ሰለስተ መላእኽትን 26 ሰዓትን

ራእየ ኣዝማሪኖ
እቲ ሰዓት ካብ 24 ሰዓታት ወጻእ ኢዩ ዘሎ። ሰዓት 26። ደቒቕን ካልኢትን ዘይብሉ ፍሉይ ሰዓት ። ምስ ግዜ ዘይቃዶ ተፈጥሮ ዘዛብዔ ሓያል ሰዓት። ንቕድሚት ዘይሕምበብ ንድሕሪት ዘይምርቀፍ ግሩም ሰዓት። ኣብዚ ግሩም ሰዓት ንበይነይ ተገሪመ እንከሎኹ ግሩም ራእይ ርኤኹ። ኣብ ዙርያይ ካብ ጸሓይ ሾብዓተ ዕጽፊ ዝዛይድ ድሙቕ ብርሃን ከበበኒ። ካብ ውሽጠይ ብርሃን መንጨወ እሞ ከም ኣምፑል ብርሃን ክህብ ጀመርኩ። ወላ ራዕዲ እንተወሓጠኒ እንተጽልምት ከ ነይረ ብምባል ተመስገን በልኩ። ኣብዚ ቕጽበት ኢዩ እንበኣር ካብቲ ድሙዕ ብርሃን ዓቢ ጋውሕታ ድምጺ ዝሰማዕኹ። ትርኢቱ ከም መልኣኽ ኢዩ። ገጹ ደጒሒ ጸሓይ ኢዩ። ቁመናኡን መልክዑን ማራኺ ኢዩ ጥራይ ዘይኰነሲ ጓል እንተዝኸውን ኢዩ ዘብለካ። “ኣሞሬ” በለኒ ብዘይፈልጦ ቋንቋ። ካብ መላእኽቲ ዝፈልዮ ድማ ኣብ ኢዱ ሴፍ ዘይኰነሲ ዕምባባ ጨቢጡ ምሓዙ ኢዩ። ከብስረኒ ዲዩ ወላስ ከፍቅረኒ ኢለ ንርእሰይ ሓተትኩ። ንባዕልኻ ሓቲትካ ካብ ባዕልኻ መልሲ ምጽባይ ክንደይ ይኸብድ!። ዕምባባ ተምሳል ብስራትን ፍቕርን ኢዩ። ብስራት ገብርኤል ንኢየሱስ ናተይ ብስራት ከኒ ንመን ? ጋን ኰነኒ። “ኣሞሬ” እታ ቓል ደጋጊመ ኣስተማቐርኩዋ። ብምንታይ ቋንቋ ኮን ይኸውን? ሕጂ እውን ኣለሻ መልሲ። ሰላም ንዓኻ በለኒ። እንተላይ ንዓኻ በልኩዎ። ብርእሰ ተኣማንነት። መን ኢኻ ንስኻ ግን? በልኩዎ ምስ ፍርሓተይ እናተጋደልኩ። ኣነሲ እፈልጠካ ኢየ ንስኻ ግና ኣይትፈልጠንን ኢኻ በለኒ መልኣኽ ሆየ። ውሽጠይ ስምባደ ዓጀበኒ። ህቡብ ኢኻ ዲዩ ዝብለኒ ዘሎ ወላስ ንሱ ጠንቋሊ ኢዩ?። ተወጃበረኒ። ኣብቲ ዝወደዮ ወርቂ ካፖት ኣብ ደረቱ “ኦ- ኤል” ዝብል ጽሑፍ ተጠቂዑ ርኤኹ። ስምካ ዲዩ? ሓተትኩዎ። ኣገናዕ! ስመይ ኢዩ መለሰለይ። ፍሽኽታ ኣይተፈልዮን። ብልቢ ስምዓኒ ኢሉ ኣፈራርሓኒ። ኣእዛነይ ኩር ኣቢለ ብልበይን ብእዝነይን እሰምዓካ ኣሎኹ በልኩዎ ንምላሹ ተሃዊኸ። ልብኻ ኣበይ ኣሎ ዀይኑ እሞ ብልቢ ትሰምዓኒ ኢሉ ኣባጨወለይ። ዘይምለስ ልቢ ፈትየ ዝሃብኩዎ ደኣ ንዕኡ ዶ ይኸውን? ነብሰይ ፈጥፈጥ በለኒ። ልቢ ሂብካኸ ምፍቃር ኣሎ ድዩ? ኦ! መልሲ! ኣፈርክበለይ። ዘጨንቐካ ሕቶ እንታይ ኢዩ ኢሉ ዘጨንቘ ሕቶ ሓተተኒ። ፍቕሪ እንታይ ኢዩ? ሓተትኩዎ። ክምስ ኢሉ ፍቕሪ እንተፈቲንካዮ ዘቕጽዕ እንተፈጺምካዮ ዘዋጽእ ከም ርእሰ ቕትለት ኢዩ። ርእሰ ቕትለት እንተፈቲንካ ብሕጊ ትቕጻዕ እንተፈጸምካዮ ግና ዝቐጽዓካ የልቦን በለኒ። እሞ ርእሰ ቕትለት ፈጽም ዲዩ ኣበሃህላኻ? ሕርቃን ተጸምበለኒ። ኣይበልኩን በለ። እታ ዕምባባኸ ንዓይ ዲያ? በልኩዎ። ኣይፋል! ክትህበኒ ኢለ ኢየ ኣምጺኤልካ ። ኣብዚ ቕጽበት ኣዒንተይ ናብ ሓደ ነገር ዓለዋ። ካፖቱ ከዕርይ እንከሎ ጡብ ረኣኹሉ። ኣነስተይቲ መልኣኽ! ፎቕ ኢለ ሰንበድኩ። ካብ ቅድመይ ተሰወረት። እቲ ማዕበል ብርሃን ግና ጌና ኢዩ ዘሎ። ሰዓት 26 ትብል ኣላ። ኣነ እውን ይበርህ ኣሎኹ ′የ።ግልጽ በልኩ። ካልእ ጸሊም መልኣኽ ተኸስተኒ። ውሽጠይ ወቕቲ ዀይኑ ንፋስ ቈላ ደጋን ወይና ደጋን ክነፍሰኒ ተሰምዓኒ። ኣስናነይ ኣውሊ ሓሙሽተ ክረምቲ ከም ዝወረዶ ይንቅጥቀጥን ላዕለዋይ ኣስናነይ ንታሕተዋይ ኣስናነይ ከም ትልሂት ኩናማ ይድዕዀን ብሓይሊ ይሃርሞን ነበረ። ስሙ ኣብ ደረቱ ንምርኣይ ታህዋኽ ዘምበየኒ። “ቪ-ኤል” ዝብል ጽሑፍ ርኤኹ። መንገብገቡ ብፍሉይ ሕብርታት እተመላኽዔ ጸሊም መልኣኽ። ጸጉሩ ፍርቁ ጸሊም ፍርቁ ጻዕዳ ነበረ። ደቡብ ኣፍሪቃዊ ዲኻ? ተወከስኩዎ። ከመይ ማለት? በለኒ በቲ ዝነቕዔ ነጋሪት ዝመስል ልኩትኩት ዝበለ ድምጹ። ህዝቢ ደቡብ ኣፍሪቃ ገለ ጻዕዳ ገለ ጸሊም ስለ ዝዀነን ጸጉርኻ ድማ ፍርቁ ጸሊም ፍርቁ ሸያብ ስለዚዀነን ኢየ ሓቲተካ በልኩዎ። ኣይፋል ኣብ ሰማያት ደቡብ ኣፍሪቃ ዝርከብ መልኣኽ ኢየ በለኒ እናሓጨጨ። ኣኽናፉ ማረኸኒ። ኣብ ኣኽናፉ 55 ከናቲት ኣሎዎ። ባንዴራ 55ቲኤን ሃገራት ኣፍሪቃ ኣብ ኣኽናፉ ኣሎ። pan Africanist ዶ ደኣ ይኸውን በልኩ ብውሽጠይ። ሓንቲ ሃገር እንተተገንጸለት ከ ደኣ እንታይ ትገብር? በልኩዎ። ክንቲት እውስኽ በለኒ። ናብ ኢዱ ርኤኹ። ቐለቤት ወርቂ ጨቢጡ ኣሎ። ማኬ! ናይ መን ደኣሉ በልኩዎ። ናትካ ኢዩ መለሰለይ። ሕጂ እውን ስንባደ። ግዜ የብለይን! ሕተተኒ እሞ ክኸይድ ኢሉ ከም ዝተሃወኸ ሓበረኒ። ከም ዓንተቦ መሊሰ ፍቕሪ እንታይ ኢዩ? ሓተትኩዎ። ኣእዳው እናወጣወጠ ፍቕሪ ከም ንህቢ ኢዩ። ፍቕሪ ከም ንህቢ መዓርን መርዝን ዝህብ ናይ ረቂቕ ገጂፍ ኣካል ኢዩ። “ቪ- ኤል” ጸዋዕኩዎ። ተሰወረኒ እንታይ ኢዩ እዚ ነገር። ዓቕለይ ጸበበኒ ሰዓት 26 ትብል ኣላ። እቲ ብርሃን ንእሽቶ ነከየ። ፍርሒን ራዕዲን ወሓጠኒ። ሳልሳይ ኣብ ኢዱ ገለ ዘይሓዘ ከደራይ መልኣኽ ደበኽ በለ። ሓበሻ ይመስል። ናብ ደረቱ ርኤኹ። “ኢ-ኤል” ይብል ስሙ። ካብ 24 ሰዓታት ወጻእ ከም ዘለና ኣይትረስዕ ኢሉ መሃነነይ ኣጥፍኣለይ። ምፍቃር እንታይ ኢዩ? እዚ ሕቶ ካብ ኣፈይ ምስ ወጸ ውነይ ጠፍኣኒ። ሒዙኒ ናብ ሰማያት ኣቢሉ ተመርቀፈ። ናብ መሬት ቀው በልኩ። ፈሪሐ ኣዒንተይ ሽዓ ንሽዓ ዓመትኩ። ኣብ ዝዀነ ቦታ ኣዕረፈኒ። ሰብ ዘይብሉ። ለካስ ህዋ ኢዩ። ረይረይ በልኩ። ኣልቅስ ኣልቅስ መጽኣኒ። ጭራሽ። ለካስ ኣብ ህዋ ምንባዕ ዝከኣል ኣይኰነን። ተንቀሳቐስ በለኒ። ፈጺመ ኣይከኣልኩን። gravity የለን። ሰዓተይ ርኤኹዋ። ሰዓት 26 ትብል ኣላ። ኣይወሰኸት ኣይነከየት። ምፍቃር እንታይ ኢዩ እንድዮ ሓቀይ ሕቶኻ? ሓተተኒ። ትም መለስኩሉ። gravity ኣብ ዘይብሉ ህዋ ወጺእካ ፈዚዝካ ምትራፍ ማለት ኢዩ በለኒ። ፈዚዘ ድማ ተረፍኩ ።
ተስፋስላሰ (ኣዝማሪኖ)