ኣልዓለኪ፥ ኣንበረኪ

መዛግብቲ ልብኺ ከይነብብ
ፊደል ፍቕሪ ዘይቈጸረ፡
መቓልሕ ስቕታኺ ከየዳምጽ
ኵሩዕ እዝኒ – ምስማዕ ዝሰኣነ፡
ከይምከር፡ ከይንገር
ብገዛእ ኢዱ ዙፋን ልሂቅነት ዝጸዓነ፥
ዘለኺዮ ከይኣኽለኪ
ብዕሩቑ ክኸድነኪ
ኣልዓለኪ፥ ኣንበረኪ፡፡

እናወጽአ መሞሊቑ
ድምጺ ስሒሉ ኣብ ምርሓቑ
ካብ ምርሓቑ
ለባሙ ሃዚሉ
ጥዑዩ ሕሙሙ ተተደባሊቑ
ማይ መሲሉ፡ ማይ ዓጢቑ፥
ዘለኺዮ ከይኣኽለኪ
ካልእ ስቓይ ከጥርየልኪ
ኣልዓለኪ፥ ኣንበረኪ፡፡

ካብ ዘሰቅቕ ጥፍኣት ወገናቱ
ኣመና ዘብኪ ትርግታ ብኽያቱ፥
ሓው ምስ ሓው እናተኻሰሰ
ንሓድሕዱ እናተታዀሰ፡
ኣብ’ቲ ኲናት – ሕማቕ ውዕሎ
ዒላማ ዝሰሓተ ኣእላፍ ዓረር
ብጭካነ ‘ጦሽ!’ እና’በሎ
ግን እንግድዓ ባሕሪ እናተቐበሎ
ግዳ ከም ሳዕቤኑ
ባሕሪ ንተኳሲ እናተበቀሎ፥
ዘለኺዮ ከይኣኽለኪ
ንባሕሪ ቀቲሉ ኣካ ከርህወልኪ
ኣልዓለኪ…ኣንበረኪ፡፡

ተኣኒኑ ንሩሕኪ ጠቢሑ
ቈርበትኪ ኣንጺፉ – ዘርጊሑ
መመሪጹ ክወስደኪ፡ ክቐልወኪ
ኣብ ሓምሳ ክጐዛዝየኪ፥
እናሓለመ ‘ምቅባጽኪ’
እናዘመረ ‘ምቕጻልኪ’
ኣልዓለኪ፥ ኣንበረኪ፡፡

ደልዩ ካብ ሰኣኖ ነቲ መፍትሕ
መፍትሕ ናይ’ቲ ተሪር መቝሕ
ኢዱ’ንጺሁ፡
ከም ሰብ ርሑቕ ዋኒኑ ከይመርሕ
ይወጣወጥ’ሞ እሾኽ ክነቕሰልኪ
ምስ’ቲ እሾኽ መርፍእ ይገድፈልኪ፡፡
ዘለኺዮ ከይኣኽለኪ
ኣብ’ዚ ‘ንሆ ተወሳኺ
ወወጊኡ ‘ና’ልቀሰልኪ
ሓንሳብ “እፎይ” ዘይምባልኪ
በዘልማድ ይሓ’መልኪ
‘ና’ልዓለኪ፥ ‘ና’ንበረኪ!

June 2016
bokre gebreyesus