ሃብቶም ወልደየውሃንስ (ሸሪፎ )
ኣርእስቲ ፡ ዘይእድብቲ
ድምጻዊ ፡ ናሆም ዮውሃንስ ( መስተ )
ገጣሚ ፡ ሃብቶም ተወልደ ( ሃፋ )
ዘያሚ ፡ ናሆም ዮውሃንስ ( መስተ )
ኣላዬ ፡ ሃብቶም ተወልደ ( ሃፋ )
ኣፍራዬ ፡ ኢላ ፕሮዳክሽን
ሰኣልን መዋልን ፡ ዮናስ ሰሎሙን ( ዮናን )
ንውሓት ግዜ ፡ ምስ ክልተ መወዓዊዒታት ኣፍራዬ 7፡13 ደቂቕ
ውርጹጽ ዘይኮነ ሃሳስ ዳህሳስ ድሕሪ ደጋጊመ ምዕዛበይ ንክዛረብ ዘየምሕረለይ ኣይኮነን ፡ ጽቡቕ ከምዘለዎ እቲ ኣዝዩ ዝበዝሐ ሸነኽ ኮይኑ እታ ስራሕ ባዕላ ስለትዛረብ ምልዓሉ ኣየድልየንን እዩ፡፡
ኣነ ትሕዝቶ ግጥሚ ምስ ድራማዊ ምንቅስቃስ ኣብ ምውህሃዱ ምኽኑይን ርእሰ ብሩሁን ኮይኑዶ ተሰሪሑ ኣሎ ? እቲ ድራማዊ ምንቅስቓስ ናይ ብሓቂ ነቲ ግጥማዊ ትሕዝቶ ወኪልዎዶ?
ነቲ ብምልውዋጥ ናይ ሕብሪ ( ሕብራውን ጸሊምና ጻዕዳን ) ኣብ ክኾኖ ዝግብኦዶ ተሰኺዑ ኣሎ? መሰነይታ ኮይኖም ንግጥሚ ናብ ድራማ ዝቐየሩ ተዋሳእቲ ነቲ ክውክልዎ ዝግብኦም ገጸባህሪ ተላቢሰሞዶ?
ምንቅስቃስ ናይ ካሜራ ካብ የማን ንጸጋም ፡ ካብ ጸጋም ንየማን ፡ ካብ ላዕሊ ንታሕቲ ወይ ካብ ታሕቲ ንላዕሊ ክትገብር እንከላ ምኽኑይ ብዝኾነ ድያ ትንቀሳቐስ ኔራ ኣብ ዝብል ነገራት ክብሎ ዝኽእል እይስኣንን እዩ፡፡
እቲ ጽቡቕ ነገሩ Habtom Tewelde ( hafa ) ባዕሉ ገጣምን ኣላይን ስለዝኾነ ፡ ነቲ ግጥሚ ክትጽሕፎ እንከለሎ ዝነበሮ ናይ ውሽጡ ሕልሚ ፡ ናብ ግብራዊ ኣብ ምቅያሩ ዝውሓደ ጽዓት እዩ ከውጽእ ፡ እዚ ድማ ነታ ስራሕ ዝያዳ ሓይሊ ንኽእልዋ ከም ሓደ ምኽንያታዊ ሮቋሒ ክኸውን ይኽእል’ዩ፡
ዛዕባ ግጥሚ ( premise )
ብሰንኪ ናቱ ጌጋታት ፡ ንመቋርንቱ ( ናይ ብዓልቲ ቤት ምልክት ስለዘይርኣኹላ ምናልባት በባሃህላ ባጽዕ ” ተኸርቸም” ) ናብ ጌጋ ይመርሓ’ሞ ፡ ንብዛዕባኣ ንዝዛረቡ ፡ ብሰንከይ እያ ናብዚ ደረጃ እዚ ወሪዳ ክብል ጣዕስኡ ክገልጽ ዝርአ ገጸ ባህሪ፡
ወከልቲ ድራማዊ ምንቅስቓስ
ናሆም ዮውሃንስ ( ድምጻዊ ባዕሉ ) ተዋሳኢት ኣድያምን ካልኦት መሰነይታን።
ምዝማድ ዛዕባ ግጥምን ድራማዊ ምንቅስቓስን ምስ ደቃይቕ ናይ ግዜ እናዛመድኩ ክርእዮ ክፍትን’የ።
> ካብ 00፡00 ክሳብ 00፡14 መወዓውዒ ኣፍራዬ
> ኣብ 00፡22 ዘሎ፡መስመስታ ናይ ስእሊ ነቲ ኣብ ህርመት ሙዚቋ ዘሎ ድግምጋም ምንብድባድ ናይ ከበሮ ተሰንዩ ስለዝተገብረ ኪኖ’ቲ ውህደቱ ዝፈጥሮ ውክልና ( ሲምቦሊዝም ) ፡ ኣብ ቦትኡ ዘሎ ይመስል ፡ ምኽንያቱ ፡ ውልዕ ጥፍእ ናይ መብራህቲ ዋላ ተወሰድና ምልክት ዋሕዲ ወሓዚ ኤለክትሪክ እዩ ዘመልክት ፡ ወይ’ውን ብበርቂ ተመሰልናዮ ፡ ምምጻእ ብርቱዕ ዝናብ ስለዝውክለልና ፡ ክልቲኡ ክኣ ምልክት ሓደጋ ምኳኑ ኣይተርፎን እዩ። ስለዚ ብድሕሪ’ዚ ስእሊ’ዚ ዝመጽእ ነገር ነቲ ኣቀዲሙ ተነጺፉ ዘሎ ውክልና ዘጽድቕ ክኸውን ኣለዎ። ስም ድምጻዊ ምስ ኣርእስቲ ደርፊ ክጽሓፍ እንከሎ ተነጺፍዎ ዘሎ እንተሪኢና ፡ ናይ ርሑቅ ብዙሓት ዝወድቁ ዝመስሉ ወርቃውያን መብራህቲ እዩ ክረአ ጸኒሑ ፡ እዚ ክኣ ክብጻሕ ንዝኽእል ናይ ርሑቕ ጽቡቕ ነገር ስለዝውክለለና ምስዚ ልዒሉ ዝተገልጸ ድራማዊ ምንቅስቃስ ምግርጫው ከይፈጥር ስክፍታይ እዩ። ስም ድምጻዊ ኣብ ግብ ዝበለ ጸላም ( ንዛዕባ ግጥሚ ብዝውክል ድሕረ ባይታ ፡ ንኣብነት ብጸሊምን ጻዕዳን ዝተሰኣለ ፈራስ ገዛ ) ድሕረ ባይታ ተዝጽሓፍ ባህ ምበለኒ ።
እዚ ኩሉ ዝብል ዘለኹ ዋላ ሓንቲ’ውን ቃላ ካብ ድምጻዊ ከይሰማዕኩ’ዩ ፡ ቀሊል ዝመስለና ግን ክኣ ንምሉእ ናይ ደርፊ ክሊፕ ከዕንዋ ዝኽእላ እየን እዘን ቀዳሞት ካልኢታት ፡ ዛዕባ ንገልጸለን ፡ ኩነታት ነአንፍተለን ፡ ሕልምና ነተንብሃለን ፡ እምበር ካብዚ ንንዮ ድምጻዊ’ውን ብቃሉ ስለዝሕግዘና ስራሕና ቅልል ይብል እዩ።
> 00፡37 ክሳብ 01፡13 ኣብ ዘሎ ስእሊ ድምጻዊ ጠንቂ ናታ ተግባር ( ኣብ ከባቢ 00፡25 ዝረኣናዮ) ግዳይ ሰኺራ ኣብ ሓደ እንዳ ሊስትሮ ደቂሳ ትረኣየሉ ፡ ንሱ ምኳኑ እቲ ጠንቂ ክገልጽ ብሕደማ ናይ ደርፊ ንሰምዖ ፡ ኣብ ስእሊ ግን ኪኖ ጻዕዳ ክዳን ( ምልክት ንጽህና ፡ ምልክት ሓቂ ፡ ምልክት ድንግልና ፡ ምልክት ጽድቂ ብዓቢኡ ምልክት ክንቆርብ እንከለና እንገብሮ ) ጌሩ ክደርፍ ኢና ንርእዮ ፡ ነቲ ንሱ ዝብሎ ግን ኣብ ስእሊ ኣይንርእዮን ፡ ክንዲ ከምኡ ዝኸውን ፡፡
ሙዚቋ ህርመት ክጅምር እንከሎ ድምጻዊ ( ተዋሳእይ’ውን ባዕሉ ስለዝኾነ ) ክንቀሳቀስ ንርእዮ’ምበር ካልእ ከይተወሰኾ ጸኒሑ ፡ ነታ መቋርንቱ ፡ ሰሪ ናቱ ጌጋ እትገብሮ ተግባር ምስ ቃላቱ ተሳንዩ ኣብዚ ተንርእዮ ስጡም ምግጥታም ሕደማን ተግባርን ምፈጠረ።
> 01፡27 ዘላ መሰጋገሪት ብጫምኡ ጥራይ ትውከል ፡ንብዙሓት ፍጻሜታት ኣብ ክልተ ካልኢት ክትውክል ምኽኣላ ሓይሊ ኣላይን ጎሊሑ ይረአ ፡ ሓጊዝዋ ፡ ተላልዮም ፡ ኣብ መኪና ክድይብ እግሩ ንርእዮ ፡ ካብ መኪና ክወርድ እግሩ ንርእዮ good job።
> ክሳብ 02፡01 ኣብ ዘሎ መቋን ግዜ ቀንዲ ዛዕባ’ዚ ኩሉ ዞይና ዘላ ግዳይ ( ኣድያም ) ብጀካ እቲ ኣብ ከባቢ ( 00፡25) ዝረኣናዮ ዘይእድብቲ ከብላ ዝኽእል ዋላ ሓንቲ ኣይረኣናላን ዘለና፡ ናይ ሸፈነ ግዜ ዝሓጸራ ኮይኑ ይስምዓኒ።
> 02፡45 ዘሎ ቅላዕ ናይ ካሜራ ፡ ካሜራ ላዕሊ ናሆም ክኣ ኣብ ታሕቲ ምትካላ ፡ ንውድቀት ፡ ንምፍራስ ፡ ንምዕናው ፡ ንሃደሽታ ዝውክል ምኳኑ ምስ ሕደማ ናይታ ደርፊ ብምስናይ ጽቡቕ ኣንግል እዩ።
> 04፡45 ኪይኑ’ሎ ግዜ ፡ ድርብ ንኣቱ ኣለና ክሳብ ሕጂ
# ሰትያ ረኺብዋ
#ብሰላም ኣብ ገዝኦም ምኣዲ እናበልዑ ይረእዩ
#ምስ ሓንቲ ጓል ተላልዩ
#ምስ’ታ ጓል ዙሮት ጀሚሩ
#መቋርንቱ ክትጽበዮ ርኢናያ
#ሰትዩ መጽዩ
#ምክሪ ናይ ኣዲኣ ( ኣዲኣ እያ ትኸውን ካብ ዝብል እዩ እምበር ዝኮነ ምልክት ተግባርን ናይ ኣደ ኣይረእኹን ) ሓዲጋ ምስ ናሆም ክትከይድ ትረአ።
መስርዑ ሓልየ ክኣስሮ ምስ ዝፍትን ።
ምኽሪ ወላዲታ ( ወላዲታ እንተኾይና ) ነጺጋ ብዝኣመነትሉ መንገዲ ፡ ንፍቕሪ ኣፍቂራ ምስ ኣፍቃሪኣ ንክትነብር (ክትክርቸም ) ዝወሰነት ጓል እቲ ትኣምኖ’ሞ ምስኡ ክትነብር ዝወሰነት ሰብ ኣብ ጽርግያ ምስ ዝተላለያ ሰብ ዓበድበድ ክብል ( ብዓይና እኳ ኣይረኣየቶን ) ፡ ሰትዪ መጽዩ እግሩ ክትሓጽቦ ክትብል ሽንዲሑ ስለዘቆጠዓ ናብ ካብ ናቱ ዝገድድ ዓበድበድ ከተምርሕ ኣብ ገዛ ብዝጸንሓ ኣረቂ ትጅምሮ ፡ ኣብዚ ክብሎ ዝኽእል ኣለኒ ኣብ ታሕቲ ከስፍሮ እየ።
ንቐጽል ናብ ድርብ
ምንቅስቓስ ናይ ናሆም ክሳብ ሕጂ ክጻወሮ ጸኒሐ!!!
> 05፡24 ክሳብ 05፡35 ኣ ዘሎ ምንቅስቃስ ናይ ኖሆም ግን ኣብ’ቲ ተጣዒሰየ ዝብሎ ዘሎ መንገዲ ወጽዩ ፡ ናቱ ቅዲ ፡ ናቱ ቃጥያ ከውጽእ ክብል ነቲ ድራማዊ ምንቅስቃስ ምሉእ ብምሉእ ደዊንዎ።
> 06፡07 ነቲ ኣብ 00፡25 ዝረኣኽዎ ተግባር ዛንታ ተኣሳሲሩለይ ኣሎ ፡ ( ነዛ ዛንታ ኣዘንታዊ ኣበየናይ ባይታ ኮይኑ የዘንትዋ ኣሎ ብርዱእ ወሲደ ክቅጽል እየ )
እምበር ከም ግቡእ ፡ ኣብየናይ ባይታ እዩ ዘሎ እዚ ነዚ፡ዛንታ ዝነግር ፡ ዝትርኽ ዝደርፍ ዘሎ ምትሓዙ ኣገዳሲ እዩ ፡፡ እብዚኣ’ውን ምስቲ ዛንታ ናይታ ሕደማ ኣሳንየ ኣብ ትሕቲ ገለ ክብል’የ።
> 06፡36 ዘላ ቅላዕ ናይ ካሜራ፡ ካሜራ ታሕቲ ፡ ጠባይ ድማ ኣብ ላዕሊ ዘላ ምናልባት እቲ ቅርጺ መሬታ ናይቲ ደንደስ ባሕሪ ተምሳጥ ክፈጥረልኩም ይኽእል ይኸውን’ምበር ፡ እዚ ዓይነት ቅላዕ ናይቲ ጠባይ ዕቤት ፡ ብልጻገ ፡ ልዕልና ስለዘርእየና ንተሃኒጹ ዘሎ ዛንታ ኣብ ግምት ኣእትየ ኣድላይነታ ኣይተራእየንን፡፡
> 06፡50 ኣስማት ዓየይቲ ክዝርዘር ጀሚሩ’ሎ ፡ ተለጢፉ ዘሎ ደረቕ ስእሊ ናይ ናሆም ግን ክንዲ ፍረ እድሪ’ውን ትኹን ነቲ ክብለና ዝጸንሐ ጉዳያት ዝውክል ኣይኮነንን ፡ ተፈሲሁ ” ሓስየ እየ ፡ ተላጊጸልኩም ” ዝብለኒ ዘሎ ኮይኑ ተሰሚዑኒ።
> 07፡00 ክሳብ 07፡13 መወዓውዒ ኣፍራዬ።
መቐጸልታ ናይቲ ኣብ ላዕሊ ክብሎ እየ ዝበልክዎ ።
ንዓይና ከይርኣየት ፡ ሰብ’ውን ክብላ ከርኣና ፡ ብተግባር ናይ ሓደ ምዓልቲ ሰኺሩ መጽዩ እግሩ ክትሓጽቦ ክትብል ደፊእዋ ካብ ገዛ ስለዝወጸ ፡ ሕነ ሕነ ናቱ ናብ ዕቡድ ተግባር ብኣብ ገዝኣ ዝጸንሓ ኣረቂ ጀሚራ ፡ ብሽጋራን ናብ ሃለወትካ ዘጥፍእ ዕብዳን ከተምርሕ ምኽኑይ ኣይገንሮን ፡ ኣኣብ ገዛና’ሞ ንፈትሽ ፡ እዛ ሰብ ወካሊት ናይ ሓደ ኣካል ዕድመ ክሳብ ዝኮነት ፡ ኣዴታትና ንኣንስትና ትውክልዶ እንተኢልና ፡ ነቲ ኣብ ናይ ንእስነት ዕድመ ንዘለዉን ብተግባራ ( ሽጋራ ፡ መስተ ) ክጽለዉ ንዝኽእሉ ኣብ ግምት የእትየ ኣብዚ መዳይ’ዚ ባዶ ነጥቢ እየ ክህባ ፡፡
ካልእ ቀንድን ኣገዳስን ጉዳይ ፡ ነጋሪ ዛንታ ኣበየናይ ባይታ ኮይኑ እዩ ዛንትኡ ( ግድን ኣይኮነን ዛንትኡ ክኸውን ፡ ንሱ እናደረፈ ነቲ ድራማዊ ምንቅስቃስ ካልኦት ክውክልዎ ይኽእሉ’ዮም ) ዝነግር ዘሎ ኣብ ዝብል ጉዳይ ፡ ኣብ ብዙሕ ክሊፓትና ዝስገር ነጥቢ እዩ ፡ ኣብዚ ናይ ” ዘይእድብቲ ” ነጋሪ ዛንታ ፡ ድሕሪ ምፍልላዮም ፡ ንሱ ሓዳሩ ጌሩ ክዛወር ምስ ደቁን ብዓልቲ ቤቱን ናብ ባጽዕ ምስ ወረደ ፡ ቀደም ብዝገደፈላ በሰላ ፡ ክሳብ ሕጂ ምሕዋይ ዝኣበያ ግዳይ ፡ እቲ ” ዘይእድብቲ ” ከብል ዝኽእል ተግባር ክትገብር ትጽንሓዮ’ሞ ( እዚ ኩሉ ተግባር እዚ ድምጻዊ ቃላት ካብ ኣፉ ምውጻእ ቅድሚ ምጅማሩ ብምንቅስቓስ ጥራይ ክንገር ዝክኣል’ዩ ) ፡ ኣብዚ ባይታ’ዚ ኮይኑ ዛንትኡ ምንጋር እንተዝጅምር ዓይነይ ምመልኣለይ፡፡
ግንቦት 2016
