ቦኽረ ገብረየሱስ
ዓሰርተ ዓመት መጻወቲ ኰይኑ ስጋ ቐላቲ! ናይ ካምፓስ ትምህርተይ ዛዚመ ምምህርና ሳዋ ካብ ዝምደብ ዓስራይ ዓመተይ፡ ኣብርሃም ኣፈወርቂ ካብ ዝመውት ዓስራይ ዓመቱ፡፡ ዓርቢ ድሕሪ ቀትሪ ከምዚ ቅነ፡፡ ሓደ ከቢድ መርድእ ኣብ እዝነይ ‘ዱብ!’ ክብል ተፈሊጡኒ፡፡ ንሓደ ዝፈትዎ ሓወይን ገዲም መማህርተይን ኣቦኡ ዓሪፉ፡፡ ዓለም ምምህርና ካብ ንጅምር ወርሒ ንግበር ኣይንግበር፡ ኣብ ሳዋ ምሳይ ኣሎ፡፡ ይትረፍ ንሱ ወላዲኡ ውን ብንኡሱ እዩ፡፡ ሽዓ ግዜ ሓምሳ እንተረጊጹ መን ከምኡ፡፡ መርድእ ኣብ ኢደይ ብምምጻኣ ሕርብት ኢላትኒ፡፡ ኣብ ውሽጠይ ዝሓዝኩዎ ንገር ንሰብ ከካፍል ግዴታ ነይሩ፡፡ ፈለማ ንሓደ ካብ መዳቕስተይ ሕሹኽ ኢለዮ፡፡ ብቐረባ ክፈልጦ ዝኽእልን ማይ ዝሰተየን ሰብ ከናዲ ከም ዘለኒ ሓሳብ ወሲኹኒ፡፡ ከምቲ ዝበሎ ንስድራቤት መሳርሕትና ብንዳ’ዲኡ ብቐረባ ዝፈልጥ መሳርሕቲ ረኺብና፡፡ ከይደ ዘሎ ነገር ሓቢረዮ፡፡ ሰምቢዱ፡፡
ጸኒሑ፡ ፈኸም ክብል ዝቐነየ ብስራት ጋህዲ ኰይኑ። ኣብርሃም ኣፈወርቂ ሳዋ ከም ዝኣተወ ብጋህዲ ተዘሪቡ፡፡ ንዓይ ግን ካልእ መርድእ ኰይኑ ተሰሚዑኒ፡፡ ስምዒተይ ብትንትን ኢሉ፡፡ ስለምንታይ’ስከ? እቲ ሞት ኣቡኡ ሓቢእናሉ ዘለና መሳርሕቲ ነብርሂሞ ክፈትዎ መዓት’ዩ፡ በቃ፡፡ ኣነ ውን ከምኡ ወይ ልዕሊኡ ብደርፍታት ኣብርሂሞ ጽሉል ነይረ (ዋላ ሕጂ! ሙድ ናይ ሽዑ ግን ሎሚ ምሳይ የሎን፡ ፍቕሪ መዛሙሩ ሒዝካ ዘዘው’ዩ በስ፡፡)
ሽዑ ምሸት እንዳ’ዋልድ፡ ንጽባሒቲ ነወዳት (ኣብ ‘ስቴጅ)፡ ቀጺሉ ሰንበት ንመኰንናት ኣጸልል ቀንዩዎም፡፡ ኣነ ግን ከም ሰበይ ክጽለል ኣይከኣልኩን፡፡ ኣብ ህይወተይ ካብ ዝኸሰርኩዎም ዓበይቲ ነገራት ሓደ፡፡ ኣነ ጥራይ ዘይኰነ፡ ነቲ ወላዲኡ ከም ዝዓረፈ ዘይፈለጠ ዓርከይ ካብ ምርኢት ኣብርሃም ከታርፎ ብዙሕ ተጋዲለ፡፡ ኣይሰመረለይን፡፡ ኣብ ሞንጎ ኣብርሂሞን ተማሃሮን፡ “ንስኹም ሓላለይ!! “ንስኻ’ባ!!” ክባሃል ከሎ ኣብኡ – ኣብ ‘ስተኤጅ ነይሩ፡፡ (ዶናታት ዕስራ ዙር “ፍሽኽታ ኣመለይ” ብዝብል ደርፊ ክምጅንና ከለዋ ኣብቲ ከባቢ ነይረ፡፡ ምስ ሓደ ዝፈልጦ ኣባል (ዓላማይ) ተመሳጢረ ዝኸድኩዎ ሓውሲ ብልሽውና እዩ። ቀልጢፈ ግን ናብ ቦታይ ተመሊሰ፡፡ መርድእ ዝኣክል ንብረት ተሰኪመ ምንባረይ ግዲ ኰይኑ እቲ ሙድ ኬፍ ኣይሃበንን፡፡)
ቀዳም ለማናይ ማዕጥቖኡ ከይፈትሐ ሸበድበድ ኰይኑ፡፡ ንመሳርሕትና ዓዲ ዘብጽሕ መንቀሳቐሲ ክንልምነሉ ነይሩና፡፡ ወዲ ጉዑሽ ዝባሃል ካብ ስታፍ ምምሕዳር መምህራን እቲ ነገር ምስ ሰምዖ ሓዚኑን ርዒሙን፡፡ ዝኸበደ ጉዳይ መንቀሳቐሲ ዘይኰነስ መጕዓዝያ ምዃኑ ብግልጺ ሓቢሩና፡፡ ሰንበት በሎ ሰኑይ፡ እታ እንኮ ካብ ሳዋ ናብ ኣቝርደት/ከረን ትኸይድ መኪና፡ እዛ ንበዓል ኣብርሃም ትወስድ ንእሽተይ መኪና ጥራይ ምህላዋ ነጊሩና። ብዝኾነ ወዲ ጉዕሽ ብዝመርሓና መሰረት ንመሳርሕትና መንቀሳቐሲኡ ኣውጺእና ኣብ ኢድና ሒዝናዮ። ወዲ ጉዕሽ ብመሰረት ዝኣተወልና ቃል ድማ ምስ ነጸርኣብ ሻውል ምሕዝነት ብምህላዉ፡ እቲ ኣቦኡ ዝንገር መምህር ምስታ ጉጅለ ባህሊ ንኽሳፈር ባይታ ባይታ ኣጣጢሑ፡፡ ከምኡ ድማ ከይኑ፡፡
ኣብርሂሞ ሰለስተ መዓልቲ መመላእታ ንሳዋ ኣመጅንን ቀንዩዋ ( ብዘይ ንሱ እቶም ናይ ሽዑ ዕስራ ዙር ዝባሃሉ ተማሃሮ ጃናታት ዝበዝሑዎም እዮም ዝነበሩ – ግን ድማ ፍቕሪ ብኣካሎም!) ሰኑይ ወጋሕታ ንቐል ኰነ፡፡ ንዓና ድማ ጐኒ ጐኑ ካልእ ስራሕ ነይሩና፡፡ ንመሳርሕትና ገዝኡ ክሳብ ዝበጽሕ እንታይ ኢልና ከም ነርድኦ ጨኒቑና፡፡ እንተዀነ ነዲኡ ዝወለዳ ዓባዩ ብሂወት ምህላወን በጺሕናዮ፡፡ ኣብ ዘይመዓልተን ቀቲልናየን፡፡ ኣብርሂሞን ወዲ ሻውልን ውን እቲ ምስኦም ዝጓዓዝ መምህር መዋቲ ኣቦኡ ምዃኑን ብዓባዩ ተነጊሩ ምህላዉን ተሓቢሩዎም።
ምስቲ ለባም ካልኣየይ ኴንና ሰኑይ ጋሕጋሕ ካድ ድቃሱ ኣተሲእናዮ፡፡ ናይ ድሓን ዘይምዃንና ነቢቡና፡፡ ከየሻቐልና ደርጒሕናሉ፡፡ ዓባዩ ከም ዝዓረፋን ሓዘን ኣመኽንዩ ኣዕሪፉ ክምለስ መንቀሳቐሲ ከም እተሰርሓሉን ምስዛ ናይ ብዓል ኣብርሃም መኪና ክኸይድ ምዃኑን ድቦላ ወዲቕናዮ፡፡ ብሞት ዓባዩ ጉህይ ኢሉ፡፡ “እዋይ ዛ ዓባየይ!! ኪሎ ቡን ኳ ከይገዛእኩላ!!!” ብምባል ኣማሪሩ፡፡ ንዓባዩ ዘለዎ ሕልምን ፍቕርን ክንድዚ ካብ ኰነ ኣቡኡ ምዃኑ ምስ ፈለጠ እንታይ ከም ዝኸውን ገሚተ ተደፋነቕኩ፡፡ ኪሎ ቡን ክብል ሓቁ እዩ። ስራሕ ካብ ንጅምር ክልተ ወርሒ ዘይመላእና ዩኒቨርሲቲ ሰርቪስ ኢና – ደሞዝና 441 ናቕፋ፡፡ ገንዘብ ዝባሃል ነገር ግን ኣይጠዓምናን ኔርና ክሳብ ኣብርሃም ናብ ሳዋ ዝወርድ፡፡
ኣብ መንገዲ ሳዋ-ኣስመራ፡ ኣብርሂሞ ንመሳርሕትና
“ድራር ኣይሰኣንኩን ኣይጠመየን ከብደይ
ኣይዓረቐን ዝባነይ
ናብራ ኣየድክመንን’ዩ
ክስከም’የ ሽግረይ ከም ዓቕመይ እዩ ባህገይ
ፍቕሪ ‘ንተ ጎደሎ’ዩ
ዘይማሙቕ ልበይ ዘይረግእ መንፈሰይ”
ብምባል ሞት ጥራይ ዘይኰነ ፍቕሪ ከይከስር፡ ፍቕሪ ከይጐድሎ እናተሻቐለ ግን ካኣ ሞራል እናሃበ፡ እናመኸረ ዘሳለዮ መሲሉኒ፡፡
“ዘመስግን’ዩ ሕጉስ
ዝዕገስ’ዩ ለባም
ዘዋህልል’ዩ ሓያል…” እናበለ ተስፋ ንኸይቈርጽ ብርትዐ ዘስነቖ ክኸውን ተመንየ – ኣብርሂሞ ንመሳርሕትና፡፡
“ምሳይ የለኽን
ዝብሎ ክትሰምዒ ሓልዮተይ ክትቀስሚ
ለካ ከምዚ እዩ
ጽባሕ ክንብል ዘምልጠና ሎሚ”
ብምባል ኣቦኡ ንሓዋሩ ምስንባቱን ኦሮማይ ንጽባሕ ብሞራልን ሓይልን ክጋፈጣ ከም ዘለዎን፡ እናደዓዓሶ ዝተጓዕዘ መሲሉ ተሰሚዑኒ፡፡
ብሓቂ ብዙሕ ኣይተጋገኹን፡፡ ካብ ሳዋ ምስ ተበገሱ ሰላም ተጓዒዞም (መሳርሕትና ገዛ በጺሑ ምስ ተመልሰ ብዘዘንትዎ መሰረት።) ከባቢ ፍርቂ መዓልቲ ከረን በጺሖም፡፡ ንምሳሕ ካብ መኪና ወሪዶም፡፡ ኩሎም ኣባላት እታ ጉጅለ፡ ብፍሉይ ድማ ኣብርሂሞን ነጸርኣብን ንመሳርሕትና ፍሉይ ክንክን ይገብሩሉ፡፡ ዘብልዑዎን ዘስትዩዎን ጠፊኡዎም። ኣብ ጁባኡ ብሓይሊ፡ ገንዘብ ወታቲፎምሉ፡፡ ብዝድብሱዎ ጠፊኡዎም፡፡ ብዝዀነ ቈራሪሶም ጉዕዞ ናበስመራ ቀጺሎም፡፡ ብሰላም ኣትዮም፡፡ ካብ ኣስመራ ውን ከይሓደረ ክቕጽል ስለዝነበሮ ብናቶም መኪና ገዝኡ ከብጽሑዎ ብፍቕሪ ተማሕጺኖሞ፡፡ ተሰኻኺፉ ይመስል፡ ኣቕቢጹዎም፡፡ ምስ ተመልሰ ከይረኸቦም ናብ ሳዋ ንኸይወርድ ናይ ቁጽሪ ቴለፎኖም ሂቦሞ ተሰናቢቶም፡፡ ሓዘን ወላዲኡ እናሰላሰለ ውዑይ ዜና ኣብ እዝኑ መጺኡ፡፡ ቅድሚ መዓልታት “ኣስመራ ምስ ተመለስካ፡ ከይረኸብካኒ ሳዋ ከይትኸይድ” ኢሉ ዝተማሕጸነ ኣብርሃም ኣፈወርቂ፡ ቆጸርኡ ረሲዑ ንሓዋሩ ገይሹ፡፡
“…ዘይፍለየኒ ሰብ ዘኪረ
ሎሚ ምሳና ዘየለ
ክምህር ኢሉ ከም ዝተፈጥረ
ትርጉም ኣዊጃ ሂወቱ
ኣብ ክንዲ ሂወት ጥበብ ምስ ኣፍቀረ”
ኢሉ ምንባሩ ይድንጽወኒ ጥራይ፡፡ ንገለ ጥበባዊ ተልእኾ ከይዱ ከይከውን እሓስብ ሓንሳብስ! ኣብዚ ሰሙናት ሳዋ ሕምስ ኢላ ቀንያ፡፡ ናይ ሳዕስዒት ድኻሞም ከይወጸ፡ ዕላሎምን ዝኽሮምን ከይሃሰሰ፡ ትዝታ ከይተባህለ፡ ዝቐነዩ ተማሃሮ ሕቖኦም ተሰይሩ፡፡ ክልተ-ሰለስተ መዓልቲ፡ ኣብ ገለስ ዳርጋ ሰሙን ንስሙ ክላስ ኣቲኻ ምውጻእ ኰይኑ፡፡ “ኣነ ኣምላኽ እንቃዕ ኣይኰንኩ፡ ኣብርሃም ኣፈወርቂ እናሞተ ኢደይ ኣጣሚረ ኣይምረኣኹዎን” ኢለ ሽዑ ብልበይ፡፡ ሰብ ምዃን እናኸበደንስ ካልእ ምምጥጣረይ፡ ከይተወልዱ ዝተኾልፉ ኣእላፍ ሕልምታት ኣብርሂሞ ምንባሮም ርግጸኛ ምዃነይ ዘልዕሎ ጣዕሳን ብስጭትን እምበር ካልእ ትርጉም የብሉን፡፡
6/10/2016
