ምስሊ ነብሰይ

ኣብ 4ይ ዓመት ውድድር ዛራ ገጠምቲ፡ ናብ ውድድር ካብ ዝተላእካ 42 ግጥምታት ካልኣይ ዕውቲ ግጥሚ ተሸላሚት $200 ዶላር ዝኾነት ዮሃና እንቋዕ ሓጎሰካ ገጣሚ ።
ምስሊ ነብሰይ
ኣብ ንጹፍ ኣጎዛይ፣
ኣካለይ ኣብ ገዛይ
ኣለኹ ከምሻሙ………።
የግዳስ መንፈሰይ ገሪዙ፤ሕልናይ እናገዓዘ፤
ተበገስ ዝብለኒ ዝሓዘ ምስ ሓዘ
ዘይቆጻጸሮ ካብ እዘይ ዝወጸ
ኣሎኒ ሓሳባት ዝመጽእ ምስ ግዜ።
ሓሳብ ተጓዓዚ ሓሳብ ተመርቃፊ
ሸለው ዘብለኒ ካብ ጽንፊ ናብ ጽንፊ
ኣድኪሙ ኣላህሊሁ ዝበኒ መዕረፊ
ኣብቲ በሪኽ እምባ ኣብቲ ገምገም ጸድፊ።
ኣብቲ ጉዕዞ ሓሳብ፣
ጓል-ሓሳብ ቖንጪለ፤
ስለ’ዛ ነብሰይ ሓደ ሕቶ ኣልዒለ
ከመይ’ቢሎም ሰባት “ጽቡቕ ኣሎ” ዝብሉ፤
ምስለይን ስእለይን ከየነጻጸሩ።
ኣብ መረጽየን ሰማይ ኣዒንተይ ተኺለ
ሃሰው እንተበልኩ ምስለይ ከለሊ አለ
ስእለይ እምበር ኣይረኸብኩን ምስለይ
ንውሽጠይ ዝገልጽ ዓይነይ ዝመልኣለይ።
ደገይ እናረኣየ እቲ ሰብ ዝብለኒ
ገለ ግበር እና’ለ ምስ ደፋፋኣኒ
ጉዕዞይ ኣወንዚፈ ክጸንሕ መሪጸ
ስእለይ ከሳንዮ ንምስለይ ቀሪጸ።
ሽዑ……
ካብቲ ገምገም ጸድፊ ምሒር
ተመጢጠ
ኣብቲ ህዋ, ሰደቓ ኣቐሚጠ
ንደበና ከም ጭቃ ኣምበራ ኣብኩዐ ኣብዒጠ
መበቆል ፍረ-ገጸይ ብወጅሀይ ኣርቢሐ
ንምስለይ ዝውክል ኣካል ሰብ ሰሪሐ።
በቲ ሓደ ……..
ቁመና ኣካለይ ግርማ ዝዓሰሎ
ማራኺ ጽባቐ መልከዐይ ወለሎ
ርኹብ እንተሉኒ ዕድሉ ኣብ ግንባሩ
ስኡን እንተሉኒ ካብ ኢዱ ድራሩ
……………..ብዘየገድስ።
በቲ ኻልእ……
ኣብ ሰንፈላል ኮይነ ወጋሕታ ዝጽበ
ብሰብ-ሰርሖ ጸገም ዙርያይ ዝተኸበ
ሓዲግ ሰማይ ሓዲግ ምድሪ
ጸግዒ ዝሰኣንኩ ብዘይካ ፈጣሪ።
መሊሰ ከኣ……
ዕቱብ ገጸይ ዝድሀ ብስቕታ
ድነ-ሕሰም ዝቐድድ ፍሽኽታ
ግናዕ ኢደይ ዘርጊሐ ንሰላም
ተስፋ ተዓንጊለ ብህድኣት ዘሳጉም።
እዚ’ዩ ምስለይ፣
ምስለይ ምስሊ ዓደይ፤
እዚ’ዩ ስእለይ ፤
ስእለይ ስእሊህዝበይ፦
ኢለ……..!
ክብገስ ተበልኩ ግዝዐይ ጠቅሊለ፥
እቲ ዘይገልጾ ክሓብኦ ዝደሊ
እቲ ዘሕለፍክዎ እቲ ናይ ትማሊ
ኣብ ዓይነ-ሕልናይ ዝብል ቅጅል ቅጅል
ምስልኻ’የ ይብለኒ’ሎ ከዊልካ ዘይክወል።
ብ ገጣሚ ዮናስ ገብራይ ምነይ