“ኣብ መንጎ ክልተ ብኡሳት እቲ ሳልሳዮም ይረብሕዶ”
ወልደኣብ ወልደማርያም
ሰሙናዊ ጋዜጣ 14 ሕዳር 1946 ቁ 220
* * *
ስእሊ ሓርበኛ ኣቦና ወልደኣብ ወልደማርያም ኣርማ እናገበርካ ንጽልእን ቅርሕንትን ካብ ምስባኽ ነቲ ጽሑፎም ሃሰስ ኢልካ ካብ ጽሑፎም ምምሃር ዝበለጸ’ዩ::
* * *
ኣብ ኤርትራ ዚነብር ሕዝቢ ነቲ ናይ ብሓቂ ጥቕሙን ምድሓኑን ኣብ ሕብረት ሓድሕዱ ኢዩ ክረኽቦ ዝኽእል። እንተ ደኣ ተፈላልዩ ግና ጣዕሳኡ ዘይወጽእ ጉድኣት ከም ዚረኽቦ፡ ህልምላሙን’ውን ከም ዘይረክብ እተረጋገጸ ኢዩ። ሕዝቢ ኤርትራ ኣውራ ኣውራ’ኳ በዛ ዝሓለፈት ፍርቂ ዘመን ሓንቲ ንብረት፡ ሓንቲ ዛንታ፡ሓንቲ ስም ፈጢሩ ይርከብ ኣሎ። እዛ ዛንታ እዚኣ ድማ እንተደኣ ብኣኡ ኣቢላ ቀጺላስ ንዕብየትን ንኽብረትን እትኸውን ዛንታ ኢያ። ከምዚ ዝበለ ከቢድ ኩነታት ኣብ ልቢ እቶም ዓበይቲ መራሕትን ምስሌነታትን ጉልሕን ሕያውን ኮይኑ ኪርከብ ኬድሊ ኢዩ።
ዝሰመረን ዝተሰማምዐን ሕዝቢ፡ ብስርዓትን ብጽቡቕ ኣገባብን ብውርዝነትን ዝመላለስ ጭዋ ሕዝቢ፡ ዝደናገጽን ዝደጋገፍን ርሕሩሕ ሕዝቢ፡ ግቡኡን መሰሉን ፈላልዩ ዝፈልጥ ደገኛ ሕዝቢ፡ ብንብረት ባርነት ዝሰልከየን እተሓለለን እሞ ነታ ናይ ሓቂ ሓርነት ብመንፈሳዊ ሓይሉ ሓይሉ ሃረር ዝብል ሕዝቢ።
ሓርነት ማለት ጥሪትካን ገዛእ ርእስኻን ኣብ መሰውያ ፍቕሪ ሃገር ምውፋይ ወይ ምስዋእ ማለት ከም ዘይኮነ ኣስተውዒሉስ ክህብ እምበር ክወስድ ዘይምነ፡ ንብጻዩ ከገልግል እምበር ኣብ ርእሲ ብጻዩ ክሽየም ኢሉ ለይትን መዓልትን ክጣበብን ክኣልምን ዘይነብር ህዝቢ፡ ሕድገትን ይቕሬታን ዝመል ኦ’ምበር ብቒምን ብበቐልን ክሕርቅም፡ ብቕንእን ብህርፋንን ነብሰ ስጋኡ ክብላዕ ዘይነብር ህዝቢ፡ ሓቅን ፍትሕን ደኣ ዘፍቅር’ምበር ዓመጽን መግፋዕትን ባህ ዘይብሎ ህዝቢ እግዚኣብሄር ኢዩ ህዝቢኤርትራ።
ኣብ መንጎ ደቂ ኤርትራ ሕብረት ከይርከብ እሞ እዚ ዘሎን እቲ ዝመጽእን ኩነታት ኤርትራ ድማ ቅልጡፍ መወዳእታ ከይረክብ ዚምነዩ፡ ኮነ ኢላቶም’ውን ዝጋደሉ ሰባት ኣይተሳእኑታን ይኹኑ እዮም ቀዳማይ፡ ኣብ ህውከትን ዕግርግርን ዝዓበየ ረብሓ ምርካብ ዝለመዱ ወይ ከኣ ብምስላ ከም ዝበሃል ኣብቲ እተዘርገ ማይ ዓሳ ምግፋፍ ስለ እተማህሩ እዮም። ካልኣይ ከኣ ምናልባሽ ኣብ ውሽጢ ሕልና ኣቶም በቲ ዝሓለፈ ግብሮም ሕርኽርኽ ዚብሎም፡ ምዕራይ ከኣ ገና ዜድልዮ ነገር ከይህልዎም እሞ ብኽሳራ ሕዝብ ኤርትራስ ጊዜ እናመጠጥካ ምጽናሕ ዚሓይሽ ኮይኑ ስለ እተሰማዓቶም ከይኮነ ኣይተርፍን።
