ደራሲ እስጢፋኖስ ገብረሚካኤል (ሃንችባክ)
6ይ ምዕራፍ መበል 53 ክፋል
እዚ ኵሉ ክኸውን ከሎ ሰለሙን ጽሑፋቱ ሒዙ ድሮ ክዛንችስ በጺሑ ነይሩ። ሃብቶም ማርክሳዊ ፍልስፍና ዘርእስታ ዓባይ መጽሓፍ ከንብብ ጸኒሑ፡ “ኣነ ደኣ ማይ ከይዕንቅፈካ’ንድየ ተሰኪፈ ኣምስየ፡” ኢሉ ካብ ኵርሱ ብምትሳእ ነተን ጽሑፋት ድሕሪ ምቕባል፡ ነታ ኣብ ዝሓለፈ እዋን ጐዲላ ዝነበረት ገጽ ከም ዝተመልአት ድሕሪ ምቍጽጻር ነተን ጽሑፋት በብሓደ ፈላለየን።
“ማይስ ብዙሕ ኣየሸገረንን። ፍሬታ እናበኸየት ገዲፈያ ስለ ዝመጻእኩ ግን ክሓድገካ እየ፡” ብምባል ንኣስታት ዓሰርተ ደቒቕ ጥራይ ኣዕሊሉ ተፋነዎ። ናይ ስራሕ መኪና ኣብ ቦታኣ ኣቐሚጡ መኪናኡ መታን ክወስድ፡ ነቲ ሓሓሊፉ ማይ ዘዕቈረ ጽርግያ ብቐስታ እናሓለፈ ኣብ ኣፍደገ ስርሑ በጽሐ።
ሓላው ኣፍደገ ማዕጾ ኣብ ክንዲ ምኽፋት ዘይኣመሎም ብንእሽቶ ማዕጾ ወጺኦም ናብኡ ብምቕራብ፡ “ከመይ ኣምሲኻ ሰለሙን?” ድሕሪ ምባል፡ “እቲ ግናይ ምትኩ ረኺቡካዶ?” ክብሉ ሓተቱዎ። ጸጸኒሑ ሓሙሽተ ቅርሺ ሰው የብለሎም ስለ ዝነበረ ኣመና’ዮም ዝፈትዉዎ። በቲ ሃንደበታዊ ሕቶኦም ሰንቢዱ ብኣሉታ ምስ መለሰሎም፡ “በል ደሓን፡ መኪና’ሞ ኣእትዋ ቀስ ኢልና ክንዘራረብ ኢና፡” ኢሎም ማዕጾ ምስ ከፈቱሉ፡ መኪና ካብ ኣፍደገ ኣሕሊፉ ኣብ ቅድሚ’ታ ጸባብ ናይ ሓለዋ ገዛ ደው ኣቢሉ ናብኦም ቀረበ።
“በል ዓንተቦ ኣብ ስራሕ ጸኒሕካ ክትወጽእ ከለኻ ናይ ሽማግለ ነገር ኮይኑ ማይ ከይሃርመኒ ፈሪሐ ክነግረካ ኣይከኣልኩን’ምበር፡ ምትኩ ኣብ ውሽጢ ከለኻ መጺኡ ነይሩ። ኣይሂ ማይ እናሃረመ ከሎ መኪናኡ ኣብ ኣፍደገ ገዲፉዋ ብእግሩ ክኣቱ ከሎ እርእዮ ኣለኹ። ‘እዚ ሰብኣይ ብጥዕናኡ ድዩ ተጸሊሉ?’ ኢለ። ሽዑ’ኳ ሓቂ ዘረባ ንርእሱ ገደዶ ኢለ ብዙሕ ኣይተገደስኩሉን። ኣይደንጐየን ግን ብቕጽበት ብምውጻእ መኪናኡ ኣልዒሉ ተበቍጹ። ‘ሎምስ ገለ ረኺቡዎ ክኸውን ኣለዎ’ እናበልኩ ኣብዛ ቦታይ ኮፍ ኢለ ከለኹ ንስኻ’ውን ስራሕካ ወዲእካ ኬድካ። ድሕረኻ ኣይደንጐየን ፖሊስ ኣኸቲሉ ደበኽ ኢሉ፡” ምስ በሉዎ ክሳብ ኣንጕዑ ቀዝሒ ተሰሚዑዎ ክነሱ ብዝከኣሎ መጠን ክዛነ ፈተነ። ሓላዊ ኣፍደገ ዘረባኦም ብምቕጻል እቲ ሽዑ ምሸት ዘጋጠመ ኵነታት ብዝርዝር ገለጹሉ።
ሰለሙን ነቲ ኵነታት ቀልጢፉ ብምግምጋም ዝፈርሓ ዝነበረ መዓልቲ ከም ዝኣኸለት ተረዲኡ ምስ ግዜ ክቀዳደም ወሰነ። ናይ ስራሕ መኪና ኣብ ቦታኣ ኣጽጊዑ ድማ ናብ ቤትጽሕፈት ምትኩ ኣተወ። ነታ መባዝሒት ኣልዒሉ ኣብ መኪናኡ ድሕሪ ምጽዓን ምትኩ ከየርክቦ ካብቲ ቀጽሪ ክወጽእ ተቐላጠፈ። ኣብ ኣፍደገ ምስ በጽሐ ነቶም ሓላዊ ኣፍደገ ዕስራ ቕርሺ ኣውጺኡ ሃቦም።
“እዝግሄር ይሃብካ ሰለሙን ወደይ፡” ኢሎም ድሕሪ ምምራቕ፡ ዘረባኦም ዘየሰከፎ ኮይኑ ስለ ዝተሰምዖም፡ “ሰለሙን፡ እዚ ዝበልኩኻ ዘረባ ከም ቀሊል ኣይትውሰዶ። እዞም ክፉኣት ብዝስራሕ ዝደለዩኻ መሲሉካ ከይትህመል። ከም ዘስተውዓልኩሎም ነገሮም ናይ ተንኰል’ምበር ናይ ጥዕና ኣይመስልን’ዩ፡” በሉዎ ኣባታዊ ሓልዮት ብዝመልኦ ኣዘራርባ።
“ደሓን ተረዲአኩም ኣለኹ። ምናልባሽ ኣቶ ምትኩ እንተ ተመልሰ፡ ‘ሰለሙን ሓደ ቤተሰቡ ኣብ መንገዲ ደብረዘይት ሓደጋ መኪና ስለ ዘጋጠሞ፡ ጽባሕ ስራሕ ኣይወፍርን’የ’ ኢሉካ በሉዎ፡” ኢሉዎም ናብ ካዛንችስ ተበገሰ።
ማዕጾ ከፊቶምሉ እናወጽአ ከሎ፡ “ሽሻይካ ይስርዓልካ ኣንታ ብሩኽ፡ ገብርኤል ይሓሉኻ። ደሓን ሕደር፡” ኢሎም መረቑዎ። እቶም ሰብኣይ ተወላዲ ብሄረ ከምባታ ኮይኖም መሬቶም ብመሳፍንቲ ሸዋ ምስ ተሓድጉ ዓዶም ገዲፎም ንኣዲስኣበባ ዝመጽኡ እዮም። በዓልቲቤቶም እንጌራን ስዋን እናሸቀጣ ቍሩብ ስለ ዝሕግዝኦም ከፊኡ ኣይከፍኦምን። ኣንጻር መሳፍንቲ ኣምሓራ ኵሉ ግዜ ሕኒን ምስ በሉ እዮም ነይሮም። ንምትኩ ድማ ብሰንክ’ቲ ጸቓጢ ባህሪኡን ትምክሕታዊ ኣረኣእያኡን ካብ ጸላእቶም ፈልዮም ይርእዩዎ ኣይነበሩን።
* * *
ሻምበልን ምትኩን ካብ እንዳ ሰለሙን ቍሩብ ርሕቕ ኢሎም ድሕሪ ምኻድ መኪና ኣብ ሓደ ወሰን ደው ኣቢሎም ሰለሙን ናብ ገዝኡ ክምለስ ክጽበዩ ድሕሪ ምጽናሕ፡ “ማይ ግረሽየስ!” ኢሉ ጨደረ ምትኩ።
“ደሓን ዲኻ?” ሓተቶ ሻምበል ብሓውሲ ምግራም።
“እንታይ ዝበለ ዕኑድ ምሸት’ዩ ወደይ! ንሓንጐለይ ብልክዕ ከሕስቦ እኽእል የለኹን ማለት ድዩ? ቀልጥፍ ጥራይ ሕጂ ናብ ቤትማሕተም ገጽካ ኣምርሕ። ሕጂ ግድነት ክንረኽቦ ክንክእል ኣለና።”
“ኣብኡዶ ኣይጸናሕናን፡ እንተ መጽአ’ባ ኣብዚ ክንጽበዮ!”
“ካልኣይ ግዜ ንጋገ ኣለና ኣየለ። ናይ ስራሕ መኪና ሒዙ ስለ ዘሎ ግድነት መኪናኡ ክወስድ ከም ዝመጽእ ክዝክር ነይሩኒ። ስለጥ ጥራይ ከየምልጠና።”
ሻምበል መኪና ኣተሲኡ እናተበገሰ፡ “መኪናኡ ኣብ ስራሕ ከም ዘላ ግን ኣረጋጊጽካ ዲኻ፡” ክብል ተወከሶ።
“ዓንተቦ ብማዕዶ ርእየያ ከለኹ እዚ ሓሳብ’ዚ ከመጽኣለይ ዘይምኽኣሉ እዩ’ኮ ዘዛርበኒ ዘሎ ኣየለ፡ ኣሕ! . . . .”
ላንድሮቨር ከም ንፋስ እናተሓምበበት ኣብ ኣፍደገ ቤትማሕተም ደው በለት። ሓላዊ ኣፍደገ ላንድሮቨር ምዃና ምስ ፈለጡ ምትኩ ተመሊሱ ከም ዝመጽአ ተጋህደሎም። ሰለሙን ንዋራ ምውጽኡ ንኣምላኽ እናመስገኑ፡ በትሮም ሒዞም ብድድ ብምባል መብራህቲ መኪና እናደጕሖም ማዕጾ ከፈቱ። ላንድሮቨር ኣብ ውሽጢ ቀጽሪ ኣትያ ደው ምስ በለት ምትኩ ካብ መኪና ወሪዱ፡ “ሰለሙን ብድሕረና መጺኡዶ ነይሩ?” ክብል ሓተቶም ብነድሪ።
“ቅድሚ ዓሰርተ ደቒቕ መጺኡ ነይሩ። ሓሙሽተ ደቓይቕ ኣይገብርን ድማ መኪናኡ ሒዙ ከይዱ። ቅድሚ ምኻዱ ግን፡ ‘ሓደ ቤተሰበይ ሓደጋ ኣጋጢሙዎ ስለ ዘሎ ጽባሕ ስራሕ ከም ዘይወፍር ንኣቶ ምትኩ ንገሩለይ ኢኹም፡’ ኢሉ ተላብዩኒ፡” ክብሉ መልእኽቶም ኣብጽሑ።
“መጺእና ምንባርና ሓቢርኩሞ ዲኹም?” ክብል ህድእ ኢሉ ተወከሶም።
“ተውሳኺተይ! መን ምስ ጠወቐኒ’የ ኣብ ዘስይርሐይ ዝኣቱ! ዝናብ ኮይኑ ካብዛ ገዛይ’ኳ ዘይወጻእኩ፡ ‘ጽባሕ ስለ ዘይወፍር ግን መንቀሳቐሲ ከይስእኑ’ ኢሉ እዚኣ ሂቡኒ፡” ኢሎም መፍትሕ መኪና ኣቐበሉዎ።
ሓሪቑ ምዝራቡ እናጣዓሶ ሜላኡ ክቕይር ብምፍታን፡ “መፍትሕ መኪና ደሊና’ንዲና እዚ ዅሉ ኰለል ክንብል ኣምሲና። ከመይ ደሓን ይእቶ! መኪናይ ኣብ ጥቓ ሳልሳይ መደበር ተባላሽያትኒ እምብዛ እየ ተሸጊረ ኣምስየ። ደሓን ይእቶ ግን ሻምበል ተሓጋጊዙኒ፡” በሎም።
በትሮም ተኺሎም ክሰምዑዎ ድሕሪ ምጽናሕ፡ “ንሶም እግዚኣብሄር ይሓግዞም፡ ንስኹም ከኣ ንሻምበል ምርካብኩም ጸሎት ወለዲ ስለ ዘለኩም ኢኹም፡” ኢሎም ጥዑም ዘረባ ኣስምዑዎ።
ምትኩ ውሽጡ ሕሩር ክነሱ ዐረ እናጠዓሞ፡ “እወ ሓቅኹም። ደሓን ሕደሩ ጥራይ፡” ኢሉዎም ኣብ ላንድሮቨር ደየበ። መኪና እናተበገሰት ከላ፡ “ኦሮማይ! ካብ ኢድና ከም ዘምለጠ ፍለጥ። እዚ ሰብኣይ መጺእና ከም ዝነበርና እንተ ሓቢሩዎ ከም ዝስወር ፍለጥ፡” በሎ ንሻምበል ብስያፍ እናጠመቶ።
“ዓንተቦ’ንዲኻ ተጋጊኻ። ኣብ ክንዲ ናብ ገዝኡ ምኻድ ኣብ ሓደ ኵርናዕ ተኸዊልና ኣብዚ ክንከታተሎ እዩ ነይሩና።”
“ጽቡቕ ኣለኻ። ሽዑ ተዓኒደ ስለ ዝነበርኩ ኣንፈተይ ኣጥፊአ’ምበር እቲ ቅኑዕ ስጕምቲ ንሱ እዩ ነይሩ። ናይ ሎሚ ምሸት ፍሽለት ኣብ ኢድካ ዝሓዝካያ ዑፍ ከም ምፍናው’ዩ ዝቝጸር። ኣሕ! ፈጺሙ ከምልጠና ኣይነበሮን። ተዓዊቱልና እዚ ወዲኸልቢ!” ኢሉ ብምስትምሳል ተዛረበ።
“ክሳዕ ክንድኡ ተስፋ ኣይትቝረጽ። ካብ ኣዲስኣበባ ከይወጽእ ደቂቕ ክንከታተሎ ኢና። ጽባሕ ናብ ኩላተን መደበራት ፖሊስ ስእሉ ኣሰኒና ክንሕብረን እንተ ኽኢልና፡ ሰኑየ ሰሉስ፡ እንተ ደንጐና ድማ ሓሙስ ወይ ዓርቢ ክንሕዞ ኢና። ኣብ ርእስ’ዚ ተሓቢኡ ንገዝኡ ከይምለስ ድማ ኣፍደገ ገዝኡ ንዕስራን ኣርባዕተን ሰዓታት ኣብ ጽኑዕ ሓለዋ ክነእትዎ ኢና። ንጽባሕ ንግሆ ጥራይ ስእሉን ሓበሬታኡን ኣዳልወለይ። ምኽንያቱ ካብ ጽባሕ ንግሆ ጀሚርና ኣብ መዓርፎ ኣውቶቡሳት፡ መዓርፎ ነፈርቲ፡ መዓርፎ ባቡር ሓያል ምክትታል ክንጅምር ኢና።” ኣዘራርባ ሻምበል ርእሰምትእምማን ዝመልኦ ስለ ዝነበረ ምትኩ ብመጠኑ ቀሰነ። ኣቐዲሞም ናብ ሳልሳይ መደበር’ዮም ኣምሪሖም። ሻምበል ኵነታት ስራሕ ክሳብ ዝርኢ ምትኩ ኣብ መኪና ጸንሖ። ብድሕሪኡ ፍሽለቶም ካብ ዘስዓቦ ብስጭት ንኽናገፉ ናብ ኣማኒት ሻምበል ኣምርሑ። ተዓዊቶም ምስ ተመልሱ ክብላዕ ዝተሓስበ ድራር ኣራማሲሶም ድማ ተረፍ ሕርቃኖም ዊስኪ ክሕንፍፉዎ ሓደሩ።
ይቕጽል
መበል 54 ክፋል ዝመጽእ ቀዳም
