“ንበጻጻሕ”

ገዛኹም’ባ ጽንሒ…!
ሸዊት ዕፉን ሒዘ፣ መታን ክመጸኪ
ድሓር ከኣ ንስኺ
ቅጫ ጐጐ ሒዝኪ
ገዛና ክትመጺ።

ናይ ብሓቀይ’ኳ’የ ንበጻጻሕ’ባ
ጠላሕ እንተበልናዮም፣
ስድራቤት ክልቴና
መን ይፈልጥ ሽዑ፣ እንተዋሰቡና
ቀውዒ ምስ ሓለፈ፣ እንተዀነ ጥሪና።

ትሰምዒ’ዶ’ለኺ…!?
ጽንዒ’ኮ’ዩ ሎሚ
ጽንዒ ባህሊ ኣቦኺ
ጽንዒ ባህሊ ኣደኺ
መቐይሮ ወቕቲ
ተስፋ ናይ ወለዲ።

ከመይ ደኣ…! ከመይ…!?
ከይትብሊ ብኸመይ…!?
ሎሚ እንድዩ ዓኾዃይ
ዓኾዃይ ዓኾዃይ
ሃንሰ-መስቀለ፣ ሸዊት ዝጥበሶ
ሓድሽ እኽሊ ዝቕመሶ
ተስፋ ጥዑም እዋን
ጸላም ተሳዒሩ፣ ዝነግሰሉ ብርሃን።

ሒዝክኒ’ዶ ኣለኺ…!?
ጽንዒ’ኳ’ዩ መጺኡ
ሒዙ ንዘመናይ፣ ክኸውን ለዘመን
ጽንዒ ብርሃን ዘመን
ቁራዕ ሓምሊ ወጺኡ
ገዓት ጠስሚ ኣትዩ
ንሕና ከኣ ምስኡ፣ ዘመን እናቋሰና
ንበጻጻሕ ‘ምበር፣ ከምቲ ዝመስለና።”
ትዝክርዮ ዶ ዓሚ
ልክዕ ከምዛ ሎሚ
ግዜ ከይሓሰመ
ግዜ ከይመረረ
ሰብ ከይሃደመ
ሰብ ከይተሰደ
ሓንካስ ብምርኩስ
ተጓሕጒሑ፣ዅሉ ከይግዓዘ
ወላዲ ከይተከዘ
ከለኹ ኣብ ዓዲ
ልክዕ ኣብ ዓመቱ ኸኣ ዘኪረኺ።
ጐዐይ…!
ጐዐይ፣ ጓል በራኺ
ግዳ ክሓተኪ
ኣብ ውሽጠይ ዘሎ ንዓይ ዘሳጽየኒ
ትጽበዪ ዶ ኣለኺ፣ ወይስ መሲልኪ ነዲኺ
ወግዕና ረሲዕኺ
ከምኡ…! ከምኡ…!
ከምኡ ሰሚዐ እንድዒ!!

***
ተስፊት ኣብርሃም
27/9/2015