዶ ኣይከፍእን ብዘይ ገበን
ጥልመት’ዶ ኣይከፍእን ነደ ሓበን
ሸቐጥ’ዶ’ኣይከፍእን ብወዲ ሓበን!
ከም ሰብ ውርሻ ከም ሰብ ሓለፋ
ከርተት ‘ተበሉኺ ገርፋፋ ዘልፋፋ
ክትጉህዪ’ንዳ ኣልኪ ብዓጸፋ
ንቡር ክቡር መርድእ እንተ ዘይፈጸሙ
ቅበጽዮ’ኮ’ዩ’ቲ ትርጉሙ፡
ከምቲ ንዓኺ ጽላል’ፍቕሪ ሕልና
ኮታ ኩለንትና . . . . . !
ኣይኮነን ንዐኦም
ፍቕሮም ኣብ ትንሓግ’ዩ
ዝኽሮም ኣብ ከስዐኦም
ሎሚ ግዳ ዘመን ውራውራ እዋን ተሓላሎ
መን ንመን ከፍቅር እምነት እንተዘየሎ
ግዳ’ቲ ዝብለኪ
ፋይዳ’የብሉን ካብ ሸላ ናብ ሸላ ዓንዘር ናይ ዘበልኪ
‘ታይ ዝሕለብ ሃልኪ
ኣብታ ኣጎዛኺ-ቁዛምኪ ይኣኽለኪ
ተደልዮም ዳኣ ረኣዩዮም’ንዶ
ግንቦት’ዶ ሰነ’ዶ
ጸደፍደፍ እናበሉ
ገዛኺ ኳሕኲሖም ስእልኺ ከልዕሉ
ሓበን ተኸሊእኪ እንታይ ክትሕበኒ
መንዲሎም’ንዳ ኣልኪ መለመኒ ፡
ዝመላለስ ዝኽሪ ከተጽርሪ
ሽምዓኺ ወሊዕኪ ፍግም’ንተ በልኪ
ጭንቀቶም ካልእ’ዩ ነቢት ዶ ዊስኪ!!
ቦኽረ ገብረየሱስ 2013