ብርሃነ ገብረሂወት
ሰንኮፍ እምነትኩምን ኣካይዳኹምን እርእዮ ኣለኹ። ሕግታተይ እናተጣሕሰ፡ ክብርታተይ እናተጋህሰ ሱቕ ክብል
ኣይመረጽኩን። ቁጥዐይን ስምዕታይን ንምግላጽ እነሆ መልእኽተይ እሰደልኩም። እዚ መልእኽቲ ዝበጽሖ ነቶም ዘይበጽሖም
ይንገርን የብጽሕን።
ኣቱም ምስሉያት፡ እሙናት ኣገልገልተይ መሲልኩም ንኽትረኣዩ እትገብርዎ ጸደፍደፍ እዕዘቦ እየ። ግናኸ ሕጉስ ኣይኰንኩን።
ቀዳማይ ትእዛዘይ እንታይ ምዃኑ ኣይትፈልጡን ዲኹም? ኣይትስረቑ ኢለኩምዶ ኣይበልኩኹምን? ፍርደይ ጨካንን
ዘየናሕሲን’ዩ እሞ ወይልኹም። ካብ ነንሓድሕድኩም ሓሊፉኩምሲ፡ ኣብ ሪቐይ ካብ ዝኣተወ ምህርቲ እናኣምጻእኩም
ክትጥብሩኒ ኣይትፈትኑ። ብሕጓ ተመኹሊኹም እተውጽእዎኸ ንምንታይ? ኣነ ጥበብ ብሓቂ እብለኩም ኣለኹ። ክንዲ
ትስተሩ ኣይትገተሩ፡ ተበላሺኹም ነቲ ምሩጽ ምህርቲ ኣይተበላሽዉ። ናይቲ ክርዳድ ምህርትኹም ከይኣኽለንስ ሕማም
ደግሲ ኣይትወስኹለይ። ሕመቕኩምን ድኽመትኩምን ማዕረ ሕፍረትኩም ስተሩ።
ኣቱም ድዉያት ኣእምሮ ቁሩብዶ ኣይትበራበሩን! ኣቱም ሰብ ልሙሳት ኣእዳውን ድፉናት ልቢን ቁሩብዶ ኣይትነቕሑን?
ኣቱም ዘመውቲ ቁሩብዶ ሕንከት ኣይትፈልጡን? ንቑጥዐይ ኣይተብእስዎ እብለኩም ኣለኹ። ክሳብ መኣስ ኢኹም
ዘይውላድኩም ውላድና እናበልኩም ከተሕቁፉኒ? ዘይውሉድኩም ንምንታይ በሃግኩም? መኻናት ምዃንኩም ንምንታይ
ኣሚንኩም ዘይትቕበሉ? ዘይጠነስኩሞ፡ ዘይሓረስኩሞ፡ ዘይሓዘልኩሞ፡ ዘይሓንገርኩሞ፡ ዘይጸዓርኩምሉን ዘይደኸምኩምሉን
ሒዝኩም ልዳተይ ኣይትዃሕኩሑ። ውሉድ ጠቢባን፡ ዝተባረኸን ዝተቐደሰን’ዩ እሞ ኣይተራኽስዎ። መን ንመን ወሊዱ
ዘይፈልጥ ኣይኰንኩን። ወዲ መን’ዩ መጻጕዕ ወዲ መን’ዩ ጥዑይ ኣይተኸወለንን። ሕጂ ውን እብለኩም ኣለኹ፡ ካብ
መንፊትኩም መንፊተይ ይጸብብ። ዕዳጋ ውርደት ኣይትምረጹ።
ኣቱም ኣብ ውርሻን ህያብን እትኣምኑ ወይልኹም። ጥበብ ቀዳሞት፡ ውርሻ ንዳሕረዎት ወለዶታት እምበር ንህሉው ወይ
ንውልቀ ሰባት ኣብ ዓንቀጻተይ ኣይተፈቕደን። ንህያብን ውርሻን ዝምልከቱ ዓንቀጻተይ ውን ግሉጻት ኣይኰኑን። መኣስን
ንመንን ከም ዘውርሶ ኣነ ጥራይ’የ ዝፈልጥ። ንምንታይ ደኣ ብሂወት እንከለዉ ንዋናታቶም እትምንጥልዎም? ንምንታይከ
ናይቶም ብሂወት ዘየለዉ ጠምጠም ክትብልዎ ሓረኹም? ንሳቶምሲ ንዓይ ኣውሪሶምኒ እዮም ከይዶም። ልዕለይ
ክጣበቐሎም ዝኽእል ሓደ እኳ የሎን። ንምንታይከ ስጋኦም ከይፈረሰን ኣዒንቶም ከይነቘረን ንውሉዶም እትቀዳደሙሎም?
ዘኽታማት መሲሎም ዲዮም ዝረኣይኹም ወይሲ ሓልዮትኩምን ርህራሄኹምን ኢኹም ከተንጸባርቑ ትፍትኑ ዘለኹም?
ኣእምሮኹም ገና ዕሸል ምህላዉ ኣስተውዒለ ኣለኹ። ዋናታቶም፡ ኣስከሬኖም እምበር ክታሞምን ድምጾምን ኣይተቐብረን።
ወላ ነቶም ዝሓመቑ ስራሓቶም ልዕሊኦም ከተጸብቕዎም ከም ዘይትኽእሉ እፈልጥ’የ። ማይ ጸባ ካብ ልግዐ ክበልጽ ኣበይ
ርኢኹም? ብኽብረትኩም ኣእዳውኩም ኣክቡ እብለኩም ኣለኹ። መቓልሕ ኣይትኹኑ እብለኩም ኣለኹ። ፈቲናዮምዶ ደስ
ኢሎምና እንተዘይበልኩም ይሓይሽ። ሱቕ እንተ በልኩም ከምሕረልኩም’ዩ እሞ ምኽኒት ኣይተብዝሑ። ብጥበብን ቅድን
ዋናታቶም ደኣ ፍተዉዎምን ኣድንቕዎምን እምበር ዘይብጽሓኩም ኣይብጽሓኩምን’ዩ። ቁጥዐይን ፍርደይን ጨካንን
ዘየናሕስን’ዩ እብለኩም ኣለኹ።
ኣቱም ንሰረቕቲ ብጣቕዒት እተበራትዑ፡ ብጎዞሞ ከይክትክተን ኣእዳውኩም ኣክቡ። ኣቱም ብሆይሆይታ እተስክሩዎም
ኣፍኩም ዕበሱ። ንሕፍረቶም ብመጋረጃ ድንቁርናኹም ኣይትኸውሉሎም። ንሰራቒ ሰራቒ በሉዎ። ሌባ ሌባ እንተ በልኩሞ
ሉባ ሉባ ዝበልኩሞ ከይመስሎ ቋንቋኹም ኣነጽሩ።
ኣቱም ካብ ሰብኣውነት ወጺእኩም ኣብ ዳሳት ፖለቲካ እትለሃዩ ዘለኹም፡ ኣቱም ሰነፋትን ግብዛትን ወይልኹም! ነቲ
ብድሕረኹም ዘሎ ጥጅእ ዘይተስተውዕሉ ንምንታይ? ዕርቃን መን ክትሽፍኑ ኢኹም ክትነብሩ? ብድፋዕ ጓይላ እተዝምትዎ
ዘለኹም ሕልምታት ኣብ ዝባንኩም ምህላዉ ፍለጡ። ብመንጽር ተጋጊኹም እተጋግይዎይዎን ተታሊልኩም እተታልልዎን
ክሓተኩምን ክፈርደኩምን እየ። ካባይ ዝዓቢ ጸግዒ የብልኩምን እሞ ጸግዒ ኣይትድለዩ። ንወጮ ካብ ወጮ ከተብልጹ ኢደ
ቤዛ ኣይትኹኑ ኢለ እግስጸኩም ኣለኹ። ራኢኹም ኣርእዩ፡ ንዓለምኩም እምበር ንዓለም ካልኦት ኣይተሳስዩ እብለኩም
ኣለኹ።
ኣቱም “ተሰማዕቲ ኢና እሞ ኣብ መድረኻት ወጺእና ከነስምዕ” እናበልኩም፡ ብሓይሊ መጉልሕ ድምጺ እትግዕሩ ዘለኹም
ተኣርነቡ። ካብ ብልሒ ሴፈይ ከም ዘይተምልጡ ብቁጠዐ እብለኩም ኣለኹ። ንሴፈይ ኣብ ጐረሮኹም ከም ዘውዕሎ
እነግረኩም ኣለኹ። ነታ እተቃልበልኩም ልቢ ክደፍና፡ ነተን ዝጸናጸናኹም ኣእዛን ውን ከጽምመን እየ። ኣብ መገዲ ዝወግሖ
ዝብኢ ኴንኩም ከይትተርፉ አሰምዕ ኣለኹ።
ኣቱም ንለቘታ ከብድኹም ክትብሉ ብስመይ እትዕሰቡ፡ ኣቱም ብዘይሰራሕኩሞ ዝና እትጽበዩ፡ ኣቱም ደገምትን ቀዳሕትን፡
ኣቱም ብስመይ እትሽቅጡ ወይልኹም! ካብ ሓደ ቀንጪብካ ካብ ሓደ ቀንጢብካ ከም ዘይከውን ገና ኣየስተዓልኩምን።
ብነበልባል ሓዊ ከም ዝቐጽዓኩም ሕጂ ውን እብለኩም ኣለኹ።
ኣቱም ቈፎ ተስፋኹም ዝነገፍኩም ኣይትልብሙንዶ? ካብ ዘይብልካዶ ይወሃብ’ዩ። ከውሒዶ ምህርቲ ክህብ ርኢኹም
ትፈልጡ ኢኹም? ክሳብ መኣስ ኢኹም ሕጊግ ክትብሉ? ተስፋ ቈሪጽኩም ንሰባት ተስፋ እተቝርጹኸ ንምንታይ? ኣብ
ጸቢብ ርእስኹም ንኹሉ ኣይተጻብቡዎ። ሞራል ዘየስንቕ ስራሕ ኣብ ውሽጥኹም ቅበሩዎ። ኣነ ጥበብ እብለኩም ኣለኹ፡
ዓቕሊ ጽበትኩም ኣብ በይንኹም ይዅን።
ኣቱም ድፉናት ኣእምሮ፡ ኣብ ውሽጥኹም ዘሎ ጸላም ከይገናሕኩም ንመን ኢኹም ከተብርሁ? ስነ ጥበብ’ዩ ጸሓይ ሕብረተ
ሰብ ንሕና ከኣ ጩራታቱ እናበልኩም እትውክኹ፡ በየናይ እንዶኹም? ጸላምዶ ብጸላም ይደምቕ’ዩ? ኣነ ጥበብ እብለኩም
ኣለኹ፡ ኣቐዲምኩም ንውሽጥኹም ኣንጽሁን ኣብርሁን። እቲ ብርሃን ካብ ውሻጠኹም ይጀምር ኢለ ኣለኹ። እቲ ንውሽጡ
ዘድምቕ’ዩ ንኸባቢኡ ዘድምቕን ካብ ርሑቕ ዝጥመትን። ኣብ ግዜ ጸላም፡ ቁልዒ ውን ካብ ርሑቕ ዝረአ እኳ እንተ ዀነ ካብ
ምግጋይ ሓሊፉ ንኸባቢኡ ዝኸውን ኣይኰነን። ቅሂሙ ከም ዝጠፍእ ከቶ ኣይትስሕትዎን ኢኹም። ኣብ ውሽጡ ሓይሊ
እንተለዎ ግን ክጕህር ዓቕሚ ኣለዎ። ድኑስ ሓይሊ ኣለኒ እንተ በለ ግን ትርጕም የብሉን እብለኩም ኣለኹ።
ዓቕሚ ከም ዘይብልኩም እብለኩም ኣለኹ። ኣዋድቓ ቃላትኩም፡ ኣቀማምጣ ብራሽኩም፡ ኣቀራርጻኹም ጉዕ ጉዕ ይሽትተኒ
ኣሎ። ይጸይቑ፡ ይላመዱ ዝብል ድልየታተይ ኣነነት ኣሰዊዱ እዕዘቦ ኣለኹ። ኣብ ፈተነታትኩም ትዕቢት፡ ጽልኢ፡ ቅንኢ፡
ምንዕዓቕ እዕዘብ ኣለኹ። ኣቱም ንብርዕኹምን ብራሽኩምን ኣብ ጐድኒ ብረት ኣሰሊፍኩም፡ ንውግእን ግጭትን፡ ንጽልእን
ቅርሕንትን እተውዕሉ ዘለኹም መሳወርቲ ወይልኹም። ንዓኻትኩም እየ ኣቱም ስንኩላት ኣእምሮ! ኣነ ጥበብ መተሓቛቘፊ
እምበር መናቘቲ ኣይኰንኩን እብለኩም ኣለኹ። ንሰላም ዘይቀውም ውጽኢት ጥበብ ኣብ መዛግብተይ ቦታ ከም ዘይብሉ
ደጊመ እእውጀልኩም።
ኣብ መዝገበይ ክትኣትዉ፡ ሓዲሽ ሓሳብ ኣመንጭዉ። ሓዲሽ መገዲ ሃንድሱ። ዝና ክትረኽቡ ሓዲሽ ብልሓት ኣተኣታትዉ።
ኩሉ ዝኽእሎ ወይ ካልእ ዝበሎ ሒዝኩም ልዳተይ ኣይትዃሕኵሑ። ቅርጺ መንነትኩም በቲ እትስርሕዎ ስለ ዝቐውም
ኣዋድቓ ከይተኽፍኡ ኣይትዃንይዎ። ኣይትመሳሰሉን መሲልኩም ኣይትሕደሩን። ኣነ ጥበብ አሰምዕ ኣለኹ።
