ትላመዶ ዲኻ ኣንታ ጥበበኛ
ምስ ቃንዛኻ ምንባር
ንቐታሊ እናበልዎ ሓርበኛ
ተጣቢብካ ምፍጣር
ምስሏኽ በታ ዑንቂ ኣብ መላጸ ምህጣር
ከመይ ኢልካ ትኽእሎ ኣብ ሕልና ምስፋር?
ሰብ ክትከውን ደልዮም ያኢ ክትሕወስ!
መሳልል ፈጢሮሙልካ ለማጽ
ወስ እንተበልካ ሸተት በቲ ንፋስ
እናፈረዱኻ ንሞደሻ ንፋስ
ከመይ ኢልካ ትኽእሎ ሳዕሪ ደንደስ ምሓዝ?
ከመይከ ትመርጾ ስታቲኮ ኣርተ
ቃንዛ ትጭልጦ ጥበባዊ መስተ!
ይምቅረካዶ ክንዲ ምምሳል ምዃን?
ካብ ዓይኒ ወጺእኻስ ኣብ ልቢ ምድኳን
ዓርኪ ህቦብላ መሓዛ ማዕበል
ምዝላል ክብ ምባል ይኹነኒ ቓል
ንመኣዛ ፍጡር ኣብ ቃንዛ ምግዳል
ሕሸኒ ዝበልካ ጠንቀላዕላዕ ምባል?
ዋእ! ንገረኒ ኣትሕዘኒ ምራን
ክድይቦ ብራኼኻ ኣኽራን
ክራሸ ክድርቢ ኣምርጸኒ ዕብራን
ኔው ክብሎ ምጥባር ልሳነ ምሁራን!
ኪኢልካዮ እንዲኻ ምውሓጥ ብደረቑ
ጎርዳዕ ምባል ቃንዛ ከይተዞቁ
ኣትሪርዎ ንጅማት ሰርኒቑ
ተሓዊሱ ምስቲ ደምካ ፍርቁ።
ኣዕትረኒ ኣትሕዘኒ ኢዱ
ኣቅኒእኒ መከራኻ ጉዱ
ሰዓሪ ሞት ንቓንዛ ጨሊጡ
ኣብ ዓለምካ ሞት ተለሚዱ።
ፈትሊ ስራይ ብጅማት ወጢረ
ኮኾብ ሰማይ ብሕልመይ ኣሲረ
ክመጸካ ክንደይ ሳብ ሃሪረ
መዓስሞ ተረካቢ ጭራ
ነትጒ ወዝቢ እሳተጎመራ
መዋዕልቲኻ በርቂ ሓጋይ
ዛርቲ ኣሲረናልካ ስራይ
ዘየዛርብ ምሳይ!
ሰሓበኒ ዋላ ይጽደፍ
ይቀባእ መንፈሰይ ስጋይ ይቀራረፍ
ሰፈፍታ መዓሩ ይበል ሰፈፍ
ብመከርኡ ይተሃረፍ
ግደፍ ዓርኪ ልመድ
ወርውረለይ ናይ ቅንዕና ገመድ
ኣፍቅደለይ ቃንዛኻ ክላመድ!
ወዲ ኣቢብ
2016
