ኣን’ቲ ጸሓይ ብርቒ ጊሓት ትጭጭሒ
ብቒርኒብ ዓይንኺ የዒንቲ ትወግኢ
ኣብ ዝባን ገምሃሎ ኩሉ ዝረኣኺ
ደሮና እናልዓለ መንጠሎስ በቛጺ
ነቲ ኣባ-ኮበራ ዝሓዘለ ትኪ
ኪደናይ እናበለ ንሰማይ መትጎጊ
ምስሊ’ሎ ምሳኺ እንኪ’ቲ ሃበኪ
ዕጣን ጽንሓ ጌረ ዕጥን ክዓጥነኪ
ገንጽልለይ ድኣ ደለኽዎ ሕጂ
ንስለ’ዛ መነን ኤረይ ቤተ ሰማእቲ፣
ኣቲ ጸሓይ። ሞዉቂ ናይ ዛብያ
መታብርኪ ኣብ ሩባ በለሳ
‘ቶም ኣባጽሕ ሒደት ብቑጽሪ’ታ
አእያሞም ሓደ ነቶም ሓምሳ
ሬሳ ብቁልሉ ቅሚጦ ረበባ
ምድሪ ጉትን ኢላ ዝኾነት ዝጋፍያ
ካብ ሩባ-ጽሮና ናብ ሩባ በለሳ
ምስሊ ኣልዒልኪ’ንዲኺ ዘይወጻ ብዕብጣ
ዕጣን ከህግገልኪ ብዕጣነ-ጽንሓ
ግንጽል ኣብልለይ ውሻጠኺ ሓንሳእ ሕልፍ ክብላ
ምእንቲ እዛ መነን ኤረይ ኣልማዝ ምድራ፣
ኣቲ ጸሓይ ወርወር ኣቲ ጸሓይ ጻንያ
ህንኪያ ሃብያ ኣጻምእ ደንካልያ
መዳፍዕ ሃሩሩ ሕንቆ ብዘይ ድብያ
ምስሊ ሒዝኪ’ለኺ ናይ’ቲ ንኡስ ኣያ
ኣእማን እናነደደ ምድሪ ክዳንያ
ሳንቡእ ተለቂሑ ተማዕዚቡ ዓሳ
ስብሓቱ የዕሪቡ ብሓበን ብተድላ
ባሕሩ ተመሊሱ ተወንጀረ ድኣ
ኣቲ ጸሓይ ወርወር ኣቲ ጸሓይ-ጻንያ፣
ምስሊ ሒዝኺ’ለኺ ግንጽል ኣብልለይ
ዕጣን ጽንሓ ጌረ ክዓጥነኪ ባዕለይ
ሃሰስ ዝብሎ’ለኒ ዝባቑጥ ንዳሕራይ
ምእንቲ’ዛ መነን ኤረይ ናሕሳ ሰማይ፣
ኣቲ ጸሓይ ወልወል ጸሓይ መረብ ሰቲት
ትንግርቲያ ጎልጎል ዘመራ ክሃምም ህጠር ከይትህመል
ነዲ ና’ቶም ኣግራብ ስጋ ሰብ ከብስል
መንድሽ ልዕሊ እሳት ቃጸሎት ክዘልል
ምስሊ ሒዝኪ ‘ለኺ ጸሓይ ናይ ወላውል
ዕጣን ከህግገልኪ ኣብልለይ ግንጽል
ንዳሕራይ ዝኸውን ደብተር ክንወራርቕ
ምእንቲ’ዛ መነን ኤረይ መወናውን፣
ኣቲ ጸሓይ ዕርቢ ፈኸም-ገሃጽ ትብሊ
ኣብ’ቲ ግርሁ ስርናይ ዘስፈልክዮ ልቢ
ደም በጨቕ ኢሉ ዝኾነኪ ዘግሒ
እወ’ቲ ደም ዘግሒ ቦርቦር እንተኾንክስ
ቅይሒ ድኣ ቕይሒ ግንጽልጽል በልለይ
ዕጣን ከህግገልኪ
ክውከስ’የ ደልየ ጽባሕ ዘድልየኒ
ምእንቲ’ዛ መነን ኤረየ ጓል ዓይኒ፣
ኣቲ ወርሒ ፍልም ወርሒ ናይ ዋግ ዋጎ
ቅጥንጥን ተበልኪ ከም ቅሩብ ቅራቦ
እዚኳ ንስኺ ኣብ ዓዲ በጊዖ
ብኣፍን ብኢድን ቡምባ እንካ ሃቦ
ጸጉሪ ርእሲ መጺኦም ዘይወጹ ስልዖ
ኣርሓ ተፊን ክትፍነን ኣብ ጎቦ
ግንጽል ኣብልለይ ኣሎ ‘ቲ ዝደልዮ
ዕጣን እናኣትክኽኩ ብደምቢ ክዓጥኖ
ምእንቲ’ዛ መነን ኤረይ ዓደቦ፣
ኣቲ ሒለል ወርሒ ምስላ ማዓጺደ
ዑና-ሸሓቕ ኮንኪ ትብል ንየ-ነጀ
ኣብ ዝባን ‘ቲ ሶይራ ዓይንኺ እንታይ ርአ
ምስሊ’ሎ ምሳኺ ምስሊ ልቢ ኣንደደ
ገንጽልለይ ሓንሳእ ምድሪ ከይረፈደ
ጽባሕ ዘይርከብ ዝደልዮ’ሎ ኣነ
ዕጥን ከብለኪ ዕጣነይ የህጊገ
ምእንቲ’ዛ መነን ኤረይ ምደረ ሰብ’የ
ኣቲ ጎጎብ ወርሒ ዝባን ዛላምበሳ
ርእሲ ዕዝር ትብል ክሳድ ተኾልዒሳ
ሞትን ስረትን ኣብኡ ዝቃላሳ
ረዳኢ ዘይብሉ ኣልቦ መንገፍ-ዥጋ
ከም ሰናየ ስርናይ ውላዳ ሰዉይላ
ኤረይ ቅዳውላ ስዑም’ዩ ግምባራ
ክዓጥነኪ ደልየ ብዕጣነ ጽንሃ
ግንጽል ኣብልለይ ሓንሳእ ንወኸሳ
ምእንቲ’ዛ መነን ኤረይ ሰታ-ጋሳ፣
ኣቲ ብሳል ወርሒ ዓውዲ ማይ ዝምስላ
ቅርኒብ ዓይና ሕጻር ብገበላ
እንዳ’ባ ምናሴ ክሳብ ጫፍ ባድማ
መቕይሖ ኮንኪ ሰርቢ ደም ዘገጋ
ኣብቲ ኣጫፋላቕ ኣብ’ቲ ሃባ በላ
ክንደይ ዝሰኣልኪ ክንደይ ኣሳእላ
ምስሊ ሕዝኪ’ለኺ ዝነበረት ኩላ
ግንጽል ኣብልለይ ወሽጥኺ ክዓጥና
ዝደልዮ ኣለኒ ዝኾነኒ ዋካ
ኣቲ ጸሓይ ወርሒ ናይ ምልእቲ ምድራ
ምስሊ ዝቛጸርክን ስእሊ በብሕዝላ፣
መቓን ኣርሕዋለይ ብቐደም ቀዳድም
ዕጣን ከትክኸልክን ከም መዓረ ገዳም
ሰንካላይ ታሪኸ’የ ክኾነና ጉዝጓዝ
ንኣይቲ ገጽ ኢና ፍኖትና ክጸሓር፣
ምእንቲ’ዛ መነን ስንቱር ቅርኒብ ዓይና
ከብዲ ትገላብጥ ስምዒት ጻሕቲራ
መሰስ ትብል ዓቐብ ሪማ ተሰኪማ
ከምሮት ተሰኪማ ኤረየ ኤረና፣
ወዲ ዃዳ 2001
