“ሰሪ ቀንጠብጠበይ ዘይግንጸል ገንጺለ
በራሕ፣ ኳዕናን ወዲ፣ ጭሕሚ ፈይ ዘበለ፤
ነቢበ……ነቢበ ኣይ ክውድኦ
ጠል-ጠል ዘብል ዛንታ፣ ጸሊአ ከይጸልኦ፤
…
“ኣብ ስራሐይ፣ ሓላፊየይ ንሱ
ንሓሳበይ ወናኒኡ ንሱ
ኣቃጺሉኒ’ምበር ልበይ ኣናኺሱ!
“ካብ ርዝነቱ – ዕምቈቱ
ካብ ንውሓቱ – ስሕበቱ፤
ትርኢተ-መቕድሙ ሓንጐፋይ ኢሉኒ
መንፈግቲ ዕላሉ ህልኽ ኣትሒዙኒ፡፡
“ምዕራፍ እጅምር
ምዕራፍ እውድእ
ምዕራፍ እጅምር…..
ንምሸቱ ነዊሕ ምዕራፍ
ብጊሓቱ ኣብ’ቲ ምዕራፍ
ሳልስቲ ኣብኡ
ድሕሪ ዓመት ኣብኡ!
“ከም ቃሕታኡ ዝኰላለፍ ዋሕዚ
ዝባነይ ከይህቦ፣ የጻውድ መትሓዚ፤
‘ታ ዘላ ከይነግሮም ንስምዒታቱ
ከም ዘይጸላኢቱ – ከም ዘይጐዳኢቱ፤
እንታይ ከም ዘዕጥቖም እንድዕሉ
ንልቡ ኣሕሊፎም ከይህቡ
ንኽፍንጫሓለይ መስዋእቲ ይኸፍሉ፡፡
“ ‘…………ዋይ ስጋ ቐላቲ
ብወድስ ካኣ ክንድዚ……
ኲሉ-ምሉ ክጥንጥኖ’ዶ’ንቲ!’
ድንድው እብል ንዝጣዓስ ባዕለይ
መሊሰ’ግንጽሎ እቕጽል ንባበይ፡፡
“ጾር ሓሳብ ክኢለ
ጾር ኲርዓቱ ደሪበ
……እና’ንሰላሎኹ
ሳሕቲ-ሕልፍ ኢሉ
ኣጸምው ኣቢሉ
ማንታ ጕንዲ እዝነይ ኣላጊቡ
ብጥበብ ደጊፉ
ኣልጊቡ ሓቚፉ……
መምበስበስተይ ከም ዝሰዓመኒ
ናይ ልበይ ዲግዲግታ
የበስረኒ ብዓውታ፡፡
ሓፊስ ልኻይ ዝሑል ቅብኣት
የጥልለኒ ከም ምክኻት
ብጸረርታ፣ ብጠለስታ
ኣቤት ፍሳሃ……ዘሎ ባህታ!
“ወዲ ዝተነፍጋ’ሞ የላን ከማይ
ወዲ ዝፈለጠት ግን የላን ከማይ፤
እተን ‘ኣፍቀርና’ባ……..
…….ተቐንጠስና’ ዝብላ
ከናፍረን ዝሰጥሓ ፍቕሪ ክቕንጭባ
ተዓሚተን ያኢ ጡብ ብዕራይ ክሓልባ
ተተመጢጠን ከናፍሮም ዝጠብዋ፤
ዓይኒ-ማይ ፍቕሪ ወዲ
ከይነግረን እታ ሓቂ
ሓይሊ ስዕመት መምበስበስቲ፣
ከም ጥዕይቲ እናሓዘንኩለን
ከይቃጸጻኒ እበቀለን፡፡
…… ……. …….
……. …… ……..”
* * * * *
እንታይ’ዩ’ንታ’ዚ
ጥዕይቲ ድያ ‘ዛ ጓል……ሕምምቲ!
ግጥምስ እስከ ድራር ድዩ ምሳሕ
ኣይ ሓቁ’ንድዩ ዳኣ ክመውት’ዚ ስራሕ፡፡
ንመን’ያ ኸ ክንድ’ዚ…..
………እህም…….
ኣነስ ነዚ ዶ መሲሉኒ
ለካስ እቲ ሰሰሪቓ ትርእየኒ
ፈታዊት መሲላ ጽግዕግዕ ትብለኒ
ንኽትሓናጥጥ’ያ ግጥሚ ክትገብረኒ!!!
ኣነ ዶ’ሞ’ይገድድን
ንሕጂ ከም ሻሙ ከሕልፈላ’የ
እንተ ስራሕ ግን ከጽዕቐላ’የ
እንተ’ግዲዳቶ ኻኣ….፡፡
ቦኽረ ገብረየሱስ
