ሕርሲ ይርግኣለም ፍስሃ?!

. . . ጸባ ስኖም ምሽራፍ ዘፋረቑ
ታተ ዝብሉ. . . እግሪ ዘየደልደሉ
ፍሑኽ እምበር ጠጠው ዘይመለኹ
መዓስ እዚ ጥራይ
እናሃለዋ ናጽላ . . .!
ምስ ጥሉል ሕምበርቲ
ብጽሕቲ ወርሒ እያ
ትጽበ ንሕርሲ
ከም ሕሱም የምልሳ ውን
እቲ ሓድሽ ድቂ
. . . ትጸፊ ውን ጽግያታ ወርሓዊ
በቲ ድማ ጠጥቡ ማናቱ
ኣዒንታ ብንብዓት
ማንታ ማንታ ንዳተሓለቡ
‘ሕርሲ ተታሒዛ’
ምስ በሉኒ ደቃ
‘ ኣሕ!!. . .
ገነት ሽጎም ከይልእካላ
በየናይ ዕድለይ
በየናይ ዕድላ!’
‘ክዳን ቆልዓ ከይነቐብል
መዓስሞ ፎዝያ ሓሽም ሞጊታ’
ማርያም ተገላግላ
ቁሪ ውሉዳ ይቕበላ
ኣርያም ወልደኣብ
መዓስ ‘ደሃይ ኣሕዋት’ ሓቲታ
ሩት ስምኦን ምሓሸት
ግን ከመቢላ ?!’
‘ንብዓት ኣደይ ዘይነብ
ምስናይ ኤህታ
ግጥምታ ሃየንታ!
‘ሳባን
ፍርቱናን ተዓኒደን
ሜሮን ዓይኒ ከፊታ
ኤልሳ ጭሩም ነቢዓ
ነቢዓ ኣንቢዓ!
እንዳሸይጣን ኳሕኩሓ
ሕርሲ ዮሃና
ኣብ ህልቂት ላምፔዱሳ
ሶፍያ ከተሽካዕልል
ናይ ነገር ጻዕሪ ገመል
ንምቕባር ርእሲካ ኣብ ሑጻ
ሄለን መለስ ድምጻ ለኺታ
‘ማመት ናፊቕናኪ’
ከም ዝበሎ መለስ
ኣንቱም ናፊቕናኩም
በልለይ ‘ልክዕ ከምዛ በለስ!’
ንይርጋኣለም ንገሩለይ
ንኩሉ ክትነግሮ
መራግቲ እንተለዎም
ቶ’ም ሰብ ዒራዒሮ
ነቲ ክሑን ታሪኽ
መላስ ኣውያት ተተረኽቦ
ኣብ ሕርሲ ይርግኣለም
‘ ዓሮን ግራሮ. . . ዓሮን ግራሮ
ሓራሰይ መዓረይ. . . እንኳዕ ኣይመትክናኒ. . .’
እንክበሃሎ!
እወ. . . ኣብ ሕርሲ ይርግኣለም
ኢታይ ምቁር ሓርበታ
ሚለኑ ተቓርቒራ!
ነቲ ኩሉ ትርኢት
ኤልሳ ከይትስእሎ
ማርታ ወልዱ ከይተሕብሮ
ተደንኪና ሕብሪ!
ነቲ ድንኩል ሕብሪ
እንተበልና ክንሓፍሶ
ኣንታ ኮይኑ ሓዊ
ከመቢልና ክንልሕሶ !!
መርየም ሓጎስ በለት
‘ንዓልለላ ንዓልለላ’
ኣስቴር የውሃንስ ደመረት
‘ ንቡር ንግበረላ!’
ኣነ ድማ እንክህቅን
ንቡር ዕልልታ
‘ዕል ዕል ዕልልል እ እ
ዕ ል ልል እህእ እህእ እህእ’
እሕ!
ፊቕ! ፊቕ!
ፍቕ ፊቕ ትክኽንኽ !
ብንብዓት ንብዓት!!
መተርኣስ መስኪሩ
ምስትንፋሰይ እንቃዓ
. . . ኡፍ!. . እንታይ
ሕልሙ እዩ ኣንታ!?
ኣበራቢረ ድማ ቆልዓ
እንዳ ኣጥቦኹ እነኹ ይጽሕፋ
ነቲ ቐለም ሓንፊጸ ምስንብዓት
ኣቐሚጠያ ወረቐት
ዓጺፈ ብስርዓት!!
ሳባ ኪዳነ
ከውታ ለይቲ
23/ 09/ 2014 ፓሪስ