ኣብ 4ይ ዓመት ውድድር ዛራ ገጠምቲ፡ ናብ ውድድር ካብ ዝተላእካ 42 ግጥምታት ቀዳመይቲ ዕውቲ ግጥሚ ተሸላሚት 300 $ ዶላር ዝኾነት ዮሃና እንቋዕ ሓጎሰካ ገጣሚ ።
ናይ መወዳእታ ንብዓት
መርድእ ፋንዋ፡ ቅብጸት ቅድሚ ሕልፈት
ካብ ወዲ መኻን፡ ሕሩም ሽታ ሓመድ
ኣሰር ኣልቦ ሳጋሚ፡ መራግጾኡ በረድ
ጉዕዞ ዝባን ሑጻ፡ ኣብ ወርወርታ ረመጽ
መሓውርን ኣሰርን፡ ኣሕቢሩ ዝውሕጥ
ኣሰሩ ሽታ ማይ፡ ብራርያ መረበት፣
ኣይተናድዪ ኣሰረይ፡ ኣይትናፍቒ በቃ
ኣይትበኣስዮ ግዜ፡ ንዝተሃሞኸ ተስፋ፣
መስ ወደቐ ስጋ፡ ሓመዱ ካብ ሰኣነ
ኣይወለድክንን ወላዲተይ፡ ደጊም ኣይንደላለ፡
ማህጸንኪ ክሓድዮ፡ ዕትብተይ ክዓብስ
ጓጓኺ ረግጢ፡ ሰራውረይ ክብንቁስ፣
ቃንዛ ናፍቘት፡ መሰነይታ ዕድመ
ዝናብ ንብዓት፡ ከም ህጡር ሓምለ-ሰነ
ኣንቃዕሪረ – ናፊቐ – ስቓይ ጐሲመ
ቤትና ሓሊመዮ፡ ኣብ ዘየሕልም ግዜ፣
ወሓይዝ ንብዓት፡ ካብ ኣዒንትኺ ዝረገፈ
ብረስኒ ስቓይ፡ ገሪሩ ምስ ሃፈፈ
ናብ ሰማይ ተመርቂፉ፡ ዝሒሉ – ከቢዱ
ናብ ምድሪ እንክንቆት፡ ደበና ጓሂ ከዲኑ
ካብ ንብዓት ማህጸናት፡ ብሽታ ከለልዮ
ፍትሓት ጸዊዐ – ‘ንብዓት ኣደይ’ ክብሎ፣
ናሕሲ ህዋ ኣሚነ፡ ከዕርገለይ ንሰማይ
ብሃረርታ ንብዓትኪ፡ ወዲአ’የ ንብዓተይ፣
ግዲ፡ ዓይኒ ውዑይ ንብዓትኪ ተደፊኑ
ስትዮ ሰጊሩ፡ ኣብ ጽምኦ ደው ኢሉ
እምበር – በቲ ፍቕሪ ዘቑሓመኒ ማህጸን
በቲ ውሻጠ ባህታይ – ጓጓ ሰፊሕ ዓለም
ካብ መንጫዕጫዕታ ሰማያት ምፈለኹዎ
ሽታኡ መጢጠ፡ “ደሓን ኩን” ምበልኩዎ፣
ምስ እምባ ዕዳይ፡ ምስ እምባ ልግስኺ
ንመወዳእታ ነቢዐ፡ ንመወዳእታ ከቕብጸኪ፡
ስለ ዘይክእሎ ግን፡ ክነብዕ እየ’ሞ
ንዓስኺስ ይትረፍኪ፡ ንነብሰይ ደኣ ይግበሮ
‘ቻው’ ወላዲተይ – ኣይትጸናጸኒ ማህጸን
ምርኩስ ኣይተናድዪ፡ ተመለኽሉ ንእርጋን
ርሑቕ እየ ዘለኹ፡ ከም ኣብ ካልእ ፕላኔት
ጋህሲ ኣሎ ኣብ ቅድመይ፡ ሃንቀውታ ዝውሕጥ
የለኹን ኣብ ዓለም፡ ‘ወሊደ’ ኣይትበሊ
ድሕሪ’ቲ ስቱር ሞት፡ መርድእ ኣይትጸበዪ፣
ብገጣሚ 888
