ድሕሪ ክልተ ቅነ …ካብ መዘክረይ ቁ.8…
ወይኒ ሱሌማን
ሰንበት 7 ነሓሰ 2011
ናይ ሳዋ መዳቕስትና- ኣበይ ኣሎ፧ ኣበይ ኣላ፧
” ኣንቲ… ኣለኺ ኣብዛ ‘ስመራ። ኣነ ድኣ ቀደም ወጽያ ትኸውን ኢለ።” ኣነውን ፍጹም ተጋጢምና ዘይንፈልጥ ብምዃና፣ ኣብ ኣስመራ ብዓቢኡውን ኣብ ኤርትራ ኣላስ ኣይበልኩን። ግምተይ ምስ ኣዕለልክዋ። ክልቴና ገሪሙና። ታሪኽ ዓለም ዝተቓለሱ’ምበር ዝሃደሙ ከምዘይተዓወቱ የዘንቱ። ዘመና ግና ገንጫር’ዩ። ኣርባዕተ መዓልቲ ይገብር ከተማ ኣማስየ ንገዛ እናተመለስኩ፣ ኣብ ከባቢ ማክላይስ ቅድሚ ሸሞንተ ዓመት ኣብ ሳዋ ጓል መስረዐይ ንዝነበረት ፌቨን ረኺበያ። ዎዮ ከምቲ ዝበሃል ግዲ ኮይኑ ” ፍቕሪ ሳዋ ክሳብ ፎርቶሳዋ” ድሕሪ ካብ ሳዋ ምውጻእና ሓንሳብ ረኺበያ ነይረ። ትማሊ ከኣ።
” ሎሚ ከምኡ እዩ ዘሎ። ኩስቶ ኣቤሎ ኣይትብልን ኢኻ” ኢላትኒ ፌቨን ኣብ መንጎ ዕላልና ብናይ ምስትምሳል ቃና። ፋሕብትን ኣእትዩልና ዘሎ ሽኩሽኳ ዶ ፣ ኩሉ ወጽዩ ድሕሪት ተሪፍና ዝብል ስምዒትዩ ኣቓዚንዋ ግና እንድዒ…፧
ስምዒትካ ይኹን ስምዒት ኣብ ከባቢኻ ዘለው ሰባት ከተንበበሉ ዘይትኽእል እዋን ኣለና። ሩዑ ጠቕሊሉ ሃጽ ዝብል ድሕሪት ዝገድፎ ዘሎ ዘይትካእ ኩለንትና ምንም ከይዓጠጦ፣ ብታሕጓስ ድዩ ረስኒ ከይብተን እናተሻቐልካ ኢኻ ተጣቕዓሉ። ተሓጊሰለኹሞ ንጸንብሎ ‘ብለካ። ተጣይሰ! ኣይውዕል ኣይሓድር ፓስፖርት ኣውጺአ እግረይ ናብ ዝመርሓኒ’የ። ቪዛ ኣህሪሙ ናይ ዝነፍጽ ክንደይ ድግስ ተኻፊለለኹ መስለኩም። ሓቂ ምንግጋር ዝፈልጥ ባህልን ልምድን ስለዘየዕበየካ ሱርካ እናተበርቖቐን እናተስኣኣንካን ተጣቕዕ በስ፧ ክሳብ እዋንካ ኣኺሉ ንስኻ’ውን ከምኡ ትገብር። ስምዒት’ቶም ምሳኻ ሻሂ ክሰትዩ ኣማስዮም፣ ጽባሕ ኢትዮጵያ ወይ ሱዳን ኣትዩ ዝብሉኻ። ካብ ኢድካ ምሉቕ ኢሎም ዝጠፍኡ ኣዑናቚ-ፈትውትን መቕርብን፣ ብስእነቶም ትዕነዶ! ትወድቆ! ውሽጥኻ ዝብተኾ! ንኹልና ዝኸውን ግዜ የምጸኣልና ከውግዑና ከነውገዖም።
ሕጽረት ትንፋስ ናብራ እኹል ምኽንያት ሃጽ መበሊ ኳ ተኾነ። እተደባለቐን ዘይርጉእን ስምዒት ኩልና መስመር ቀይሕ መብራህቲ ኣርጊጹና ዘሎ ይመስለኒ። ዘይንቡር ገልታዕታዕ ፈቐድኡ። ናይ ረኣዩለይ ሓጎስ፣ ናይ ሓሶት ፍሽኽታ፣ ጸዓትካ ዘጸንቅቕ ህልኽን ውድድርን ኣብ ቀንጠመንጢ።
ሰበይ ምድረሰማይ እኩት ኢላታ ብጸበባ ከተዕልል እንከላ፣ ” ንሕናስ ኣብ ፋሚልና …ኢሉ ዝጅምር ሕልና ዘዕርብ ቆልዓዊ ናይ ጽቡቕ ኣለና፣ ወይልኹም ንስኹም ዝዕላሉ ሰብ ውን ኣሎ። ኣነ’ኳ ዳርጋ ደንዚዘ ግዲ ኮይነ ለሚደዮ እየ። ነዚ ኣካውናና እናከስተውዕል። ጋዝ ተሸጊርና ወላ ላምባ ከኣ ስኢና። ተራ ዕላልዩ ኣብ መንጎኻ። ዎዮ ኣብ ሪጋ ሓዲርካን ውዒልካን ዘይተረኽበ ላምባ መለክዒ ደረጃ መነባብሮ ተረኺቡለይ…
” ንሕናስ ኣምላኽ ይመስገን ፔርሙስ(ናይ ላምባ መኸሸኒት ጸብሒ) ከማን የብልናን።”
ኢሎም ምስ ዘዕሉሉኻ ኣቦይን ኣደይን በበይኑ ….ነቲ ሃዋሁ ዝልክዕ ምስላታት ካብ ምድላይ ሓሊፍካ ትገብሮ ኣይህልወካን።
” ነናትና ሰለስተ ላፕቶፕ ስለዘለዋና ኤለክትሪክ ኣብ ትመጸሉ በቢ ሪጋ ቻርጅ ጌርና ኢና ንጥቀም።” ልቺ ጠፊኣ ከተዕነንዩ እንከለኹም ፊልም ኢና ንርኢ ዝዓይነቱ እዩ። ኢንተርነት ጸባ ደርሆ ኣብ ዝኾና ኤርትራ ካብኡ ዝኸይድ ኣጋልግሎት ብዘይትረኽበለን ላፕቶፕ ኣብ ልዕሊ ወገንካ ትንየት።
ናይ ገሊኡ እንጣጢዕ ንዘርእ ኣለና እዩ። እንታይ ኮይንና ኣሎና፧ እንታ’ዩ ጸገምና፧ ናይ ኩልና ጸገም ድዩ ኸ፧ ንግጠምዶ ንህደም፧ ደው ዘብልን ዝሓትትን ዘይብሉ ተብተብ ኩልና ናብ በበይኑ ክዉንነት። ንጸገም ኤለክትሪክ ኣብ ወጻኢ ዘለዉ ኣሕዋትና ብዝለኣኹልና ላፕቶፕ ኣቃሊልና ጽቡቕ ኢና ዘሎና ኢሉ ምስ ዘዕልልካ መዘና፣ ዝረብሕኳ እንታይ ከይትገብር እታ ናይ ውሽጥኻ ኢሂን ምሂን ግና ትሕረመካ።
” ኣንቲ ኣለኺ ኣብዛ ‘ስመራ፧”
ሓሚቕኪ ማለታዶ ይኸውን ፌቨን፧ ኣበሃህላኣን ኣጠማምተኣን ኣብ ሓሳበይ መላሊሰዮ፣ ኣይተረድኣንን። ክግምት ግና። እንታይ ትገብሪ ኣለኺ እዩ ዝኸውን። መን ይፈልጥ ቁሩብ ተሓጒሳ ነይራ ትኸውን ውን፣ ካብ ደቂ ዙራ ሰብ ምርካባ፧ ሎሚ ስሕት ኢልካ ንጣር ብገለ ኢኻ ካብ ደቂ ዙርካ ትረክብ። ንግዚኡ ዘጸናንዕ በይነይባ ኣይኮንኩን ዝብል ስምዒት ክፈጥረላ ይኽእል እዩ። ለቕዊሱ እምበር እዚ ሕልፈትና።
* * *
ድሕሪ ምዕጻው ዩኒቨርሲቲ ኣስመራ ናይ ፈለማ ካብ ካልኣይ ደረጃ ቤት ትምህርታት ናብ ቤት ትምህርቲ ዋርሳይ ይከኣሎ ዝወረድና ኣባላት 17 ዙር ኢና። ንዝነበረ ኣተሓሕዛ፣ ምትእትታው ሓድሽ ካሪክለም ትምህርቲ ዘስዓቦ ገልጠምጠም ሰፊሕ ትንተና ከድሊ ስለዝኾነ- ኩነታትና ንመፈተኒ ሓድሽ መድሃኒት ከምእተዳልዎ እንስሳ እዩ ነይሩ። መቐጸልታ ናይቲ ሰኣን ንጹር መመርሒ ዝገላበጥ ዝነበረ ኣካይዳ። ኣብቲ ፈለማ ተተሓሒዝካ-ሕማቕካ ንፉዕካ ንማይነፍሒ ዝተባህለ ኣባል 17 ዙር ኣብ ወርሒ መስከረም ናይ 2004 ማይነፍሒ ንምኻድ እናተሸባሸበ እንከሎ፣ ኣኣብ ምምሕዳራት ከተምኡ ንሳዋ ተመለስ ዝብል ምልክታ ተጻሒፍዎ። ኣወዳት ዓሊግድር ኣብ ዓጺድ ቀንዮም ድሕሪ ምምላሶም ከኣ ተመሃራይ ኣብ መርመራ መልቐቒ ካልኣይ ደረጃ ናይ ዝረኸቦ ነጥቢ ተነጊሩ። ነጥቢ ዝረኸበ ንማይነፍሒ ዘይረኸበ ንኣፍሂምቦልን ኣደርሰርን ምስ ተፈናጨለ። ዝበዝሑ ብፍላይኳ ኣወዳት ስግረዶብ ከይዶም። ሰሪ’ዚ ኣብ ሳዋ ዝነበረት ኩላ ሮምዮን ጁሌትን ናብ ማይነፍሒ ሲንግል ይብሉ እንግሊዛውያን ሲንግል ኮይና መጽያ። ካብ ዙር ናብ ዙር ምጽርራፍን ምልግጋጽን ስለዘይተርፍ ገለ ተረጋማት ኣባላት 18 ዙር፣ ንኹልና ብምኽንያት ስግረዶብ ዝሰንገልና ተመሃሮ 17 ዙር ” ኣንስቲ ስዉኣት ” ዝብል ሳጓ ኣጠሚቐናና ምንባረን ይዝክር። ካብ ተራ ዋዛ ዓርከ መዘና ዝኸይድ ትርጉም ስለዘለዋ ከዕልለላ ትጎድኣንን ተገርምን ኣገላልጻ እያ።
” ዑስሜ ክንደይ ትሓስም
ኣንታ ክንደይ ትሓስም
ክንደይከ ትጭክን
‘ና ፈለጥካዮ ዝልበይ ከመይ ከም ዝኸውን
ንዓጺድ ትውስን ”
ድሒሩ ንዝሰዓበ ፍጹም ምፍልላይ ዘይተገንዘባ ኣፍቀርቲ፣ ኣወዳት ንዓጺድ ተወሲዶም፣ ምስ ጸሓይ ሳዋ ጸጸረ እናኣረኻ ብዘይ ሓበሬታ ሕልምልም ምስ ኮነ። መረርአን ናብ ሚኒስተር ትምህርቲ እቲ እዋን ኣቶ ዑስማን ሳልሕ ዝገልጻላ ዝነበራ ናይቲ እዋን ፍቕራዊት ደርፊ ፌቨን ጸጋይ እያ።
