“ምስ ገጠምቲ ክትላለ የብልካን” – ኦሾ

Bhagwan Shri Rajneesh(ኦሾ) ዝብልዎ ህንዳዊ ፍላስፋ፡ ካብ 1931-1990 ዓ.ም ኣብ መሬት ዑደት ዘካየደ እዩ። “ኣይሞተን ኣይተወልደን፡ ን60 ዓመታት ነዛ ፕላኔት ክበጽሓ እዩ መጺኡ” እዮም ዝብልዎ፡ እቶም “ዓለምለኻዊ ምንቅስቓስ ራጅኒሽ” ዝብሃሉ፡ ንሱ ካብ’ዛ መሬት ምስ ተፋነወ ዝቖሙ ኣባላት።

ኦሾ ግጥሚ የዕበድብዶ እዩ ኔሩ። ክንዲ ዝደለኻዮ ሰላምን ሓጎስን ካብ ግጥሚ ክርከብ ከምዝከኣል እዩ ዝኣምን ዝነበረ። ግጥሚ ክትንትን ከሎ፡ ጉዳም እዩ ዝፈታትሎ። ምስ ብዙሓት ዓበይቲ ገጠምቲ ብኣካል ምስ ተራኸበ ግን፡ ገጠምቲ ክጸልእ ጀሚሩ። “ንዕኦም እንተጸሊእካዮም፡ ግጥምታቶም ከተንብብ ከለኻ ትጽሎ ኢኻ። ዳርጋ ኩሎም ከኣ፡ እቲ ኣብ ግጥምታቶም ዘሎ ጽባቐ፡ ኣብ ዕላላቶም የለን። ግጥምታት ደኣ ኣምጽኡለይ’ምበር፡ ኔው ደኣ በሉለይ ገጠምትስ” እናበለ እዩ ዘማርር ኔሩ።
“ከም ፍቕሪ ኣቢሉ፡ ግጥምታት ዝተጻሕፈሉ ዓውዲ የለን። ብዛዕባ ፍቕሪ ብዙሓት ዓበይትን ዓሞቕትን ግጥምታት ተጻሒፎም እዮም። እቲ ዝገርም ግን፡ እቶም ዘየፍቀሩ ወይ ፍቕሪ ዝስኣኑ እዮም ብዛዕባ ፍቕሪ ዝጽሕፉ። ንሓደ ነገር ምስ ሰኣንካዮ ኢኻ ብዛዕባኡ ምሕሳብ ትጅምር። ትፈላሰፈሉ፡ ትገጥመሉ፡ ትቐብኣሉ። እዞም ኩሎም ብሓያል ስእለ-ኣእምሮ ብሉጻት ናይ ፍቕሪ ግጥምታት ዝጽሓፉ፡ ስለ ዘይወነንዎ እዮም። ከይተሞኮርዎ’ዮም፡ ብግምት ወይ ብኢማጂነይሽን ዝገልጽዎ። ቅርብ ኢልካ ፍቕራዊ ህይወቶም እንተፈሊጥካዮ፣ ነቲ ግጥምታቶም ምእማን ኢኻ ትስእኖ። ሕጂ’ውን፡ ምስ ገጠምትስ ዘይምልላይ ይሓይሽ።
“ምስ ገጠምቲ – ብፍላይ ድማ ምስ እተድንቖም ገጠምቲ – ፈጺምካ ክትላለ የብልካን። ብኣካል ቀሪብካ ከተዕልሎም ከለኻ ተስፋ ኢኻ ትቖርጽ። ዲንካር ዝብልዎ ድንቂ ህንዳዊ ገጣሚ ረኺበዮ ኔረ። ንሱ ልዕሊ ዝኾነ ህንዳዊ ገጣሚ፡ እጹብ-ድንቂ ግጥምታት እዩ ዝጽሕፍ ኔሩ። ሓደ ግዜ ናብ ገዛይ ምስ መጽአ፡ ሕማቕ ኣጋጣሚ ኮይኑ፡ ፈትዩኒ ፈትየዮ። ስምዑኒ፡ ንሱ እቲ ኣብ ስነ ግጥሚ ህንዲ መወዳድርቲ ዘይብሉ ገጣማይ እየ ዝብለኩም ዘለኹ። ዕላሉ ቈጽለመጽሊ እዩ። ብዛዕባ ፖለቲካ ኣይተዕልለኒ እንተበልካዮ፡ ብዛዕባ ሽኮርያኡ የዕልለካ። ናይ ሽኾርያ ዕላል ግደፍ እንተበልካዮ፡ ብዛዕባ ዘይምእዘዝዎ ደቁ የዕልለካ። ‘ዲንካር እንታይ ኢኻ ትዛረብ ዘለኻ!? ሰባት ካባኻ ግጥማዊ ዝኾነ ዕላል’ዮም ዝጽበዩ’ ኢለዮ። ‘እሞ 24 ሰዓታት ድየ ገጣሚ ክኸውን’ ኢሉ መሊሱለይ። ‘ጽቡቕ ኣለኻ፡ ግን 24 ገጣማይ ኣብ ዝኾንካሉ ጥራይ ምጽኣኒ። ኣነ ነቲ ዝገጥም ዲንካር’ምበር፡ ንዓኻ ኣይደልየካን እየ’ ኢለ ኣፋንየዮ። ብዲንካር ጥራይ ዘይኮንኩ፡ ብብዙሓት እየ ዲነይ ጠሊዐ! እቲ ዝኸፍአ ነገር፡ ግጥምታቶም ከተንብብ ከለኻ፡ እቲ ዕላሎም ድማ ኣብ ሞንጎ’ቶም መስመራት ኮይኑ ቅልቅል-ውጥም እናበለ ዝርብሸካ ምዃኑ እዩ። ገሊኦም ምንባብ ከይክኣልኩ ከለኹ ግጥምታቶም ዝሽምድዶ ዝነበርኩ፡ ብኣካል ምስ ረኸብካዮም፡ ተስፋ የቑርጹኻ። በቃ! ብኸም’ዚ ሰኪሐ እየ። ዘይምልላዮም ከም ፖሊሲ ወሲደዮ።”
“ሓደ ከኣ ኔሩ’ምበር ናይ ዑመር ከያም ግጥምታት ናብ ቋንቋ ህንዲ ዝትርጉሞ። ብዙሓት ናይ ዑመር ግጥምታት ተርጒሞም’ንድዮም፣ ምስ ናቱ ዝዳረግ ግን የለን። ንሱኸ እንታይ ሕማሙ መስለኩም፣ ጽቡቕ ኢኻ እንተበልካዮ፡ ጽባቐ እንታይ ማለት እዩ፡ ካብ ምንታይ ተበጊስካ ከምኡ ትብለኒ. . . እናበለ’ዩ ዘሀውትተካ። ዋላ ደሓንዶ ሓዲርካ እንተበልካዮ፡ ስለምንታይ ተገዲስካ ሓቲትካኒ ኢሉ’ዩ ክትዕ ዝጅምር። ኣታታታታታ. . . ኣብ ዝኸድኩዎ ሃገር፡ ብገጠምቲ ተሰላችየ እየ። ሕጂ ግን ምልላይ ምስ ገደፍኩዎ፡ ተኸይፈ ግጥምታት አንብብ ኣለኹ።”