ዝባን ሽፍትነት!

 

 

 

በዓል መን ኢኹም፣ ኣይትሓልፉ’ይተሕልፉ

ገና ኸሎ ጕዕዞ ጾርኩም ተራግፉ

ኣብ ቀጢን መንገዲ ግዛዕኩም ተንጽፉ

ንዘዝተኸትረ፣ ንዘዝሓተተ ጓዕጺጽኩም ተዕርፉ

ኣንታ መን ይብሉኹም

ሕግኹም ቀቲልኩም ሽፍትነት ተጽርፉ፧!

እንታይ’ሞ…….ሽፍትነት ዳኣ

ንሕና ሸፊትናዮስ ንስኻትኩም ከኣ፤

ከይሰወድኩም ከም’ዚ ሕጂ

ጭልቃዓት ከለኹም – ህጻውንቲ

ናብ ዓዲ – ከተማ፣ ገለ ምስ ንዛወር

ግርማና ኽርኢ’ንታዋይ ዘይቅልቀል፤

ዘምጽኣና ገይርና

ልቢ ጐራዙ ለኻኺምና

በራእያ በርቂ፣ ስውር ከም ስርኤል!

……….ሽፍትነት ዳኣ

ንሕና ሓሊፍናዮስ ንስኻትኩም ከኣ፤

ኣብ ወልቃይት-ጠገዴ፣ ሰሳሕ ጣሕሸም’ንተ’ይላ

ካብ ሰምሃር ተኲሸና ብመንፈር ንቐትላ

ነብሪ-ጐልጐል ቀዲምና ምሳሕና ንገብራ።

ንሰብስ’ተዀነ………መኣስ ርሒቕናዮ

ሕጉ ዘዘፍረሶ ንሕና ንዃንዮ፤

ንዝተበደለ – ንጉስ ዝዘረዮ

ብወግዕና ግሩም ንዳንዮ፤

ኣብ ሽፍትነት ፍቕሪ ጸጊብናዮ……

ሎሚ ዶ ሕግኹም ሕጊ’ልናዮ!

ቀደም…….ዘኽበረኒ ዘኽበርኩዎ

ዘድሓነኒ ዘድሓንኩዎ

ሓደ ዕለት – ከይተጸበኹዎ

ዘውደ ዓርከይ ጋኔን ተንሲኡዎ፤

ናብ ሃድን ምውፋረይ ኣጻዊዱ

ኣርሒ ላመይ ሰሪቑዋ ኸይዱ።

……..ኣየ ዝሓለፈ……..!

ጸሓየይ ኣብሪቐ

ሽራራይ ዓጢቐ፤

ትዝ ’ናበለኒ ጕልበቱ፣ ሓሞቱ

እና ደንጸወኒ እውን ዕሽነቱ፤

ጸሓይ ከይተሰቕለት ልዕለይ

በሳጕማ ሽፍታ ጠቕሊለ መንገደይ፤

ነጢረ’ኣቱ’ሞ ናብ ደምበ ጥሪቱ

…..ሽፍታ ዶ’ንታ’ምለስ ጥራሕ ኢዱ….

ስለ ንላዘብ ግን ብሕጊ ሸፋቱ

ላመይ ዘሚቱ ኸ’በይ ክኣቱ

ቦታይ ተመለስኩ ሰሪቐ መርዓቱ።

….ዕሕሕ….እንሄልካ ደኣሲ

ሓዳረይ ዘይፈልጦ ሰሪሐላ ኣጕዶ

ዓቢደ’ዕቢደያ……ጸላኢና’ዕበዶ!

ኣካዊነያ’ወ፣ ክልተ-ወርሒ መመላእታ

’ዚ ናይ ስርቅስ ካኣ ገለ’ለዎ’ታ!!

ብዝዀነ……ደበኽ ቢሉ ላመይ ሒጁ

ኣልቂሹ………..ኣልቂሹ………..

ክሓድገሉ፣ ለሚኑ ሳእነይ ተተርኢሹ፤

“ይቕረ ይዅንካ” ብዝበልኩዎ ግን…..

……..እ……..ህ……….ም……….

እንድዕሉ ውሽጠይ ተሓሚሹ

ዓይነይ ውን ብዓቕሙ ተርኪሹ።

ነጊሩኒ – ላመይ ስርርቲ ምዃና

መርዓቱ ውን ካባይ ጠኒሻ ኸም ዘላ

ኣንፊሸሉ ሕብእብእ ዘይብላ፤

ከም’ዚ ቢልና ተቓሊዕና – ተጋሊጭና

ዝወረደ ኽንቅበል ጸጸር ውሒጥና፤

ላመይ ሂቡኒ – መርዓቱ ሂበዮ

እናተጻወትና ሩባ’ሳጊረዮ።

እወህ……………።

ኣብ ሽፍትነት ፍቕሪ ጸጊብናዮ

ፍትሒ ነቢርናዮ

ሎሚ ዶ ሕግኹም ሕጊ’ልናዮ፤

ካብ ቆፎ ሓረስታይ ቀለብ ናይ ዘሕደግኩም

ፍትሒ ናይ ተጕህዩ ሓቂ ቐቀቲልኩም

ንዓኹም ድዮም ኣታ ሸፋቱ ዝብሉኹም፧!

ኦፍቾ ትውዕሉ ኸም መንግስቲ

ባኖ ትኽደኑ ከም መኳንንቲ

ከም ዘይሓነቕናዮ ጐረሮ’ናብስቲ

ሞባእ ትምንጥሉ ካብ ቅናት ኣንስቲ

ካን ዶ’ታ ሽፍትነት ኰይኑ መጻወቲ!!!

ኣንቱም ደቂ ሕጊ – ጸረ ሕጊ…..ዝባን ሽፍትነት

ኣንቱም ኣፈ-ጨለ፣ መጠመቕቲ…..ዝባን ሽፍትነት!

ሽፍትነት ከም’ዚ’ይኰነን

ንማንም ዓምጣሪ መሐምበሲ’ይኰነን፤

ርሻን ተወጢሕኩም ሰብ-ጫካ’ይትምሰሉ

ስለ’ዝሄር ክብሪ’ይትበልሉ!

ኣገሪህኩምና’ምበር ኣይመሳለናኩምን

ሰናድር ኣውሪድና ኣይምሓንገርናኩምን፤

ኣብ ሽፍትነት ምእራግ ነውሪ መሺሉና

ኣካ ኸሓድናዮ ሕግኹም ኣሚንና!

………ኣቻህ!!! ክልተ ጠሚትኩም ኣይትተዓነዱ

ሕጊ’ንተ ደሊኹም ሰብ ምስማዕ ልመዱ፤

እንተ ዘየሎ………….ኡሁዋእ!

ወዛል ሽፍታ የልቦን – ዓሪኹም ዕጠቑ

ምስውስው ኣይኰነን – ከተማ ልቐቑ።

ቦኽረ ገብረየሱስ

መስከረም 2014