ሰራሕተኛ ጽሬት

እቲ መረጼን…
መስመስ ክብል መታን
ናብ ቤተመንግስቲ ንኸእቱ ብርሃን
ወግሐ-ጸብሐ ትጽመዲ ኣብ ዕዮ
ሓንሳብ ዘይኰነውን ትደጋግምዮ።
እቲ ጐሓፍ
ዘይመስለኪ ጐሓፍ!

ካብቲ መጋረጃ
ካብቲ ጠረጴዛ
ንደሮና ርኢኺ ከም ኣበር
ትነጋግፍዮ ካብቲ መንበር፡
ትደራርዝዮ ንምድሪ-ቤት
ክሳዕ ዘንጸባርቕ ከም መስትያት፡
እቲ ጐሓፍ
ዘይመስለኪ ጐሓፍ!!

ኣብቲ መንበር ተዀዲሙ ዘሎ
እንታይ ከሊልዎ ዓይንኺ ከይርእዮ!
ጐሓፍ’ንዲዩ ጐሓፍ ብዓቢኡ
ጠንቂ ሕማም ንሞት ጸዋዒኡ!

ኣቃጽልዮ ከይብለኪ ነቲ ህንጻ
ስለ ዝረኣኹዎ ረሲሑ ከርሰሖ
‘እንታይ ገበረ ዝባኽን እቲ ጸጋ
ጽባሕ ተመሊሰ ንዝሰርሖ።’
ኢለ ልቢ ኣዕቢየ
ናባኺ ኣውዲቐዮ ናትኪ ተጸብየ።

ሰራሕተኛ ጽሬት ናይ ቤተመንግስቲ
መን’ዩ ዓዲሉኪ ክንድዚ ትዕግስቲ
ኣብ ኢደይ ዘየሎ
ኣብ ኢድኪ እንድዩ ዘሎ!

ሓደው ምስቲ ግዕዘ ጽረግዮ
ሓደው ከኣ ስራሕ ግደፍዮ
ነቲ ጐሓፍ ጐሓፍ ይብለዓዮ።

ብርሃነ ገብረሂወት

12/10/2013