Tsegay Mehari
ኣብቲ ኣብ ዘመነ ” ናጽነት” ዝትሃንጸ ካብ መቓብር ሃብታማት ዘይንእስ ሸላታት ማይ ስርዋ፡” The Icarus Ajenda” እትብል መጽሓፍ የንብብ ነበርኩ። milos varak ዝተባህለ ካብ ቀንዲ ጠባያት ታ መጽሓፍ ኣብ ግዜ ሶቬት ሕብረት ካብ ችኮዝላቭክያ ሃዲሙ ናብ ኣሜርካ ዝኸደ ነበረ። ኣብ ሓደ ስርሒት ነብሱ የላሊ ነበረ ሞ፡ ከምዚ በለ ፡ቃል ብቃሉ፥
…I came from a country
Whose goverment is stolen
From the people!. ሸቕ ኣበለኒ ውሽጠይ ሻቡ። ልክዕ ከማይ ድማ በልኩ።
እንሆ ኣብዚ ቅንያት ድማ እታ መንግስነታ ካብ ህዝባ ዝተሓድገ ሃገርና ” በዓል ናጽነት ” ከትብዕል ብሩር ዶ ወላ ምሩር ትብል ኣላ። መንዩ ናጽነት ከብዕል። እቶም ግኡዛት ኣኻውሕን ጽርግያታትን!? ናጽነት ኣብ ዘይብሉ ኸ እንታይ ማለት’ዩ በዓል ናጽነት? ” ናጽነት የማያውቁ ናጽነት ኣውጪ” ኢሉ’ሎ ተስፋየ ገብረኣብ ኣብ መጽሓፍ። ከምዚ ናትና ማለት ኮ ዩ። ናይ ካልእ ከይጉድሎ ከይሸራርፎ፡ ናተይ ዛንታ ሂወተይ ኣብ “ናጽነት” ነዚ ይመስል።
ኣርባዕተ ዓመታት ካብ ቲ እግዚኣብሄር ከም ሰብ ተፈጢረ ከም ሰብ ክነብረሉ ዝሃበኒ ዕድመ ኣብቲ ከም ሰብ ተፈጢርካ ከም ሰብ ዘይንበሮ ጎዳጉዲ ማይስርዋ ኣባኺነዮ። ምእሳረይ ዘይኮነስ ኣታኣሳስራይ ወትሩ የስተንትኖ። ሓደ ምሸት ከምቲ ልሙድ ዕላል ውሽጢ ሒዙኒ እንከሎ ከምዚ እትብል ግጥሚ ገጠምኩ።
ዝጎየሉ ግዜ እናጎየየ
ዳሓን ኩን ኢለዮ ተኾርምየ
ኣይደንገጸለይን!
ጎኒጹኒ ተዓዚሩ
ሕብራዊ ክታም
ኣብ መሰመር ሂወትይ ኣምቢሩ።
በዛ ግጥሚ ጌረ ናብቶም ኣብ ዘመነ” ናጽነት” ዓሰርተታት ዓመታት ናይ ዕድሚኦም ኣብ ዘመነ “ናጽነት” ኣብ ዝተሃንጸ ጎዳጉዲ ዘባኸንዎ ዜጋታት ዘከርኩ። ኣብ ጎነይ ዝነብሩ ሸላታትን ኮንቴነራትን ፌሮ ኣብ ኢደ እግሮም ከም ኣምባር ዝተሸለሙ መናብርተይ ናይ ቲ ሂወት ኣሰተንተንኩ። ምስትንታን ሒዙኒ ሃጽ በለ። ምስትንታን ፈጠረ ኣስተንትኖ። እቲ ጽቧቅ ነገሩ ብውሽጥኻ ከተስተንትን ሰብ ዘይቆጻጸሮ ጉዕዞ ውሽጢ ምንባሩ’ዩ። ኣብ ዘመነ ” ናጽነት” ዳግማይ ዝሰንከሉ ስንኩላን ” ናጽነት” ኩድም በሉ ኣብዚ ቅድመይ። ደቆም ብሰንኪ ታ ” ናጽነት” እትብሃል ስግረዶብ ብምኻዶም ደቆም ስኢኖምስ፡ ደርሆኹም ውን ትኹን ሸይጥኩም ሓምሳን ዕጽፉን ሸሕ ክፈሉ ዝተባህሉ ናፍቕትን ሕራነን ኣብ ገጸም ዝንበብ ወለዲ ኣብ ፊተይ ቆይሞም ምእላይ ኣበዩኒ። እዚኦም እቶም ብጸሎትን ብጉልበትን ንሳላሳ ዓመት ነታ ” ናጽነት ” ዘምጽኡ ወለዲ ዮም።
ነቲ ሞት ተሳሊመ ፡ ከም ጎይታ ዓለም ክርስቶስ ኣብ ዘመነ “ናጽነት” ብገመድን ፌሮን ዝተሰቐልኩዎ፡ ኣሰተንተንኩ። ኣብ ዝመነ ኣፓርታይድ ኳ ኣብ ሽድሽተ ወርሒ ንማንዴላ ዝፍቀደሉ ዝነበረ ናይ ምጽሓፍ ደብዳቤ ናብ ስድርኡ፡ ኣብ ቲ ኣብ ዘመነ” ናጽነት” ካብ ኩሉ ብግዴታ ተወሺበሉ ዝነብረሉ ዝነብረኩ ጎዳጉዲ ማይስርዋ ግን ንዓመታት ጭራም ደብዳቤ ዘይላእኾ ሂወት ኤርትራዊ ኣብ ዘመነ” ናጽነት ” ኣስተንተንኩ። ክንደይ ሞ ዘየስተንተንኩ። እታ ግጥመይ ኣዕረፈትኒ።
ገሊኡ ሃሳስ ገሊኡ ድሙቕ
ገሊኡ ዝርገም ገሊኡ ዝምረቕ
ገሊኡ ዘጨክን ገሊኡ ዘበቑቡቕ
….ክንደይ ሞ ክብሎ
ኣብ ውሽጠይ ኣብ ደገይ
ዕደመይ ዝኸተሞ።
ኣብዚ ኣዕረፈኩ። ክንደይ ሞ ዘይስተንተንኩ ኣብቲ ኣብ ዘመነ ” ናጽነት” ብናጽነት ኣልቦ ነጻ ጉልበት ዝተሃንጸ ባዓትታት ማይ ስርዋ ተኾርምየ።
እንታይ ማለት’ዩ ግዲ ናጽነት? ናጻ ምዃን ድዩ ወላ ካልእ ትርጉም ዩ ዘለዎ? ናይ ኣበይ ዘላ ናጽነት’ ዮም “በዓል ናጽነት” እናበሉ ታቱላ ሒዞም ለለ ዝብሉ ዘለው። መርዓት ዘይብሉ ሕጽኖት !!!
እንሆ ሕጂ ድማ ኣብዚ ” ናጽነት” ደልየ ዝተሰደድኩሉ ሃገር ኮይነ የስተንትን ኣለኹ። እቶም ኣብ ዘመነ” ናጽነት” ኣብ ዛንታ ውን ኣምቢብዮ ዘይፈልጥ ኣብ ሲናይ ዝተሓርዱን ኣካሎም ዝተሸጡን ኣንሀዉ ኣብዚ ቅድመይ። ኣረ ከመይ ጌረ የ ካብዚ ኣስተንትኖ ክእለ። ፍጹም ኣይክኣልን’ዩ። ኣዒንቲ ሕልናና ንካልኢት ውን ኣይታኸስን ዩ። ነቶም ኣብ ማእከላይ ባሕሪን ኣብ ሳሃራን ንቡር ቀብሪ ዘየረኸቡ፡ ኣብ ዘመነ’ዛ ” ናጽነት” እትብሃል ዘላ ሂወቶም ዝሰእኑ ህጻናትን ዓበይትን ዜጋታት ህልም ኢለ ኣለኹ። ለካ ሞት ነቲ መዋት ዘይኮነስ ነቲ ዘሎ’ዪ ቀታሊ። ኣሳቓዪ። ኣሰቆርቋሪ። ኣብዚ ኩነተ ኣእምሮ ኣለኹ ኣብዚ ካልኢት።
ነቶም ቅድሚ ሰሙናት ኣብዚ ዘመነ “ናጽነት” ኣብታ ሕጂ ገጣሚ ዮሃንስ ኣብራሃም ” ኣብ ግንባራ ባንዴራ ኣሲራ፡ኣብ ሕምብራት ደቃ ኣሲራ” ዝበላ ከተማ ኣስመራ፡ ኣብ ማእከል ኣባሻውል ብተመልከተለይ ብዓረር ኣሕዋቶም ዝተዛሕዝሑ መንእሰያት ብሕራነ ይዝክሮም ኣለኹ። ትማሊ ዝተደርመም ኣራእስ ሎሚ ክስዕስዕ ክርእዮ ከለኹ፡ እንታይ ዓይነት ሕማም መንፈስ ሓሚምና ከም ዘለና ኤርትራውያን ጽውጽዋይ ይኾነኒ።ኣብ መርዓት ዘይብሉ ሕጽኖት እንነብር ዘለና ህዝቢ ምዃና ቃንዛ ልቢ ይፈጥረለይ።
ኣብዚ ዚ ዘመነ” ናጽነት” ብዳግማይ ሄረዶስ ዝተሳደደት ቤተክርስትያን ኣብ ቅድመይ ስለዝቆመት ክጻወሮ ዘሸግረኒ መንፈሳውን ስጋውን ቃንዛ ስለዝፈጠረለይ ፡ናይ ሎሚ ኣስተንትኖይ” መርዓት ዘይብሉ ሕጽኖት” ኣብዚ ክዛዝሞ።
22፥30 17 ግንቦት 2016
ቡደን ስዊድን።
